Read Nepali New Revised Version, 2012 भजनसंग्रह 84 Bible Online

भजनसंग्रह 84 - Nepali New Revised Version, 2012 bible

भजनसंग्रह 84

¹सङ्गीत-निर्देशकको निम्‍ति गित्तितअनुसार कोरहवंशीको भजन [1] हे सर्वशक्तिमान्‌ परमप्रभु, तपाईंको वासस्‍थान कति मनोहर छ।

²परमप्रभुका मन्‍दिरको निम्‍ति मेरो प्राण इच्‍छुक छ, र मूर्च्‍छै पनि पर्छ। मेरो हृदय र मेरो शरीर दुवैले जीवित परमेश्‍वरको पुकारा गर्दछ।

³हे सर्वशक्तिमान्‌ परमप्रभु, मेरा राजा अनि मेरा परमेश्‍वर, तपाईंका वेदीको नजिक भँगेरीले पनि बसेरा पाउँछे, अनि गौँथलीले गुँड़ बनाउँछे, जहाँ आफ्‍ना बचेरोहरूलाई राख्‍छे।

⁴तपाईंको वासस्‍थानमा बस्‍ने धन्‍यका हुन्‌, तिनीहरू सदैव तपाईंको प्रशंसा गर्छन्‌। सेला

⁵तिनीहरू धन्‍यका हुन्‌, जसको बल तपाईंमा छ, जसले आफ्‍ना हृदयमा सियोन जाने निधो गरेका छन्‌।

⁶तिनीहरू बाकाको बेँसी भएर जाँदा, तिनीहरूले त्‍यसलाई जलस्रोत बनाउँछन्‌, शरद्‌ ऋतुको वर्षाले त्‍यहाँ तलाउहरू बन्‍दछन्‌।

⁷तिनीहरूले बलमाथि बल प्राप्‍त गर्छन्‌, जबसम्‍म प्रत्‍येक सियोनमा परमेश्‍वरको सामुन्‍ने उपस्‍थित हुनेछैन।

⁸हे परमप्रभु सर्वशक्तिमान्‌ परमेश्‍वर, मेरो प्रार्थना सुन्‍नुहोस्‌। हे याकूबका परमेश्‍वर, मेरो कुरा सुन्‍नुहोस्‌। सेला

⁹हे परमेश्‍वर, हाम्रो ढाल हेर्नुहोस्‌, र आफ्‍ना अभिषिक्तमाथि निगाह राख्‍नुहोस्‌।

¹⁰तपाईंको मन्‍दिरभित्रको एक दिन अरू ठाउँका हजार दिनभन्‍दा उत्तम छ। दुष्‍टहरूका पालमा बस्‍नुभन्‍दा बरु मेरा परमेश्‍वरका भवनको ढोके हुनलाई मलाई मन पर्छ।

¹¹किनकि परमप्रभु परमेश्‍वर सूर्य र ढाल हुनुहुन्‍छ, परमप्रभुले निगाह र इज्‍जत प्रदान गर्नुहुन्‍छ। सत्‍य मार्गमा हिँड्‌नेहरूलाई परमप्रभुले कुनै भलो थोकबाट वञ्‍चित राख्‍नुहुन्‍न।

¹²हे सर्वशक्तिमान्‌ परमप्रभु, तपाईंमा भरोसा राख्‍ने मानिस धन्‍यको हो।