Read Nepali New Revised Version, 2012 भजनसंग्रह 7 Bible Online

भजनसंग्रह 7 - Nepali New Revised Version, 2012 bible

भजनसंग्रह 7

¹बेन्‍यामीनी कूशको विषयमा दाऊदले परमप्रभुको सामुन्‍ने गाएको शिग्‍गायोन नामक भजन [1] हे परमप्रभु मेरा परमेश्‍वर, तपाईंमा नै म शरण पर्छु। मेरो खेदो गर्नेहरू सबैबाट मलाई बचाउनुहोस्‌ र छुटाउनुहोस्‌,

²नत्रता सिंहले झैँ तिनीहरूले मलाई फहराउनेछन्‌, र मलाई छुटाउने कोही नहुँदा तिनीहरूले मलाई टुक्रा-टुक्रा पार्नेछन्‌।

³हे परमप्रभु मेरा परमेश्‍वर, यदि मेरा हातबाट केही अधर्म भएको छ भने—

⁴यदि आफ्‍नो मित्रलाई मैले खराबी गरेको छु भने, र विनाकारण मेरा विरोधीलाई लुटेको छु भने, यदि मैले यसो गरेको भए,

⁵मेरो शत्रुले मलाई खेदेर भेट्टाओस्‌, र त्‍यसले मेरो शरीर भूइँमा कुल्‍चीमिल्‍ची पारोस्‌, र मेरो प्राण धूलोमा मिलाइदेओस्‌।

⁶हे परमप्रभु, आफ्‍नो कोपमा उठ्‌नुहोस्‌, र मेरा शत्रुहरूका प्रकोपको विरुद्ध तपाईं आफै खड़ा हुनुहोस्‌। हे मेरा परमेश्‍वर, जाग्‍नुहोस्‌, र न्‍यायको आदेश दिनुहोस्‌।

⁷जाति-जातिहरू तपाईंको वरिपरि एकत्र होऊन्‌, र तिनीहरूमाथि उच्‍च स्‍थानबाट राज गर्नुहोस्‌।

⁸परमप्रभुले सबै जातिहरूको न्‍याय गरून्‌। हे परमप्रभु, मेरो धार्मिकताअनुसार र मेरो निर्दोषताअनुसार मेरो न्‍याय गर्नुहोस्‌, हे सर्वोच्‍च परमेश्‍वर।

⁹हे धार्मिक परमेश्‍वर, जसले मन र हृदयको जाँच गर्नुहुन्‍छ, दुष्‍टहरूको उपद्रव समाप्‍त गर्नुहोस्‌, तर धर्मीहरूलाई स्‍थिर गराउनुहोस्‌।

¹⁰मेरो ढाल सर्वोच्‍च परमेश्‍वर हुनुहुन्‍छ, जसले सोझो हृदय भएका मानिसहरूलाई बचाउनुहुन्‍छ।

¹¹परमेश्‍वर निष्‍पक्ष न्‍यायाधीश हुनुहुन्‍छ, जुन परमेश्‍वरले प्रतिदिन आफ्‍नो क्रोध व्‍यक्त गर्नुहुन्‍छ।

¹²यदि मानिसले पश्‍चात्ताप गरेन भनेता, उहाँले आफ्‍नो तरवारमा शान लाउनुहुनेछ। उहाँले आफ्‍नो धनुमा ताँदो चढ़ाउनुहुनेछ।

¹³उहाँले आफ्‍ना घातक शस्‍त्रहरू तयार पार्नुभएको छ। उहाँले आफ्‍ना काँड़हरूलाई अग्‍निबाण तुल्‍याउनुहुन्‍छ।

¹⁴जसको कल्‍पना दुष्‍टताले पूर्ण छ, र उपद्र्याइँ सोच्‍दछ, त्‍यसले भ्रमलाई जन्‍म दिन्‍छ।

¹⁵जसले खनेर एउटा खाल्‍डो बनाउँछ, त्‍यसले खनेको खाल्‍डोभित्र त्‍यो आफै जाकिन्‍छ।

¹⁶त्‍यसको उपद्र्याइँ त्‍यसको आफ्‍नै टाउकोमा खनिन्‍छ, त्‍यसको अत्‍याचार त्‍यसकै थाप्‍लोमाथि ओइरिन्‍छ।

¹⁷परमप्रभुका धार्मिकताको कारण म उहाँमा धन्‍यवाद चढ़ाउनेछु, र सर्वोच्‍च परमप्रभुको स्‍तुति म गाउनेछु।