Read Nepali New Revised Version, 2012 श्रेष्‍ठगीत 4 Bible Online

श्रेष्‍ठगीत 4 - Nepali New Revised Version, 2012 bible

श्रेष्‍ठगीत 4

¹मेरी प्‍यारी, तिमी साह्रै सुन्‍दरी छ्यौ! असाध्‍यै सुन्‍दरी! घुम्‍टोभित्र लुकेका तिम्रा आँखा ढुकुरजस्‍ता छन्, तिम्रा केश गिलाद डाँड़ाको भिरालोबाट झरिरहेका बाख्राको बगालजस्‍तै छ।

²तिम्रा दाँत भरखरै कत्रेका, नुहाएर आएका भेड़ाहरूका बथानजस्‍तै छन्‌। प्रत्‍येकको जुम्‍ल्‍याहा छ, कुनै पनि एकलो छैन।

³तिम्रा ओठ राता रिबनजस्‍ता छन्, तिम्रो मुख अति सुन्‍दर छ। घुम्‍टोभित्र तिम्रा गालाहरू दुई फ्‍याक परेको दारिमजस्‍तै छन्‌।

⁴तिम्रो घाँटी दाऊदको भव्‍य धरहराजस्‍तै छ। त्‍यहाँ एक हजार ढाल झुण्‍डाइएका छन्, ती सबै योद्धाहरूका ढाल हुन्‌।

⁵तिम्रा दुई स्‍तन दुई पाठाजस्‍तै छन्, लिली फूलका बीचमा चर्ने हरिणका जुम्‍ल्‍याहा पाठाजस्‍तै छन्‌।

⁶झिसमिसे बिहान नआएसम्‍म र छाया हराउँदै नगएसम्‍म, म मूर्रको पर्वतमा र धूपको डाँड़ामा जानेछु।

⁷मेरी प्‍यारी, तिमी साह्रै सुन्‍दरी छ्यौ, तिमीमा कुनै दाग छैन।

⁸हे मेरी दुलही, लेबनानबाट मकहाँ आऊ, लेबनानबाट मकहाँ आऊ। अमानाको चुचुरोबाट ओह्रालो झरेर आऊ, सेनीरको टुप्‍पा, हेर्मोनको टाकुराबाट आऊ, सिंहहरूका ओड़ार र चितुवाहरूका पहाड़ी अखड़ाबाट।

⁹तिमीले मेरो हृदय चोरेकी छ्यौ, मेरी बहिनी, मेरी दुलही तिम्रो एउटै नजरले, तिम्रो हारको एउटा रत्‍नले तिमीले मेरो हृदय चोरेकी छ्यौ।

¹⁰तिम्रो प्रेम कति आनन्‍ददायी छ, मेरी बहिनी, मेरी दुलही। कुनै दाखमद्यभन्‍दा पनि तिम्रो प्रेम साह्रै असल, र तिम्रो अत्तरको बास्‍ना कुनै पनि मसलाको भन्‍दा अति सुगन्‍धित छ!

¹¹तिम्रा ओठले महका चाकाबाट जस्‍तै मिठास चुहाउँछ, हे मेरी दुलही। दूध र मह तिम्रो जिब्रोमुनि छन्‌। तिम्रा लुगाको बास्‍ना लेबनानको जस्‍तै छ।

¹²मेरी बहिनी, मेरी दुलही, तिमी बन्‍द राखिएको बगैँचाजस्‍तो, छोपिएको मुहानजस्‍तो, एउटा छाप लगाएकी फुहाराजस्‍तै छ्यौ।

¹³तिम्रा बोटहरू अनारको बगैँचाजस्‍तै छन्, उत्तम फलहरूले भरिएको बगैँचा— मेहदी र जटामसी,

¹⁴जटामसी र केशर, बोझो र दालचिनी, थरी-थरीका सुगन्‍धित धूपका रूखहरू, मूर्र र एलवा, र सबै किसिमका असल सुगन्‍धित मसलाहरू।

¹⁵तिमी त बगैँचाको फुहारा, लेबनानबाट बग्‍दैआएकी पानीको मूल हौ।

¹⁶हे उत्तरको बतास, जाग्‌। हे दक्षिणको बतास, आइज! मेरो बगैँचाबाट हुँदै बही, यसको बास्‍ना टाढ़ासम्‍म पुगोस्‌। मेरा प्रेमी आफ्‍नो बगैँचामा आऊन्, र यसका उत्तम फलहरू चाखून्‌।