Read Nepali New Revised Version, 2012 भजनसंग्रह 38 Bible Online

भजनसंग्रह 38 - Nepali New Revised Version, 2012 bible

भजनसंग्रह 38

¹सम्‍झनाको निम्‍ति दाऊदको भजन [1] हे परमप्रभु, तपाईंको क्रोधमा मलाई नहप्‍काउनुहोस्‌, अथवा तपाईंका क्रोधको आवेगमा मलाई ताड़ना नदिनुहोस्‌।

²किनकि तपाईंका बाणहरू ममा गड़ेका छन्‌, र तपाईंको हात ममाथि परेको छ।

³तपाईं क्रुद्ध हुनुभएकोले मेरो शरीर स्‍वस्‍थ छैन, मेरा पापले गर्दा मेरा हाड़हरू दुर्बल छन्‌।

⁴मेरा अधर्महरूमा म शिरसम्‍म डुबिसकेको छु, मैले बोक्‍न नसक्‍ने गरी ती बढ़ी गह्रौँ भएका छन्‌।

⁵मेरो पापमय मूर्खताले गर्दा, मेरा घाउहरू दुर्गन्‍धित भएका छन्‌ र सड़िसकेका छन्‌।

⁶म झुकेर धूलैमा लोटिसकेको छु, दिनभरि म विलाप गर्दै हिँड्‌छु।

⁷मेरो ढाड जलनले भरिएको छ, र मेरो शरीरमा कत्ति पनि तन्‍दुरुस्‍ती छैन।

⁸म बिलकुल दुर्बल भएको छु, र चकनाचूर पारिएको छु। मेरो हृदयको पीडाले गर्दा म कहालिउठ्‌छु।

⁹हे परमप्रभु, मेरा सबै अभिलाषाहरू तपाईंलाई विदितै छन्‌, र मेरो सुस्‍केरा तपाईंबाट लुकेको छैन।

¹⁰मेरो मुटु धड़कन्‍छ, मेरो बलले भियाउँदैन, मेरो आँखाको ज्‍योति पनि मबाट गइसकेको छ।

¹¹मेरा मित्र र सङ्गीहरू मेरा घाउहरूका कारणले मबाट अलग बस्‍छन्‌, र मेरा कुटुम्‍बहरू टाढ़ै उभिन्‍छन्‌।

¹²मेरो प्राण लिन खोज्‍नेहरूले मलाई पासो थाप्‍छन्‌, मेरो हानि खोज्‍नेहरूले मेरो विनाशका कुरा गर्छन्‌, र दिनभरि विश्‍वासघाती कल्‍पना रच्‍छन्‌।

¹³म त बहिरो मानिसझैँ भएको छु, जसले सुन्‍न सक्‍दैन। र मुखै उघार्न नसक्‍ने मानिसजस्‍तै म गूँगो भएको छु।

¹⁴सुन्‍दै नसुन्‍ने मानिसजस्‍तै म भएको छु, जसको मुखले जवाफै दिन सक्‍दैन।

¹⁵हे परमप्रभु, म तपाईंको प्रतीक्षा गर्छु, हे परमप्रभु मेरा परमेश्‍वर, तपाईंले जवाफ दिनुहुनेछ।

¹⁶किनकि मैले भनें, “तिनीहरूले मेरो उपहास गर्न नपाऊन्‌, मेरो गोडा चिप्‍लँदा तिनीहरूले घमण्‍ड गर्न नपाऊन्‌।”

¹⁷किनकि म त ढल्‍नै लागेको छु, र मेरो पीडा सधैँ मसँगै छ।

¹⁸म मेरो अधर्म स्‍वीकार गर्दछु, मेरो पापको निम्‍ति म दु:खित छु।

¹⁹धेरै मेरा शत्रुहरू छन्‌ जो शक्तिशाली छन्‌, विनाकारण मलाई घृणा गर्नेहरू धेरै छन्‌।

²⁰भलाइको साटो मलाई खराबी गर्नेहरूले, मचाहिँ भलाइको पछि लाग्‍दा मेरो निन्‍दा गर्छन्‌।

²¹हे परमप्रभु, मलाई नत्‍याग्‍नुहोस्‌। हे मेरा परमेश्‍वर, मबाट टाढ़ा नहुनुहोस्‌।

²²हे परमप्रभु मेरा उद्धारक, मलाई सहायता गर्न चाँड़ै आउनुहोस्‌।