Read Nepali New Revised Version, 2012 श्रेष्‍ठगीत 2 Bible Online

श्रेष्‍ठगीत 2 - Nepali New Revised Version, 2012 bible

श्रेष्‍ठगीत 2

¹म त शारोनको गुलाफ र बेँसीमा उम्रने लिली फूल हुँ,

²काँढ़ाहरूका माझमा फुलेको लिली फूलझैँ मेरी प्‍यारी अन्‍य कन्‍येहरूका बीचमा छिन्‌।

³वनमा भएका रूखहरूमध्‍ये स्‍याउको रूखजस्‍तै पुरुषहरूका बीचमा मेरा प्रेमी हुनुहुन्‍छ। त्‍यस छहारीमा म बड़ो आनन्‍दले बस्‍छु अनि उहाँको फलको स्‍वाद मलाई साह्रै मीठो लाग्‍छ।

⁴उहाँले मलाई भोजको गृहमा लानुभएको छ, र ममाथि भएको उहाँको झन्‍डा प्रेम हो।

⁵मलाई सजीव पार्न किसमिसको परिकार दिनुहोस्, स्‍याउले मलाई ताजा बनाउनुहोस्‌ किनभने म प्रेमले शिथिल भएकी छु।

⁶उहाँको देब्रे हात मेरो शिरमुनि छ, र उहाँको दाहिने हातले मलाई अँगालो हालेको छ।

⁷यरूशलेमका छोरीहरू हो, म तिमीहरूलाई आज्ञा गर्छु, मैदानका मुडुली मृग र हरिणहरूको नाउँमा: आफूले नचाहेसम्‍म प्रेमलाई नउठाओ वा नजगाओ।

⁸सुन! मेरा प्रेमीको सोर! हेर त! उहाँ आउँदैहुनुहुन्‍छ, पहाड़हरूमा हामफाल्‍दै डाँड़ाहरू हुँदो दर्गुदै आउनुहुन्‍छ।

⁹मेरा प्रेमी त एउटा हरिण वा जवान मृगजस्‍तै हुनुहुन्‍छ। हेर त! उहाँ हाम्रो पर्खालको पछाड़ि उभिनुभएको छ, उहाँले झ्‍यालहरूभित्र हेर्दैहुनुहुन्‍छ, आँखी-झ्‍यालभित्र चियाउँदैहुनुहुन्‍छ।

¹⁰मेरा प्रेमी बोल्‍नुभयो र मलाई भन्‍नुभयो, “उठ, हे मेरी प्‍यारी, मेरी सुन्‍दरी, र मसित आऊ।

¹¹हेर, अब हिउँद बित्‍यो, वर्षा पनि सिद्धियो।

¹²पृथ्‍वीमा फूलहरू देखा पर्न थाले, गीत गाउने समय आयो, र ढुकुर कुर्लेको सोर हाम्रो देशमा सुनिन्‍छ।

¹³अञ्‍जीरका बोटमा अञ्‍जीरका हरिया दाना लागेका छन्, र दाखबारीमा दाखको फूलले मीठो बास्‍ना फिँजाउँछ। उठ, मेरी प्‍यारी, मेरी सुन्‍दरी, र मसित आऊ।”

¹⁴पहरामा गोप्‍य प्‍वालहरू हुँदो, भिरालो चट्टानमा बस्‍ने मेरी ढुकुर, मलाई तिम्रो अनुहार देखाऊ, तिम्रो सोर सुन्‍न पाऊँ, किनभने तिम्रो सोर मीठो छ, र तिम्रो मुहार सुन्‍दर छ।

¹⁵हाम्रा निम्‍ति फ्‍याउराहरू समातिदेऊ, यी ससाना फ्‍याउराहरू, जसले दाखबारी बिगार्छन्, भरखरै पलाएको हाम्रो दाखबारी।

¹⁶मेरा प्रेमी मेरै हुनुहुन्‍छ, र म उहाँकी हुँ, लिली फूलहरूका बीचमा उहाँ घुमेर हिँड्‌नुहुन्‍छ।

¹⁷झिसमिसे बिहान नआएसम्‍म र छाया हराउँदै नगएसम्‍म, फर्कनुहोस्, मेरा प्रेमी, भिराला पर्वतहरूतिर हुने हरिण अथवा जवान मृगझैँ हुनुहोस्‌।