Read Nepali New Revised Version, 2012 भजनसंग्रह 105 Bible Online

भजनसंग्रह 105 - Nepali New Revised Version, 2012 bible

भजनसंग्रह 105

¹परमप्रभुलाई धन्‍यवाद चढ़ाओ, उहाँका नाउँको पुकार गर, जातिहरूका बीचमा उहाँले गर्नुभएका कार्यहरू प्रचार गर।

²उहाँको निम्‍ति गाओ, उहाँको निम्‍ति प्रशंसाको भजन गाओ, उहाँका सबै आश्‍चर्यकर्महरूको बयान गर।

³उहाँको पवित्र नाउँमा तिमीहरू गौरव गर, परमप्रभुलाई खोज्‍नेहरूका हृदय आनन्‍दित होऊन्‌।

⁴परमप्रभु र उहाँका शक्तिको खोजी गर, उहाँको दर्शन निरन्‍तर खोज।

⁵उहाँले गर्नुभएका अचम्‍मका कामहरू स्‍मरण गर, उहाँका आश्‍चर्यकर्म र उहाँले सुनाउनुभएका फैसलाहरू स्‍मरण गर,

⁶हे उहाँका दास अब्राहामको वंश, हे याकूबका सन्‍तान, उहाँका चुनिएका हो।

⁷उहाँ परमप्रभु हाम्रा परमेश्‍वर हुनुहुन्‍छ, समस्‍त पृथ्‍वीमा उहाँका फैसलाहरू रहन्‍छन्‌।

⁸उहाँ आफ्‍नो करार सदा स्‍मरण गर्नुहुन्‍छ, त्‍यो वचन जो उहाँले हजारौं पुस्‍ताहरूलाई दिनुभएको थियो,

⁹त्‍यही करार, जो उहाँले अब्राहामसँग बाँध्‍नुभयो, त्‍यही शपथ, जो उहाँले इसहाकसँग गर्नुभएको थियो,

¹⁰जो उहाँले आदेशको रूपमा याकूबसित पुष्‍टि गर्नुभयो, र इस्राएलसँग यसो भनेर अनन्‍त करारको रूपमा बाँध्‍नुभयो:

¹¹“तँलाई म कनान देश दिनेछु, त्‍यो उत्तराधिकार तेरो अंश हुनेछ।”

¹²जब तिनीहरू गन्‍तीमा थोरै मात्र थिए, साह्रै थोरै, र त्‍यसमा पनि विदेशी थिए,

¹³तिनीहरू एक राष्‍ट्रबाट अर्को राष्‍ट्रमा, र एक राज्‍यबाट अर्को राज्‍यमा फिरन्‍ता भई हिँड्‌थे।

¹⁴उहाँले कसैलाई पनि तिनीहरूमाथि अत्‍याचार गर्न दिनुभएन। तिनीहरूका खातिर उहाँले राजाहरूलाई पनि यसो भनेर हप्‍काउनुभयो,

¹⁵“मेरा अभिषेक भएकाहरूलाई नछोओ, र मेरा अगमवक्ताहरूलाई केही हानि नगर।”

¹⁶उहाँले त्‍यस देशमा अनिकाल पठाउनुभयो, र अन्‍नका सारा आपूर्ति नै नष्‍ट गरिदिनुभयो।

¹⁷उहाँले योसेफ नाउँ भएका एक जनालाई तिनीहरूका अगि पठाउनुभयो, जो कमारा हुनलाई बेचिएका थिए।

¹⁸तिनको खुट्टामा तिनीहरूले नेल ठोकेर दु:ख दिए, र तिनको गलामा फलामको जन्‍जीर लगाइदिए,

¹⁹जबसम्‍म तिनको वचन पूरा भएन, तथा परमप्रभुको वचनले तिनलाई सच्‍चा प्रमाणित गरेन।

²⁰राजाले मानिस पठाएर तिनलाई छुटकारा गरिदिए, जनताका शासकले तिनलाई बन्‍धनबाट मुक्त गरे।

²¹राजाले तिनलाई आफ्‍नो राजभवनका प्रधान बनाए, र आफ्‍ना सबै सम्‍पत्तिका शासक तुल्‍याए,

²²उनका राजकुमारहरूलाई तिनले चाहेजस्‍तो सिकाउनलाई, र उनका बुज्रुकहरूलाई ज्ञानका कुरा सिकाउनलाई।

