Read Nepali New Revised Version, 2012 भजनसंग्रह 45 Bible Online

भजनसंग्रह 45 - Nepali New Revised Version, 2012 bible

भजनसंग्रह 45

¹सङ्गीत-निर्देशकको निम्‍ति कोरहवंशीको मस्‍किल, “लिली फूल” को रागअनुसार विवाह-गीत [1] उत्तम विषयले मेरो हृदय उत्तेजित भएको छ, जसै म राजाको निम्‍ति गीत गाउँदछु। मेरो जिब्रो सिपालु लेखकको कलम बनेको छ।

²तपाईं पुरुषहरूमध्‍ये सर्वश्रेष्‍ठ हुनुहुन्‍छ, तपाईंका ओठ अनुग्रहले अभिषेक भएका छन्‌, किनकि परमेश्‍वरले तपाईंलाई सदाकालको निम्‍ति आशिष्‌ दिनुभएको छ।

³हे परमशक्तिशाली, आफ्‍नो कमरमा आफ्‍नो तरवार भिर्नुहोस्‌, अनि प्रताप र गौरव धारण गर्नुहोस्‌।

⁴आफ्‍नो गौरवमा विजयसाथ, सत्‍यता, नम्रता र धार्मिकताको पक्षमा तपाईंको सवारी होस्‌। तपाईंको दाहिने बाहुलीले चमत्‍कारका कार्य प्रदर्शन गरोस्‌।

⁵तपाईंका तीक्ष्ण बाणहरूले राजाका शत्रुहरूका मुटु छेडून्‌। जाति-जातिहरू तपाईंका चरणमा झुकून्‌।

⁶हे परमेश्‍वर, तपाईंको सिंहासन सदासर्वदाको निम्‍ति रहिरहन्‍छ, र न्‍यायको राजदण्‍ड तपाईंका राज्‍यको राजदण्‍ड हुनेछ।

⁷तपाईं धार्मिकतालाई प्रेम गर्नुहुन्‍छ, र अधर्मलाई घृणा गर्नुहुन्‍छ। यसकारण परमेश्‍वर, तपाईंका परमेश्‍वरले तपाईंलाई आफ्‍ना साथीहरूभन्‍दा बढ्‌ता गरेर हर्षको तेलले तपाईंलाई अभिषेक गर्नुभएको छ।

⁸तपाईंका सबै पोशाकहरू मूर्र, एलवा र तेजपातको बास्‍नाले सुगन्‍धित छन्‌। हस्‍ती हाड़ले सुसज्‍जित महलबाट तारको सुरिलो सङ्गीतले तपाईंलाई प्रसन्‍न तुल्‍याउँछ।

⁹राजकन्‍याहरू तपाईंका आदरणीय महिलाहरूमध्‍येका हुन्‌, तपाईंको दाहिनेपट्टि ओपीरको सुनका गहना पहिरेकी राजसी दुलही छिन्‌।

¹⁰ध्‍यान देऊ, हे राजकन्‍या, र कान थापेर सुन, तिम्रा आफन्‍तहरू र तिम्रा पिताको घरलाई बिर्स।

¹¹तिम्रो सौन्‍दर्यमा राजा मोहित हुनुभएको छ। उहाँलाई सम्‍मान देऊ, किनकि उहाँ तिम्रा स्‍वामी हुनुहुन्‍छ।

¹²टुरोसकी राजकन्‍या उपहार लिएर आउनेछिन्‌, धनाढ्य मानिसहरूले तिम्रो निगाह खोज्‍नेछन्‌।

¹³आफ्‍नो खोपीमा राजकुमारी ऐश्‍वर्यमयी छिन्‌। तिनको वस्‍त्रमा सुन जड़िएको छ।

¹⁴बुट्टा भरिएका पोशाकमा तिनी राजाकहाँ पुर्‍याइन्‍छिन्‌। तिनका कुमारी सहेलीहरू तिनलाई पछ्याउँछन्‌, र तपाईंकहाँ ल्‍याइन्‍छिन्‌।

¹⁵खुशी र आनन्‍दसित तिनीहरू भित्र लगिन्‍छन्‌। तिनीहरू राजाको महलभित्र प्रवेश गर्छन्‌।

¹⁶तपाईंका पिताको स्‍थान तपाईंका पुत्रहरूले लिनेछन्‌। तपाईंले तिनीहरूलाई सारा देशमा राजकुमारहरू बनाउनुहुनेछ।

¹⁷तपाईंको स्‍मृति पुस्‍ता-पुस्‍तासम्‍म म कायम राखिदिनेछु, यसकारण जाति-जातिहरूले सदासर्वदा तपाईंको प्रशंसा गर्नेछन्‌।