Read Nepali New Revised Version, 2012 भजनसंग्रह 49 Bible Online

भजनसंग्रह 49 - Nepali New Revised Version, 2012 bible

भजनसंग्रह 49

¹सङ्गीत-निर्देशकको निम्‍ति कोरहवंशीको भजन [1] हे सबै मानिसहरू हो, सुन, संसारका सबै निवासीहरू हो, सुन,

²उच्‍च र नीच, धनी र गरीब सबै ध्‍यान देओ:

³मेरो मुखले बुद्धिका कुरा बोल्‍नेछ, मेरो मनले बोलेका कुराले समझदारी प्रदान गर्नेछ।

⁴म एउटा हितोपदेशमा ध्‍यान दिनेछु, वीणा बजाएर म आफ्‍नो अड्‌को फुकाउनेछु।

⁵दु:खका दिन आउँदा, अनि खेदो गर्नेहरूको दुष्‍टताले मलाई घेर्दा म किन डराउने?

⁶तिनीहरू आफ्‍नो सम्‍पत्तिमाथि भरोसा राख्‍छन्‌, र आफ्‍नो ठूलो धनराशिको अहङ्कार गर्छन्‌,

⁷कुनै मानिसले मोल तिरेर अर्कालाई कदापि छुटाउन सक्‍दैन, वा परमेश्‍वरलाई उसको जीवनको मोल त्‍यसले दिन सक्‍दैन।

⁸जीवनको मोल बहुमूल्‍य हुन्‍छ, कुनै भुक्तानी कहिल्‍यै यथेष्‍ट हुँदैन।

⁹यस्‍तो कोही छैन जो सधैँ बाँचिरहन्‍छ, र कहिल्‍यै कुहुनुपर्दैन।

¹⁰किनकि सबैले देख्‍न सक्‍छन्‌ कि बुद्धिमान्‌ मानिस पनि मर्दारहेछन्‌, मूर्ख र विवेकहीन मानिसहरू पनि नष्‍ट हुन्‍छन्‌, र तिनीहरूले आफ्‍ना धन-सम्‍पत्ति अरूहरूका लागि छोड्‌छन्‌।

¹¹तिनीहरूका चिहान सदाकाल तिनीहरूका घर हुन्‍छन्‌, पुस्‍तौँसम्‍म ती तिनीहरूका वासस्‍थान हुनेछन्‌, यद्यपि तिनीहरूले आफ्‍नै नाउँमा जमिनको नाउँ राखेका थिए।

¹²तर मानिस आफूसँग धन-सम्‍पत्ति भए पनि टिकिरहन सक्‍दैन, त्‍यो त नष्‍ट हुने पशुतुल्‍य छ।

¹³आफूमाथि भर पर्नेहरूको गति यस्‍तै हुन्‍छ, र तिनीहरूका कुरालाई समर्थन गरेर तिनीहरूका पछि लाग्‍नेहरूको गति पनि यस्‍तै हुन्‍छ। सेला

¹⁴तिनीहरूको अन्‍त्‍य भेड़ाको जस्‍तै चिहानमा हुन्‍छ, मृत्‍युले तिनीहरूलाई निल्‍नेछ। बिहानै सोझाहरूले तिनीहरूमाथि शासन गर्नेछन्‌, तिनीहरूका राजकीय महलदेखि टाढ़ामा तिनीहरूका देह चिहानमा कुहेर जानेछन्‌।

¹⁵तर परमेश्‍वरले मोल तिरेर मेरो प्राणलाई चिहानबाट छुटाउनुहुनेछ, उहाँले मलाई निश्‍चय नै ग्रहण गर्नुहुनेछ। सेला

¹⁶कोही धनी भयो र त्‍यसको घरको गौरव बढ़्यो भने तिमीहरू नडराओ।

¹⁷किनकि त्‍यो मर्दा त्‍यसले आफूसँग केही पनि लैजानेछैन, त्‍यसको गौरव त्‍यसको पछिपछि जानेछैन।

¹⁸त्‍यो बाँचुञ्‍जेल आफूलाई त्‍यसले धन्‍यको ठान्‍यो— कारण मानिसहरूले कोही मानिसको उन्‍नति हुँदा त्‍यसको प्रशंसा गर्छन्‌—

¹⁹तापनि त्‍यो आफ्‍नो पिता-पुर्खाको पुस्‍तामा मिल्‍न जानेछ, जसले फेरि कहिल्‍यै जीवनको ज्‍योति देख्‍नेछैनन्‌।

²⁰समझशक्ति नभएको धनी मानिस नष्‍ट हुने पशुतुल्‍य हो।