²³तब इस्राएल मिश्रदेशमा प्रवेश गरे, र याकूब हामको देशमा प्रवासीको रूपमा बसे।

²⁴परमेश्‍वरले आफ्‍ना प्रजालाई ज्‍यादै फलवन्‍त बनाउनुभयो, तिनीहरूको शत्रुभन्‍दा तिनीहरूको सङ्‌ख्‍या अझ बढ़ी बनाउनुभयो।

²⁵परमेश्‍वरले मिश्रीहरूका हृदयलाई उहाँका दासहरूलाई घृणा गर्न परिवर्तन गर्नुभयो, आफ्‍ना सेवकहरूका विरुद्ध षड्‌यन्‍त्र गर्ने मन उनीहरूलाई दिनुभयो।

²⁶उहाँले आफ्‍ना दास मोशा र आफूले चुन्‍नुभएका हारूनलाई पठाउनुभयो।

²⁷तिनीहरूले उनीहरूका बीचमा उहाँका आश्‍चर्यका चिन्‍हहरू, र हामको देशमा आश्‍चर्यका कामहरू देखाए।

²⁸उहाँले अन्‍धकार पठाउनुभयो, र समस्‍त देशमा अँध्‍यारो छायो, किनकि उनीहरूले उहाँका वचनको विरोध गरेका थिए।

²⁹उहाँले उनीहरूका पानीहरूलाई रगत बनाउनुभयो, र उनीहरूका माछाहरू मरे।

³⁰भ्‍यागुताका बथान उनीहरूको देशमा आएर शासकहरूका शयनकक्षसम्‍म पनि पुगे।

³¹उहाँले आज्ञा गर्नुभयो, र सारा देश झीँगा र भुसुनाले भरियो।

³²उहाँले वृष्‍टिलाई असिनामा परिवर्तन गर्नुभयो, र उनीहरूको देशभरि बिजुली चम्‍काउनुभयो।

³³उहाँले उनीहरूका दाख र अञ्‍जीरका बोटहरू ध्‍वंस पारिदिनुभयो, र उनीहरूको देशका रूखहरू ढाल्‍नुभयो।

³⁴उहाँले आज्ञा गर्नुभयो, र सलहहरू र अनगिन्‍ती फटेंग्राहरू आए।

³⁵तिनीहरूले उनीहरूको देशका सबै वनस्‍पति, र उनीहरूको भूमिका फल खाइदिए।

³⁶अनि उहाँले उनीहरूको देशका सबै ज्‍येष्‍ठ सन्‍तान, उनीहरूको पौरखका पहिला फलहरूलाई नाश गर्नुभयो।

³⁷उहाँले सुन र चाँदीसहित इस्राएलीहरूलाई बाहिर निकाल्‍नुभयो, र तिनीहरूका कुलमध्‍येको कसैले पनि ठोकर खाएन।

³⁸तिनीहरू निस्‍किगएकामा मिश्रदेश खुशी भयो, किनभने इस्राएलको भय उनीहरूमाथि परेको थियो।

³⁹उहाँले आवरणको निम्‍ति बादल फिँजाउनुभयो, र राती उज्‍यालो दिनलाई आगो दिनुभयो।

⁴⁰तिनीहरूले मागे, र उहाँले तिनीहरूलाई बट्टाई चराहरू दिनुभयो, र स्‍वर्गको रोटी तिनीहरूलाई प्रशस्‍त मात्रामा दिनुभयो।

⁴¹उहाँले चट्टान फोर्नुभयो, र पानी फुटिनिस्‍क्‍यो, र मरुभूमिमा नदीझैँ बग्‍यो।

⁴²किनभने उहाँले आफ्‍ना सेवक अब्राहामलाई दिनुभएको पवित्र प्रतिज्ञा स्‍मरण गर्नुभयो।

⁴³उहाँले आफ्‍ना मानिसहरूलाई आनन्‍दसाथ आफ्‍ना चुनिएकाहरूलाई जयजयकारको ध्‍वनिसाथ ल्‍याउनुभयो।

⁴⁴उहाँले तिनीहरूलाई जाति-जातिहरूका देश दिनुभयो, र अरू मानिसहरूका परिश्रमको फल तिनीहरूले आफ्‍नो अधिकारमा पारे।

⁴⁵तिनीहरूले उहाँका आदेशहरू पालन गरून्‌, र उहाँका नियमहरूलाई मानून्‌ भनेर नै यी सब भए। परमप्रभुको प्रशंसा गर।