Read Nepali New Revised Version, 2012 भजनसंग्रह 79 Bible Online

भजनसंग्रह 79 - Nepali New Revised Version, 2012 bible

भजनसंग्रह 79

¹आसापको भजन [1] हे परमेश्‍वर, जाति-जातिहरूले तपाईंको उत्तराधिकारलाई आक्रमण गरेका छन्‌। तपाईंको पवित्र मन्‍दिरलाई तिनीहरूले बिटुलो पारेका छन्‌। तिनीहरूले यरूशलेमलाई संहार पारिदिएका छन्‌।

²तपाईंका दासहरूका शव तिनीहरूले आकाशका पक्षीहरूलाई आहारको निम्‍ति दिएका छन्‌, तपाईंका पवित्र जनहरूका मासु जङ्गली जनावरहरूलाई दिएका छन्‌।

³तिनीहरूले उनीहरूको रगत पानीजस्‍तै यरूशलेमको चारैतिर बगाएका छन्‌, र उनीहरूलाई गाड्‌ने कोही छैनन्‌।

⁴हाम्रा छिमेकीहरूका निम्‍ति हामी निन्‍दाका पात्र हौं। अनि हाम्रा वरिपरि बस्‍नेहरूका हामी उपहासका र गिल्‍लाका पात्र हौं।

⁵कहिलेसम्‍म, हे परमेश्‍वर? के तपाईं हामीहरूसँग सधैँभरि क्रोधित भइरहनुहुन्‍छ? तपाईंको डाह आगोझैँ कतिसम्‍म दन्‍की नै रहनेछ?

⁶ती जातिहरू जसले तपाईंलाई स्‍वीकार गर्दैनन्‌, ती राज्‍यहरू जसले तपाईंलाई पुकार्दैनन्‌, तिनीहरूमाथि तपाईंको क्रोध खन्‍याउनुहोस्‌।

⁷किनभने तिनीहरूले याकूबलाई निलेका छन्‌, अनि तिनको वासस्‍थान उजाड पारेका छन्‌।

⁸हाम्रा पुर्खाहरूका पापको लेखा हामीहरूसँग नलिनुहोस्‌, तपाईंको कृपा हामीलाई चाँड़ै उपलब्‍ध होस्‌, किनकि हामी साह्रै खाँचोमा छौं।

⁹हामीलाई उद्धार गर्ने हे परमेश्‍वर, तपाईंका नाउँको महिमाको निम्‍ति हामीलाई सहायता दिनुहोस्‌। आफ्‍ना नाउँको खातिर हामीलाई छुटाउनुहोस्‌, र हाम्रा पाप क्षमा गर्नुहोस्‌।

¹⁰“तिनीहरूका परमेश्‍वर कहाँ छन्‌?” भनी जातिहरूले किन भनून्‌? हाम्रै आँखाको अगि तपाईंका दासहरूको बगाएका रगतको बदला तपाईं लिनुहुन्‍छ भन्‍ने जाति-जातिहरूलाई थाहा होस्‌।

¹¹कैदीहरूको करुण-क्रन्‍दन तपाईंको सामु पुगोस्‌, तपाईंको बाहुलीको शक्तिद्वारा मृत्‍युदण्‍ड परेकाहरूको रक्षा गर्नुहोस्‌।

¹²हे परमप्रभु, जुन गिल्‍लाले तिनीहरूले तपाईंलाई अपमान गरेका छन्‌, त्‍यसका सात गुणा साटो हाम्रा छिमेकीहरूलाई फर्काइदिनुहोस्‌।

¹³तब हामी, जो तपाईंको प्रजा र तपाईंको खर्कका भेड़ाहरू हौं, तपाईंको सदासर्वदा प्रशंसा गर्नेछौं, हामी पुस्‍तौँ-पुस्‍तौँसम्‍म तपाईंका प्रशंसाको वर्णन गर्नेछौं।