Read Nepali New Revised Version, 2012 भजनसंग्रह 44 Bible Online

भजनसंग्रह 44 - Nepali New Revised Version, 2012 bible

भजनसंग्रह 44

¹सङ्गीत-निर्देशकको निम्‍ति कोरहवंशीको मस्‍किल [1] हे परमेश्‍वर, हामीले आफ्‍नै कानले सुनेका छौं, हाम्रा पिता-पुर्खाहरूले हामीलाई भनेका छन्‌, तपाईंले प्राचीनकालमा उनीहरूका समयमा कस्‍ता-कस्‍ता काम गर्नुभयो।

²तपाईंले आफ्‍नै बाहुलीले जातिहरूलाई धपाएर उनीहरूलाई बसाल्‍नुभयो। तपाईंले मानिसहरूलाई दमन गर्नुभयो, र हाम्रा पिता-पुर्खाहरूलाई वृद्धि गर्नुभयो।

³उनीहरूले तरवारको बलले देश जितेका होइनन्‌, न त उनीहरूको बाहुबलले उनीहरूले विजय हासिल गरेका हुन्‌। तपाईंकै दाहिने बाहुलीले, तपाईंकै पाखुराले र तपाईंका मुहारको प्रकाशले उनीहरू विजयी भएका थिए, किनभने तपाईंले उनीहरूलाई प्रेम गर्नुहुन्‍थ्‍यो।

⁴तपाईं मेरा राजा र परमेश्‍वर हुनुहुन्‍छ, जसले याकूबलाई विजय प्रदान गर्नुहुन्‍छ।

⁵तपाईंद्वारै हामी आफ्‍ना विरोधीहरूलाई पछाडि धपाउँछौं। हाम्रा विरुद्धमा उठ्‌नेहरूलाई हामी तपाईंकै नाउँले कुल्‍चदँछौं।

⁶आफ्‍नो धनुमा म भरोसा गर्दिनँ, मेरो तरवारले मलाई विजय दिँदैन।

⁷तर तपाईंले हामीलाई हाम्रा शत्रुहरूमाथि विजय दिनुहुन्‍छ, र हाम्रा विरोधीहरूलाई शर्ममा पार्नुहुन्‍छ।

⁸परमेश्‍वरमा नै हामी निरन्‍तर गर्व गर्छौं र सदा तपाईंकै नाउँको प्रशंसा गर्नेछौं। सेला

⁹तर अब तपाईंले हामीलाई त्‍यागेर हामीलाई दीन तुल्‍याउनुभएको छ, र तपाईं हाम्रा सेनाहरूलाई साथ दिनुहुन्‍न।

¹⁰तपाईंले हामीलाई शत्रुहरूबाट पछि हट्‌ने तुल्‍याउनुभएको छ, र हाम्रा विरोधीहरूले हामीलाई लुटेका छन्‌।

¹¹तपाईंले अरूको आहार हुन भेड़ाहरूजस्‍तै हामीलाई त्‍यागिदिनुभएको छ, र जाति-जातिहरूका बीचमा हामीलाई तितरबितर पार्नुभएको छ।

¹²तपाईंले आफ्‍नो प्रजालाई नाम मात्रको मूल्‍यमा बेच्‍नुभएको छ, र तिनीहरूको बिक्रीबाट तपाईंलाई कुनै लाभ भएको छैन।

¹³हाम्रा छिमेकीहरूका सामुन्‍ने तपाईंले हामीलाई निन्‍दाको पात्र बनाउनुभयो, हाम्रा वरिपरिका मानिसहरूका बीचमा हामीलाई तिरस्‍कार र उपहासको पात्र बनाउनुभएको छ।

¹⁴जातिहरूका बीचमा तपाईंले हामीलाई हाँसोको नमूना हुन दिनुभएको छ, मानिसहरूले हामीलाई देखेर मुन्‍टो हल्‍लाउँछन्‌।

¹⁵मेरो अपमान दिनभरि मेरो सामुन्‍ने रहन्‍छ, र मेरो मोहड़ा शर्मले ढाकिएको छ।

¹⁶गिल्‍ला गर्ने र खिसी गर्नेहरूका वचनहरूले र प्रतिशोध गर्ने शत्रुहरूका कारणले मलाई यस्‍तो भएको छ।

¹⁷हामीले तपाईंलाई नबिर्से पनि, र तपाईंको करारप्रति झूटा नभए तापनि यी सबै हामीमाथि परिआएका छन्‌।

¹⁸हाम्रा हृदय तपाईंबाट विमुख भएका छैनन्‌, तपाईंको मार्गबाट हाम्रा पाइलाहरू चुकेका छैनन्‌।

¹⁹तर तपाईंले हामीलाई चूर पारेर स्‍याल बस्‍ने पाखातुल्‍य बनाउनुभयो, र हामीलाई घोर अन्‍धकारले ढाक्‍नुभयो।

²⁰यदि हामीले हाम्रा परमेश्‍वरको नाउँ बिर्सेका भएदेखि वा अन्‍य देवदेवतातिर हाम्रा हात पसारेका भएदेखि,

²¹के परमेश्‍वरले यो थाहा पाउनुहुनेथिएन र? किनकि उहाँले हृदयका गुप्‍त कुरा जान्‍नुहुन्‍छ।

²²तापनि तपाईंको खातिर हामी दिनभरि मारिन्‍छौं, काटिने भेड़ाहरूजस्‍तै हामीहरू गनिएका छौं।

²³उठ्‌नुहोस्‌ परमप्रभु, तपाईं किन सुत्‍नुहुन्‍छ? जाग्‍नुहोस्‌, हामीलाई सदाको निम्‍ति नत्‍याग्‍नुहोस्‌।

²⁴तपाईं किन आफ्‍नो मुहार लुकाउनुहुन्‍छ, र हाम्रा दु:ख र हामीमाथिको थिचोमिचो बिर्सनुहुन्‍छ?

²⁵हामी त धूलोमै मिलिसकेका छौं, हाम्रा शरीर माटोमै टाँसिसकेका छन्‌।

²⁶उठ्‌नुहोस्‌, हामीलाई गुहार गर्नुहोस्‌, तपाईंको कहिले नटुङ्गिने प्रेमको कारण हाम्रो उद्धार गरिदिनुहोस्‌।