Read Nepali New Revised Version, 2012 भजनसंग्रह 90 Bible Online

भजनसंग्रह 90 - Nepali New Revised Version, 2012 bible

भजनसंग्रह 90

¹प्रभुभक्त मोशाको प्रार्थना [1] हे परमप्रभु, पुस्‍तादेखि पुस्‍तासम्‍म तपाईं हाम्रो वासस्‍थान हुनुभएको छ।

²पहाड़हरू उत्‍पन्‍न हुनुभन्‍दा अघि, अथवा तपाईंले पृथ्‍वी र संसार सृजनुभन्‍दा अघि, अनादिदेखि अनन्‍तसम्‍म तपाईं नै परमेश्‍वर हुनुहुन्‍छ।

³तपाईं मानिसलाई धूलोमा फर्काउनुहुन्‍छ, र भन्‍नुहुन्‍छ, “ए मानिसका सन्‍तान हो, धूलोमा फर्किजाओ।”

⁴किनकि तपाईंको दृष्‍टिमा एक हजार वर्ष हिजो बिताएको एक दिनजस्‍ता मात्र छन्‌, अथवा रातको एक पहरजस्‍तै।

⁵तपाईंले मानिसहरूलाई मृत्‍युको निद्रामा बगाइलानुहुन्‍छ। तिनीहरू बिहान पलाउने घाँसजस्‍तै छन्‌।

⁶यद्यपि त्‍यो बिहान मौलाउँछ, बेलुकी त्‍यो सुक्‍छ र ओइलिन्‍छ।

⁷हामी तपाईंको क्रोधमा भस्‍म भएका छौं, र तपाईंको आक्रोशमा हामी आतङ्कित हुन्‍छौं।

⁸तपाईंले हाम्रा अधर्म आफ्‍नै सामुन्‍ने राख्‍नुभएको छ, हाम्रा गुप्‍त पापहरू तपाईंका उपस्‍थितिको प्रकाशमा छन्‌।

⁹हाम्रा सारा दिन तपाईंको क्रोधमा बित्‍दछन्‌, सुस्‍केरामा हामी आफ्‍ना वर्षहरू बिताउँदछौं।

¹⁰हाम्रो आयु त सत्तरी वर्ष मात्र हो, बलले भ्‍यायो भने, असी पुग्‍ला। तापनि तिनीहरूको अवधि कष्‍ट र शोकमा बित्‍छ, किनकि आयुचाहिँ चाँड़ै बित्‍छ, र हामी उड़िजान्‍छौं।

¹¹तपाईंका क्रोधको शक्ति कसले जान्‍दछ? किनकि तपाईंको क्रोध तपाईंलाई दिनुपर्ने भय जत्तिकै ठूलो छ।

¹²हाम्रो आयु ठीकसँग गन्‍न हामीलाई सिकाउनुहोस्‌, र हामी बुद्धिको हृदय प्राप्‍त गर्न सकौं।

¹³हे परमप्रभु, नम्र हुनुहोस्‌, अझै कति बेर लाग्‍ने हो? आफ्‍ना दासहरूमाथि दया गर्नुहोस्‌।

¹⁴बिहान आफ्‍नो नटल्‍ने करुणाले हामीलाई तृप्‍त पार्नुहोस्‌, र हामी आफ्‍ना जीवनभरि रमाएर गाउन सकौं।

¹⁵जति दिन तपाईंले हामीलाई कष्‍ट दिनुभयो, र जति वर्ष दु:ख भोग्‍यौं, त्‍यत्ति दिन हामीलाई आनन्‍दित तुल्‍याउनुहोस्‌।

¹⁶तपाईंका कार्य तपाईंका सेवकहरूलाई प्रदर्शन गरिऊन्‌, र तपाईंको वैभव तिनीहरूका छोराछोरीकहाँ प्रकट होस्‌।

¹⁷हाम्रा परमप्रभु परमेश्‍वरको निगाह हामीमाथि रहोस्‌, र हाम्रा हातका कामहरू हाम्रा निम्‍ति दृढ़ पारिऊन्‌। हो, हाम्रा हातका कामहरू सुदृढ़ पारिदिनुहोस्‌।