Read Nepali New Revised Version, 2012 यशैया 21 Bible Online

यशैया 21 - Nepali New Revised Version, 2012 bible

यशैया 21

¹समुद्र-किनारको मरुभूमिको विषयमा ईश्‍वरवाणी: दक्षिण देशमा भुमरी जोडसित चलेझैँ, मरुभूमिबाट, त्रासको देशबाट एउटा आक्रमणकारी आउँछ।

²एउटा डरलाग्‍दो दर्शन मलाई देखाइयो: धोखाबाजी गर्नेले धोखाबाजी गर्छ, र लुट्‌नेले लुट्‌छ। ए एलाम, आक्रमण गर्, ए मादी, घेरा लगा। त्‍यसले गराएको सबै सुस्‍केरा म बन्‍द गरिदिनेछु।

³यसैले मेरो शरीर पीडाले भरिएको छ। प्रसववेदनामा परेकी स्‍त्रीझैँ तीक्ष्ण वेदनाले मलाई पक्रेको छ। म जे सुन्‍छु त्‍यसले म धरमराउँछु। म जे देख्‍छु त्‍यसले मलाई व्‍याकुल पार्छ।

⁴मेरो मुटु हतोत्‍साहित भएको छ। डरले म काँप्‍छु। मैले चाहना गरेको सन्‍ध्‍याको रिमझिम मेरो निम्‍ति त्रास भएको छ।

⁵तिनीहरूले टेबिल तयार गर्छन्, गलैँचा बिछ्याउँछन्, खान्‍छन्‌ र पिउँछन्‌। हे अधिकृतहरू हो, उठ, ढालमा तेल लगाओ।

⁶परमप्रभु मलाई यसो भन्‍नुहुन्‍छ, “जा, पहरादार राख्‌। त्‍यसले के देख्‍छ त्‍यो बताओस्‌।

⁷जब त्‍यसले घोड़ाको टोली भएका रथहरू, र गधा र ऊँटका सवारहरू देख्‍छ, तब त्‍यो चनाखो, पूर्ण चनाखो होस्‌।’

⁸त्‍यो पहरादार यसो भनेर करायो, “हे प्रभु, म दिनहुँ पहरा बस्‍ने धरहरामा उभिरहन्‍छु, र प्रत्‍येक रातमा म पहरा चौकीमा बस्‍छु।

⁹हेर्नुहोस्, घोड़ाको टोली भएको रथमा एक जना मानिस आउँदैछ। अनि त्‍यसले जवाफ दिएर भन्‍छ, ‘बेबिलोनको पतन भयो, पतन भयो, र त्‍यसका कुँदेर बनाएका देवताका सबै मूर्तिहरू चकनाचूर पारिएर जमिनमा पड़िरहेका छन्‌’।”

¹⁰ए मेरो प्रजा, दाइँ गर्ने खलामा पेलिएकाहरू! सर्वशक्तिमान्‌ परमप्रभु इस्राएलका परमेश्‍वरबाट मैले जे सुनें, त्‍यो म तिमीहरूलाई भन्‍छु।

¹¹दुमाको विषयमा ईश्‍वरवाणी: “ए पहरादार, रात कति बाँकी छ? ए पहरादार, रात कति रहेको छ?” भनेर कसैले मलाई सेइरबाट भन्‍दैछ।

¹²पहरादारले जवाफ दिन्‍छ, “बिहान हुँदैछ, र रात पनि पर्दैछ। तिम्रो केही सोध्‍नु छ भने सोध, र फेरि फर्केर आऊ।”

¹³अरब देशको विषयमा ईश्‍वरवाणी: ए ददानीहरूका यात्री दल, जो अरब देशका झाड़ीहरूमा वास बस्‍छौ,

¹⁴तिर्खाएकाहरूका निम्‍ति पानी ल्‍याओ। तेमामा बस्‍नेहरूले शरणार्थीहरूका निम्‍ति खानेकुरा ल्‍याओ।

¹⁵तिनीहरू तरवारबाट, नाङ्गो तरवारबाट, नुहेका धनुबाट, र घोर लड़ाइँबाट भाग्‍छन्‌।

¹⁶परमप्रभु मलाई यसो भन्‍नुहुन्‍छ, “एक वर्षभरिलाई ज्‍यालामा काम गर्ने नोकरले वर्ष गनेअनुसार, एकै वर्षमा केदारको सबै शान अन्‍त हुनेछ।

¹⁷धनुर्धारीहरू, केदारका योद्धाहरूमध्‍ये बाँचेकाहरू थोरै मात्र हुनेछन्‌।” परमप्रभु इस्राएलका परमेश्‍वरले त्‍यसै भन्‍नुभएको छ।