Read Nepali New Revised Version, 2012 यशैया 19 Bible Online

यशैया 19 - Nepali New Revised Version, 2012 bible

यशैया 19

¹मिश्रदेशको विषयमा ईश्‍वरवाणी: हेर, परमप्रभु तेजिलो बादलमा सवारी भएर मिश्रदेशमा आउँदैहुनुहुन्‍छ। मिश्रदेशका मूर्तिहरू उहाँको उपस्‍थितिमा थरथर काँप्‍दछन्, र मिश्रीहरूका हृदय भित्रभित्रै गलिजान्‍छन्‌।

²“म मिश्रीहरूलाई मिश्रीहरूकै विरुद्धमा सुर्‍याउनेछु। दाजुभाइको विरुद्धमा दाजुभाइ लड्‌नेछन्, छिमेकीको विरुद्धमा छिमेकी, सहरको विरुद्धमा सहर, र राज्‍यको विरुद्धमा राज्‍य।

³मिश्रीहरू हताश हुनेछन्, तिनीहरूका योजना म बेकार बनाउनेछु। तिनीहरूले देवताहरू, प्रेतहरू, मन्‍त्रतन्‍त्र गर्नेहरू र झाँक्रीहरूकहाँ गएर सोध्‍नेछन्‌।

⁴अनि म मिश्रीहरूलाई एउटा निष्‍ठुर मालिकको हातमा सुम्‍पिदिनेछु, र एउटा निर्दयी राजाले तिनीहरूमाथि राज्‍य गर्नेछ,” परमप्रभु, सर्वशक्तिमान्‌ परमप्रभु भन्‍नुहुन्‍छ।

⁵नदीका पानी सुकिजानेछन्, र त्‍यो नदीको सतह खंग्रङ्ग सुक्‍खा हुनेछ।

⁶नहरहरू गन्‍हाउनेछन्‌। मिश्रदेशका खोलाहरू घटेर सुकिजानेछन्‌। निगालो र काँसहरू ओइलाउनेछन्‌।

⁷साथै नील नदीको किनारतिर र नील नदीको मुखैमा भएका बाली ओइलाउनेछन्‌। तिनलाई बतासले उड़ाएर लैजानेछ, र ती रहनेछैनन्‌।

⁸जालहारीहरूले सुस्‍केरा हाल्‍नेछन्‌ र विलाप गर्नेछन्‌। नील नदीमा बल्‍छी हान्‍ने र पानीमा जाल हान्‍नेहरू सबै खिन्‍न हुनेछन्‌।

⁹बाटेका सनपाटको काम गर्नेहरू निराश हुनेछन्, र मलमलको कपड़ा बुन्‍नेहरू निराश हुनेछन्‌।

¹⁰लुगाका काम गर्नेहरू निरुत्‍साह हुनेछन्, र ज्‍यालामा काम गर्नेहरू सबैको हृदय अफसोसमा पर्नेछ।

¹¹सोअनका अधिकृतहरू असाध्‍य मूर्ख छन्‌! फारोका बुद्धिमान्‌ सल्‍लाहकारले विवेकहीन सल्‍लाह दिन्‍छन्‌। तिमीहरू कसरी फारोलाई भन्‍न सक्‍छौ, “म बुद्धिमान्‌ मानिसहरूमध्‍ये एक हुँ, प्राचीन समयका राजाहरूको शिष्‍य”?

¹²तेरा बुद्धिमान्‌ मानिसहरू अब कता गए? मिश्रदेशको विरुद्धमा सर्वशक्तिमान्‌ परमप्रभुको अभिप्राय के छ भनी तिनीहरूले तँलाई देखाऊन्‌ र बुझाऊन्‌।

¹³सोअनका अधिकृतहरू मूर्ख भएका छन्‌। नोपका नेताहरू धोकामा परेका छन्‌। तिनीहरू, जो त्‍यसका मानिसहरूका कुने-ढुङ्गाहरू हुन्, मिश्रदेशलाई बहकाएका छन्‌।

¹⁴परमप्रभुले तिनीहरूमा रिँगटा लाग्‍ने आत्‍मा हालिदिनुभएको छ, र मतवाला मानिस आफ्‍नै बान्‍तामा धरमरिँदै हिँड़ेझैँ तिनीहरूले मिश्रदेशलाई आफूले गरेका सबै काममा ढलमल गर्ने पारिदिएका छन्‌।

