Read Nepali New Revised Version, 2012 भजनसंग्रह 65 Bible Online

भजनसंग्रह 65 - Nepali New Revised Version, 2012 bible

भजनसंग्रह 65

¹सङ्गीत-निर्देशकको निम्‍ति दाऊदको भजन [1] हे परमेश्‍वर, सियोनमा तपाईंलाई प्रशंसाले पर्खिरहेछ, र तपाईंको लागि हाम्रा सबै भाकल पूरा हुनेछन्‌।

²हे प्रार्थना सुन्‍नुहुने, तपाईंकहाँ नै सबै मानिसहरू आउनेछन्‌।

³जब हाम्रा पापहरूले हामीलाई डुबाएका थिए, हाम्रा अपराधहरू तपाईंले क्षमा गरिदिनुभयो।

⁴धन्‍य हुन्‌ तिनीहरू, जसलाई तपाईं छान्‍नुहुन्‍छ, र तपाईंको मन्‍दिरमा रहनलाई नजिक ल्‍याउनुहुन्‍छ। तपाईंको घर, तपाईंको पवित्र मन्‍दिरका उत्तम-उत्तम पदार्थले हामी तृप्‍त भएका छौं।

⁵धार्मिकताका महान्‌ कामहरूबाट तपाईंले हामीलाई जवाफ दिनुहुन्‍छ, हे परमेश्‍वर हाम्रा उद्धारक। पृथ्‍वीका समस्‍त सीमान्‍त र टाढ़ा-टाढ़ाका समुद्रहरूको आशा तपाईं नै हुनुहुन्‍छ,

⁶जसले आफ्‍नो शक्तिद्वारा पहाड़हरू निर्माण गर्नुभयो। तपाईंले आफूलाई शक्तिले सुसज्‍जित पार्नुभएको छ,

⁷जसले समुद्रको गर्जन र तिनका छालहरूको गर्जन र जातिहरूको होहल्‍ला शान्‍त गर्नुभएको छ।

⁸पृथ्‍वीको पल्‍लो सिमानामा बस्‍नेहरू तपाईंका चिन्‍हहरू देखेर भयभीत हुन्‍छन्‌। जहाँ प्रभात आउँछ र सन्‍ध्‍या बिलाउँछ, तपाईं हर्षका गीतलाई निम्‍त्‍याउनुहुन्‍छ।

⁹तपाईं धरतीको वास्‍ता गर्नुहुन्‍छ र त्‍यसलाई सिँच्‍नुहुन्‍छ, तपाईं त्‍यसलाई ज्‍यादै उब्‍जनी दिने तुल्‍याउनुहुन्‍छ। मानिसहरूलाई अन्‍न जुटाइदिन परमेश्‍वरका नदीहरू पानीले भरिएका हुन्‍छन्‌, किनकि तपाईंले त्‍यस्‍तै निर्दिष्‍ट गर्नुभएको छ।

¹⁰तपाईं त्‍यसका हलरेखा प्रशस्‍तसँग पानीले भिजाउनुहुन्‍छ, त्‍यसका डीलहरू सम्‍म पार्नुहुन्‍छ, झरीले त्‍यसलाई नरम तुल्‍याउनुहुन्‍छ, र तपाईंले त्‍यसका उब्‍जनीलाई आशिष्‌ दिनुहुन्‍छ।

¹¹आफ्‍नो प्रशस्‍तताले वर्षलाई तपाईंले मुकुट पहिराउनुहुन्‍छ, तपाईंका गाडाहरू प्रचुरताले भरिएर पोखिन्‍छन्‌।

¹²उजाड-स्‍थानका खर्कहरू लहलह छन्‌, र पहाड़हरू हर्षले सुसज्‍जित छन्‌।

¹³खर्कहरू भेड़ाबाख्राले भरिएका छन्‌, बेँसीहरू अन्‍नले ढाकिएका छन्‌, तिनीहरू आनन्‍दले एकसाथ मिलेर भजन गाउँछन्‌।