Read Nepali New Revised Version, 2012 भजनसंग्रह 146 Bible Online

भजनसंग्रह 146 - Nepali New Revised Version, 2012 bible

भजनसंग्रह 146

¹हल्‍लेलूयाह! [1] ए मेरो प्राण, परमप्रभुको प्रशंसा गर्‌!

²म जीवनभरि परमप्रभुको प्रशंसा गर्नेछु, म जीवित रहुञ्‍जेल मेरा परमेश्‍वरको स्‍तुति गाई नै बस्‍नेछु।

³आफ्‍नो भरोसा संसारका शासकहरूमाथि नराख, मरणशील मानिसमाथि, जसले बचाउन सक्‍दैनन्‌।

⁴जब तिनीहरूको आत्‍मा निस्‍कन्‍छ, तिनीहरू माटोमा मिलिहाल्‍छन्‌। त्‍यही दिन तिनीहरूका योजनाहरू पनि नष्‍ट हुन्‍छन्‌।

⁵त्‍यो मानिस धन्‍यको हो, जसको सहायता याकूबका परमेश्‍वरमा छ, जसको आशा परमप्रभु त्‍यसका परमेश्‍वरमा हुन्‍छ।

⁶उहाँ स्‍वर्ग र पृथ्‍वी, समुद्र र त्‍यसमा भएका यावत्‌ थोकका सृष्‍टिकर्ता हुनुहुन्‍छ। परमप्रभु सदाकालको निम्‍ति विश्‍वासयोग्‍य रहनुहुन्‍छ।

⁷उहाँले अत्याचारमा परेकाहरूका पक्षमा न्‍याय दिनुहुन्‍छ, र भोकाहरूलाई भोजन दिनुहुन्‍छ। परमप्रभुले कैदीहरूलाई मुक्त गरिदिनुहुन्‍छ।

⁸परमप्रभुले अन्‍धाहरूका आँखा खोलिदिनुहुन्‍छ। परमप्रभुले दबिएकाहरूलाई उठाउनुहुन्‍छ। परमप्रभुले धर्मीजनलाई प्रेम गर्नुहुन्‍छ।

⁹विदेशीहरूलाई परमप्रभुले रक्षा गर्नुहुन्‍छ! अनाथ र विधवालाई उहाँले सम्हाल्‍नुहुन्‍छ, तर दुष्‍टहरूका युक्तिहरू उहाँले विफल पार्नुहुन्‍छ।

¹⁰परमप्रभुले सदासर्वदा राज्‍य गर्नुहुनेछ, ए सियोन, तिम्रा परमेश्‍वरले पुस्‍तौँ-पुस्‍तौँसम्‍म राज्‍य गर्नुहुनेछ। हल्‍लेलूयाह!