¹⁵मिश्रदेशले केही काम गर्न सक्‍नेछैन, चाहे टाउको कि पुच्‍छर, खजूरको हाँगा अथवा नर्कट।

¹⁶त्‍यस दिन मिश्रीहरू स्‍त्रीहरूजस्‍तै हुनेछन्‌। सर्वशक्तिमान्‌ परमप्रभुले तिनीहरूका विरुद्धमा उठाउनुभएको हातबाट तिनीहरू डरले थरथर काम्‍नेछन्‌।

¹⁷अनि यहूदा देशले मिश्रीहरूमा त्रास ल्‍याउनेछ। यहूदाको नाउँ सुन्‍ने प्रत्‍येक डराउनेछ, किनभने सर्वशक्तिमान्‌ परमप्रभुले तिनीहरूको विरुद्ध योजना गर्दैहुनुहुन्‍छ।

¹⁸त्‍यस दिन मिश्रदेशका पाँच सहरले कनान देशको भाषा बोल्‍नेछन्, र सर्वशक्तिमान्‌ परमप्रभुप्रति भक्तिको शपथ खानेछन्‌। तीमध्‍ये एउटाको नाउँचाहिँ विनाशको सहर भनिनेछ।

¹⁹त्‍यस दिन मिश्रदेशको बीचमा परमप्रभुको निम्‍ति एउटा वेदी हुनेछ र त्‍यसको सिमानामा परमप्रभुको निम्‍ति एउटा स्‍मारक खड़ा गरिनेछ।

²⁰मिश्रदेशमा सर्वशक्तिमान्‌ परमप्रभुको निम्‍ति त्‍यो एउटा चिन्‍ह र साक्षी हुनेछ। अत्‍याचारीहरूको कारण तिनीहरूले परमप्रभुलाई पुकारा गर्दा, उहाँले तिनीहरूका निम्‍ति एक जना मुक्तिदाता र एक जना रक्षक पठाउनुहुनेछ, र उहाँले तिनीहरूलाई छुटाउनुहुनेछ।

²¹यसरी परमप्रभु मिश्रीहरूमा प्रकट हुनुहुनेछ, र त्‍यस दिन तिनीहरूले परमप्रभुलाई स्‍वीकार गर्नेछन्‌। तिनीहरूले बलिदानहरू र अन्‍नबलिहरूद्वारा उहाँलाई आराधना गर्नेछन्, र तिनीहरूले परमप्रभुको निम्‍ति भाकल गरेर त्‍यो पूरा गर्नेछन्‌।

²²परमप्रभुले मिश्रदेशलाई महामारीद्वारा प्रहार गर्नुहुनेछ। उहाँले तिनीहरूलाई हिर्काउनुहुनेछ, र तिनीहरूलाई निको पनि पार्नुहुनेछ। तिनीहरू परमप्रभुतर्फ फर्कनेछन्‌। उहाँले तिनीहरूको बिन्‍ती सुन्‍नुहुनेछ, र उहाँले तिनीहरूलाई निको पार्नुहुनेछ।

²³त्‍यस दिन मिश्रदेशदेखि अश्‍शूर देशसम्‍म एउटा मूलबाटो हुनेछ। अश्‍शूरीहरू मिश्रदेशमा र मिश्रीहरू अश्‍शूर देशमा आवतजावत गर्नेछन्‌। मिश्रीहरू र अश्‍शूरीहरूले एकैसाथ आराधना गर्नेछन्‌।

²⁴त्‍यस दिन मिश्र र अश्‍शूरका साथ पृथ्‍वीमा आशिष्‌को निम्‍ति इस्राएलचाहिँ तेस्रो देश हुनेछ।

²⁵सर्वशक्तिमान्‌ परमप्रभुले तिनीहरूलाई यसो भनेर आशिष्‌ दिनुहुनेछ, “मिश्र मेरो प्रजा, अश्‍शूर मेरो हातको काम र इस्राएल मेरो उत्तराधिकारी धन्‍यका होऊन्‌।”