Read Nepali New Revised Version, 2012 भजनसंग्रह 92 Bible Online

भजनसंग्रह 92 - Nepali New Revised Version, 2012 bible

भजनसंग्रह 92

¹शबाथको निम्‍ति एक भजन [1] परमप्रभुको प्रशंसा गर्नु, र हे सर्वोच्‍च, तपाईंको नाउँमा भजन गाउनु असल कुरा हो।

²बिहान तपाईंका करुणाको, र राती तपाईंको विश्‍वसनीयताको घोषणा गर्नु,

³तथा दश तारे सारङ्गी र वीणाको मृदु लयमा तपाईंको स्‍तुति गर्नु असल कुरा हो।

⁴किनकि हे परमप्रभु, तपाईंले आफ्‍ना कामद्वारा मलाई आनन्‍दित तुल्‍याउनुभएको छ, तपाईंका हातका कार्यहरू हेरेर म हर्षले गाउँछु।

⁵हे परमप्रभु, तपाईंका कार्यहरू कति महान्‌ छन्‌, तपाईंका विचारहरू कति गम्‍भीर छन्‌!

⁶विवेकहीन मानिसले यो जान्‍न सक्‍दैन, र मूर्खले यो बुझ्‍न सक्‍दैन:

⁷यद्यपि दुष्‍टहरू घाँसजस्‍तै मौलाउँछन्‌, र सबै दुष्‍टहरूको फलिफाप हुन्‍छ, तर तिनीहरू सधैँको निम्‍ति नष्‍ट पारिनेछन्‌।

⁸तर तपाईं हे परमप्रभु, सदाको निम्‍ति उच्‍चमा विराजमान हुनुहुन्‍छ।

⁹किनकि हे परमप्रभु, तपाईंका शत्रुहरू अवश्‍य नष्‍ट हुनेछन्‌, तपाईंका शत्रुहरू निश्‍चयनै नष्‍ट हुनेछन्‌, सबै दुष्‍टाचारीहरू तितरबितर हुनेछन्‌।

¹⁰तपाईंले मलाई जङ्गली साँढ़ेको जत्तिकै शक्ति दिनुभएको छ, उत्तम तेलले मेरो अभिषेक भएको छ।

¹¹मेरा आँखाले मेरा शत्रुहरूको हार भएको देखेका छन्‌, मेरा कानले मेरा दुष्‍ट शत्रुहरू लखेटिएका कुरा सुनेका छन्‌।

¹²धर्मीचाहिँ खजूरको बोटझैँ लहलह हुन्‍छ, तिनीहरू लेबनानको देवदारुजस्‍तै बढ्‌छन्‌,

¹³तिनीहरू परमप्रभुको भवनमा रोपिएका हुन्‍छन्‌, हाम्रा परमेश्‍वरका चोकहरूमा तिनीहरू मौलाउँछन्‌।

¹⁴बुढ़ेसकालमा पनि तिनीहरू फलदायी हुन्‍छन्‌, र तिनीहरू ताजा र हरिया रहन्‍छन्‌,

¹⁵र घोषणा गर्छन्‌, परमप्रभु भला हुनुहुन्‍छ। उहाँ मेरो चट्टान हुनुहुन्‍छ, र उहाँमा केही दुष्‍टता छैन।