Read Nepali New Revised Version, 2012 यशैया 25 Bible Online

यशैया 25 - Nepali New Revised Version, 2012 bible

यशैया 25

¹हे परमप्रभु, तपाईं मेरा परमेश्‍वर हुनुहुन्‍छ, म तपाईंको नाउँलाई उच्‍च पार्दछु र तपाईंका नाउँको प्रशंसा गर्दछु, किनकि सम्‍पूर्ण विश्‍वासमा तपाईंले आश्‍चर्यका कामहरू गर्नुभयो, ती कामहरू जो धेरै अघि तादिमा योजना गरिएका थिए।

²तपाईंले सहरलाई ढुङ्गाको थुप्रो बनाइदिनुभएको छ। सुरक्षित नगरलाई ध्‍वंस गर्नुभयो। विदेशीहरूको किल्‍लाहरूले भरिएको सहर अब सहर रहेन। त्‍यो फेरि कहिल्‍यै निर्माण गरिनेछैन।

³यसैकारण बलिया जातिहरूले तपाईंलाई मान दिनेछन्, र क्रूर जातिहरूका सहरहरूले तपाईंलाई सम्‍मान दिनेछन्‌।

⁴तपाईं गरीबहरूका निम्‍ति र दु:खमा परेका दरिद्रहरूका निम्‍ति एउटा शरण हुनुभएको छ, आँधीबेहरीमा शरण र घाममा छाया हुनुभएको छ। किनकि निष्‍ठुरहरूको झोँक पर्खालमा ठोकिएको आँधीझैँ हो,

⁵र मरुभूमिमा ताप परेझैँ हो। तपाईंले विदेशीहरूको हल्‍लालाई साम्‍य पार्नुहुन्‍छ। बादलले घामलाई छाया पारेझैँ निष्‍ठुरहरूको गीत तपाईंले बन्‍द गरिदिनुहुन्‍छ।

⁶सर्वशक्तिमान्‌ परमप्रभुले यसै पर्वतमा सारा मानिसहरूका निम्‍ति मीठा-मीठा थोकहरू— छिप्‍पिएको मद्य, असल-असल स्‍वादिष्‍ट थोकहरू, सबैभन्‍दा असल मद्यको भोज लाउनुहुनेछ।

⁷उहाँले यही पर्वतमा सारा मानिसहरूलाई ढाक्‍ने वस्‍त्र र सारा जातिलाई छोप्‍ने तन्‍ना हटाइदिनुहुनेछ।

⁸उहाँले मृत्‍युलाई सदाको निम्‍ति निल्‍नुहुनेछ। परमप्रभु परमेश्‍वरले सबैका अनुहारबाट आँसु पुछिदिनुहुनेछ। उहाँले सारा पृथ्‍वीबाट आफ्‍नो प्रजाको निन्‍दा हटाइदिनुहुनेछ। परमप्रभुले भन्‍नुभएको छ।

⁹त्‍यस दिन तिनीहरूले यसो भन्‍नेछन्, “निश्‍चय उहाँ नै हाम्रा परमेश्‍वर हुनुहुन्‍छ, हामीले उहाँमाथि भरोसा गर्‍यौं र उहाँले नै हामीलाई बचाउनुभयो। उहाँ नै परमप्रभु हुनुहुन्‍छ, उहाँमाथि हामीले भरोसा गर्‍यौं। उहाँले गर्नुभएको उद्धारमा हामी खुशी होऔं र रमाऔं।”

¹⁰यस पर्वतमा परमप्रभुको हात रहनेछ, तर मोआब उहाँमुनि कुल्‍चीमिल्‍ची हुनेछ, जस्‍तो पराल मलमा कुल्‍चीमिल्‍ची हुन्‍छ।

¹¹जसरी पौडनेले पौडँदा आफ्‍ना हात फैलाउँछ, त्‍यसरी नै तिनीहरूले त्‍यसमा आफ्‍ना हात फैलाउँछन्‌। तिनीहरूले आफ्‍ना हातको चलाकी देखाए तापनि परमेश्‍वरले तिनीहरूको घमण्‍ड तल झार्नुहुनेछ।

¹²तेरा अल्‍गा-अल्‍गा किल्‍ला भएका पर्खालहरू उहाँले भत्‍काइदिनुहुनेछ, र तिनीहरूलाई जमिनमा सोतर पारिदिनुहुनेछ, अर्थात्‌ धूलोमा मिलाइदिनुहुनेछ।