Read Nepali New Revised Version, 2012 यशैया 23 Bible Online

यशैया 23 - Nepali New Revised Version, 2012 bible

यशैया 23

¹टुरोसको विषयमा ईश्‍वरवाणी: हे तर्शीशका जहाज हो, विलाप गर, किनकि टुरोस ध्‍वस्‍त पारिएको छ, र त्‍यहाँ कुनै घर अथवा कुनै बन्‍दरगाह छोड़िएको छैन। साइप्रसबाट एउटा कुरा तिनीहरूकहाँ आएको छ।

²हे टापूका मानिस हो, र हे सीदोनका व्‍यापारी हो! जसलाई सामुद्रिक व्‍यापारीहरूले धनी बनाएका छन्, तिमीहरू चूप लाग।

³ठूलो पानीमा शिहोरको अन्‍न आयो, नील नदीको कटनी टुरोसको कर थियो। र त्‍यो देश जाति-जातिहरूको बजार भयो।

⁴हे सीदोन र समुद्रनेरको किल्‍ला, लज्‍जित होओ, किनकि समुद्रले यसो भनेको छ, “म न त सुत्‍केरी वेदनामा परेकी छु, न मैले बालक जन्‍माएकी छु। मैले न त छोराहरू हुर्काएकी छु, न छोरीहरूलाई बढ़ाएकी छु।”

⁵जब समाचार मिश्रदेशमा पुग्‍छ, तब टुरोस सहरको समाचार सुनेर तिनीहरू साह्रै वेदनामा पर्नेछन्‌।

⁶तर्शीशमा तरेर जाओ, हे समुद्र किनारका मानिस हो, विलाप गर।

⁷के यो तिमीहरूको आमोदप्रमोदको सहर हो, त्‍यो अत्‍यन्‍तै पुरानो सहर, जसका खुट्टाले त्‍यसलाई प्रवास गर्न टाढ़ाका देशहरूमा पुर्‍याए?

⁸मुकुटहरू प्रदान गर्ने टुरोस सहर, जसका व्‍यापारीहरू राजकुमारहरू हुन्, जसका पैकारीहरू पृथ्‍वीमा प्रख्‍यात छन्‌। त्‍यसको विरुद्धमा कसले यस्‍तो युक्ति रच्‍यो?

⁹घमण्‍ड गर्ने त्‍यस सहरको सबै गौरवलाई तुच्‍छ पार्न, पृथ्‍वीका सारा प्रख्‍यातहरूलाई विनम्र तुल्‍याउन सर्वशक्तिमान्‌ परमप्रभुले यो युक्ति रच्‍नुभएको हो।

¹⁰हे तर्शीशकी छोरी, नील नदीको किनारमा जस्‍तै जमिन जोत्‌ किनकि अब तेरो कुनै बन्‍दरगाह रहेन।

¹¹परमप्रभुले आफ्‍नो हात समुद्रमाथि फैलाउनुभएको छ र त्‍यसका राज्‍यहरूलाई काम्‍न लाउनुभएको छ। उहाँले फोनिकेका किल्‍लाहरू नष्‍ट पार्नलाई आज्ञा दिनुभएको छ।

¹²उहाँले भन्‍नुभयो, “हे चूर्ण पारिएका सीदोनकी कन्‍येछोरी, तेरो आमोदप्रमोद अब हुँदैन। उठ्, साइप्रस टापूतिर जा। तैंले त्‍यहाँ पनि केही विश्राम पाउनेछैनस्‌।”

¹³बेबिलोनीहरूको देशलाई हेर्‌। त्‍यस जातिको अब कुनै महत्त्व छैन। अश्‍शूरीहरूले त्‍यसलाई मरुभूमिका पशुहरूका निम्‍ति बनाएका छन्‌। तिनीहरूले आफ्‍ना घेरा-मचान खड़ा गरे, तिनीहरूले त्‍यसका किल्‍लाहरू उजाड़ पारी त्‍यसलाई भत्‍काइदिए र भग्‍नावशेष तुल्‍याइदिए।

¹⁴हे तर्शीशका जहाज हो, विलाप गर, तिमीहरूको किल्‍ला नष्‍ट पारिएको छ।

¹⁵त्‍यस समय टुरोस सत्तरी वर्षसम्‍म, अर्थात्‌ एउटा राजाको जीवन अवधिसम्‍म बिर्सिनेछ। तर सत्तरी वर्ष बितेपछि टुरोसको दशा एउटी वेश्‍याको गीतजस्‍तै हुनेछ।

¹⁶“हे बिर्सिएकी वेश्‍या, वीणा लिएर सहरको बीचबाट जा। वीणाको सङ्गीत बजा, धेरै गीत गा, र फेरि तेरो सम्‍झना गरिनेछ।”

¹⁷सत्तरी वर्षको अन्‍तमा परमप्रभुले सोरमाथि निगाह गर्नुहुनेछ, र त्‍यो फेरि आफ्‍नो वेश्‍यावृत्तिको पेशातिर फर्कनेछ, र पृथ्‍वीभरिका सारा राज्‍यहरूसित त्‍यसले व्‍यापार गर्नेछ।

¹⁸तापनि त्‍यसको नाफा र त्‍यसको कमाइ परमप्रभुको निम्‍ति अलग्‍गै छुट्ट्याइनेछ। भण्‍डारमा ती सञ्‍चय गरिनेछैन। त्‍यसका व्‍यापारका नाफाहरू परमप्रभुका मानिसहरूका निम्‍ति प्रशस्‍त खानेकुरा र सुन्‍दर लुगाका निमित्त हुनेछन्‌।