Read Nepali New Revised Version, 2012 भजनसंग्रह 60 Bible Online

भजनसंग्रह 60 - Nepali New Revised Version, 2012 bible

भजनसंग्रह 60

¹सङ्गीत-निर्देशकको निम्‍ति दाऊदको मिक्‍ताम [1] हे परमेश्‍वर, तपाईंले हामीलाई त्‍याग्‍नुभएको छ, अनि तपाईं हामीमाथि पड्‍‌किनु भएको छ। तपाईं हामीमाथि क्रुद्ध हुनुभएको छ— अब हामीलाई पुनर्स्‍थापित गर्नुहोस्‌।

²तपाईंले धरतीलाई थर्काउनुभएको छ, र त्‍यसलाई फारिदिनुभएको छ। त्‍यसका धाँदाहरू पुरिदिनुहोस्‌, किनकि त्‍यो हल्‍लिँदैछ।

³तपाईंले आफ्‍नो प्रजालाई कठिन कुराहरू भोग्‍न लाउनुभएको छ, तपाईंले हामीलाई धरमराउने मद्य दिनुभएको छ।

⁴तर धनुको विरुद्ध फहराउनलाई तपाईंको भय मान्‍नेहरूका लागि तपाईंले एउटा झन्‍डा खड़ा गर्नुभएको छ। सेला

⁵तपाईंको दाहिने बाहुलीले हामीलाई बचाउनुहोस्‌ र मदत गर्नुहोस्‌, र तपाईंले प्रेम गर्नुभएकाहरूले छुटकारा पाऊन्‌।

⁶परमेश्‍वरले आफ्‍नो पवित्रस्‍थानबाट भन्‍नुभएको छ, “विजयमा शकेमलाई विभाजन गर्नेछु, र सुक्‍कोतको बेँसी नापेर छुट्ट्याउनेछु।

⁷गिलाद मेरो हो, र मनश्‍शे पनि मेरै हो। एफ्राइम मेरो टोप हो, यहूदा मेरो राजदण्‍ड हो।

⁸मोआब मेरो पानीको बाटा हो, एदोममाथि म आफ्‍नो जुत्ता फाल्‍छु, पलिश्‍तमाथि म विजयसाथ कराउँछु।”

⁹कसले मलाई किल्‍ला भएको सहरमा पुर्‍याइदेला? एदोमसम्‍म मलाई कसले डोर्‍याउला?

¹⁰हे परमेश्‍वर, तपाईं नै होइन, जसले हामीलाई त्‍याग्‍नुभएको छ, र अब हाम्रा सेनाहरूका साथमा जानुहुन्‍न?

¹¹शत्रुहरूका विरुद्धमा हामीलाई सहायता गर्नुहोस्‌, किनकि मानिसको सहायता त व्‍यर्थको हुन्‍छ।

¹²परमेश्‍वरद्वारा हामी विजय प्राप्‍त गर्नेछौं, र उहाँले हाम्रा शत्रुहरूलाई कुल्‍चनुहुनेछ।