Read Nepali New Revised Version, 2012 भजनसंग्रह 72 Bible Online

भजनसंग्रह 72 - Nepali New Revised Version, 2012 bible

भजनसंग्रह 72

¹सोलोमनको भजन [1] हे परमेश्‍वर, राजालाई तपाईंको न्‍यायले युक्त पार्नुहोस्‌, र राजपुत्रलाई तपाईंको धार्मिकताले।

²उनले तपाईंको प्रजालाई धार्मिकतासाथ न्‍याय गर्नेछन्‌, तपाईंका पीडित जनहरूलाई न्‍यायसाथ इन्‍साफ गर्नेछन्‌।

³डाँड़ाहरूले मानिसहरूका निम्‍ति समृद्धि ल्‍याउनेछन्‌, र पहाड़हरूले धार्मिकताको फल ल्‍याउनेछन्‌।

⁴उनले मानिसहरूमध्‍येका पीडितलाई रक्षा गर्नेछन्‌, र दरिद्रका छोराछोरीहरूलाई बचाउनेछन्‌, उनले अत्‍याचारीलाई दमन गर्नेछन्‌।

⁵घाम र जून रहुञ्‍जेल सारा पुस्‍ताभरि उनी बाँचिरहनेछन्‌।

⁶उनी काटिएको चउरमा परेको वर्षाझैँ हुनेछन्‌, पृथ्‍वीलाई सिँचाइ गर्ने झरीझैँ।

⁷उनको राज्‍यकालमा धर्मीहरूको फलिफाप हुनेछ, र जून रहुञ्‍जेल उन्‍नति प्रशस्‍त हुनेछ।

⁸उनले एउटा समुद्रदेखि अर्को समुद्रसम्‍म, र यूफ्रेटिस नदीदेखि पृथ्‍वीको सीमान्‍तसम्‍मै राज्‍य गर्नेछन्‌।

⁹मरुभूमिका जातिहरू उनको सामने झुक्‍नेछन्‌, र उनका शत्रुहरूले धूलो चाट्‌नेछन्‌।

¹⁰तर्शीश र टाढ़ाका सामुद्रिक किनारका राजाहरूले उनीकहाँ कर ल्‍याउनेछन्‌, शेबा र सेबाका राजाहरूले उनलाई भेटी चढ़ाउनेछन्‌।

¹¹सबै राजाहरू उनको अगाडि घोप्‍टो पर्नेछन्‌, र सबै जातिहरूले उनको सेवा गर्नेछन्‌।

¹²किनकि दरिद्रहरूलाई, जसले पुकारा गर्छन्‌, र सहायता नपाएका गरीबहरूलाई उनले उद्धार गर्नेछन्‌।

¹³कमजोर र दरिद्रलाई उनले टिठ्याउनेछन्‌, र दरिद्रहरूको प्राण बचाउनेछन्‌।

¹⁴अत्‍याचार र हिंसाबाट उनले तिनीहरूको प्राण मोल तिरेर छुटाउनेछन्‌, किनकि उनको दृष्‍टिमा तिनीहरूको रगत बहुमूल्‍य छ।

¹⁵उनी दीर्घायु होऊन्‌, शेबाको सुन उनलाई भेटीस्‍वरूप दिइओस्‌। उनको निम्‍ति मानिसहरू निरन्‍तर प्रार्थना गरून्‌, दिनभरि तिनीहरूले उनलाई धन्‍यका भनून्‌।

¹⁶देशभरि अन्‍न भरिपूर्ण होस्‌, डाँड़ाका टाकुराहरूमा त्‍यो लहलह होस्‌। त्‍यसको फल लेबनानझैँ फस्‍टाओस्‌, त्‍यो जमिनको घाँसझैँ मौलाओस्‌।

¹⁷उनको नाउँ सदा रहिरहोस्‌, उनको कीर्ति सूर्यझैँ निरन्‍तर रहोस्‌। सबै जाति-जातिहरूले उनीद्वारा आशिष्‌ पाउनेछन्‌, र तिनीहरूले उनलाई धन्‍यका भन्‍नेछन्‌।

¹⁸परमप्रभु परमेश्‍वर, इस्राएलका परमेश्‍वरको प्रशंसा होस्‌, उहाँले मात्र उदेकका काम गर्नुहुन्‍छ।

¹⁹उहाँको महिमामय नाउँको सदासर्वदै प्रशंसा होस्‌, सारा पृथ्‍वी उहाँको महिमाले भरपूर होस्‌। आमेन अनि आमेन।

²⁰यिशैका छोरा दाऊदका प्रार्थनाहरू यहाँ समाप्‍त हुन्‍छन्‌।