Read Nepali New Revised Version, 2012 यशैया 28 Bible Online

यशैया 28 - Nepali New Revised Version, 2012 bible

यशैया 28

¹एफ्राइमका मतवालाहरूको अहङ्कारका शिरको फूलमालालाई र त्‍यसको महिमित शोभाको ओइलाउने फूललाई धिक्‍कार, जो मलिलो उपत्‍यकाको सिरानमा राखिएको छ। त्‍यो सहर जसको अहङ्कारलाई दाखमद्यले होच्‍याइएको छ।

²हेर, परमप्रभुको एक जना शक्तिशाली र बलियो जन छ। असिना र नाश गर्ने आँधीझैँ, भयङ्कर बाढ़ीको मुसलधार वर्षा र तूफानझैँ उहाँले जोडदार रूपमा त्‍यसलाई भूइँमा फालिदिनुहुनेछ।

³एफ्राइमका मतवालाहरूको अङ्ककारका शिरको माला खुट्टामुनि कुल्‍चीमिल्‍ची हुनेछ।

⁴त्‍यसको महिमित शोभाको ओइलाउने फूल, जो प्रशस्‍त उब्‍जनी हुने बेँसीको सिरानमा राखिएको छ, त्‍यो कटनीभन्‍दा पहिले पाकेको अञ्‍जीरजस्‍तो हुनेछ, जो कसैले देख्‍ने बित्तिकै हातमा लिएर निलिहाल्‍छ।

⁵त्‍यस दिन आफ्‍नो प्रजाका बाँचेकाहरूका निम्‍ति सर्वशक्तिमान्‌ परमप्रभु आफै महिमाको मुकुट र सुन्‍दरताको माला हुनुहुनेछ।

⁶उहाँ इन्‍साफ गर्नलाई बस्‍नेको निम्‍ति न्‍यायको आत्‍मा र सहरको मूल ढोकामा युद्ध गर्नेहरूका निम्‍ति शक्तिको स्रोत हुनुहुनेछ।

⁷यिनीहरू पनि दाखमद्यले गर्दा धरमरिन्‍छन्, जाँड़ले गर्दा तिनीहरू लरबरिन्‍छन्‌: पूजाहारी र अगमवक्ता जाँड़ले धरमरिन्‍छन्‌। दाखमद्यले तिनीहरू लट्ठिएका छन्‌। तिनीहरू जाँड़ले गर्दा धरमरिएका छन्‌। दर्शन देख्‍दा तिनीहरू धरमरिन्‍छन्, निर्णय दिँदा तिनीहरू लरबराउँछन्‌।

⁸सबै टेबिलहरू बान्‍ताले भरिएका छन्‌। फोहोर नभएको ठाउँ एउटै पनि छैन।

⁹“त्‍यसले कसलाई सिकाउन चाहेको छ? कसलाई त्‍यसले समाचारको अर्थ बुझाउँदैछ? भर्खर दूध छोड़ेका बालकहरूलाई, भर्खर दूधबाट अलग गरिएकाहरूलाई?

¹⁰किनकि यस्‍तो छ— गरिबस, गरिबस, शासन गर, शासन गर, यहाँ अलिकति, त्‍यहाँ अलिकति।”

¹¹त्‍यसो हो भने, अन्‍य भाषा र अरू नै बोलीद्वारा परमप्रभु यस प्रजासित बोल्‍नुहुनेछ,

¹²जसलाई उहाँले भन्‍नुभयो, “विश्राम गर्ने ठाउँ यही हो, थाकेकाहरूले यहीँ नै विश्राम गरून्‌। अनि आरामको ठाउँ यही हो।” तापनि तिनीहरूले सुन्‍ने मन गरेनन्‌।

¹³यसकारण परमप्रभुको वचन तिनीहरूलाई यस्‍तो हुनेछ: गरिबस्, गरिबस्, शासन गर्, शासन गर्, अलिकति यहाँ, अलिकति त्‍यहाँ। यसरी तिनीहरू अगि बढून्, लोटून्, घाइते होऊन्‌ र पासोमा परून्‌।

¹⁴यसैकारण हे निन्‍दा गर्ने मानिस हो, जसले यरूशलेममा यस प्रजामाथि शासन गर्दछन्, परमप्रभुको वचन सुन।

¹⁵तिमीहरूले यो भनेर घमण्‍ड गर्दछौ, “हामीले मृत्‍युसित करार बाँधेका छौं, र पातालसित हामीले सम्‍झौता गरेका छौं। अत्‍यन्‍तै ठूलो विपत्ति हामीमाथि परे तापनि, त्‍यसले हामीलाई छुनेछैन। किनकि हामीले झूटको शरण लिएका छौं, र असत्‍यतालाई हाम्रो लुक्‍ने ठाउँ बनाएका छौं।”

¹⁶यसकारण सर्वोच्‍च परमप्रभु भन्‍नुहुन्‍छ, “हेर, मैले सियोनमा एउटा ढुङ्गो बसालेको छु, एउटा जाँचेको ढुङ्गो, दृढ़ जगको निम्‍ति एउटा बहुमूल्‍य कुने-ढुङ्गो। भरोसा गर्नेले कहिल्‍यै हरेस खानेछैन।

¹⁷म इन्‍साफलाई नाप्‍ने डोरी, र धार्मिकतालाई चाहिँ साहुल बनाउनेछु। असिनाले तिमीहरूको झूटको शरणस्‍थान बगाएर लैजानेछ, र पानीले तिमीहरूको लुक्‍ने ठाउँ डुबाइदिनेछ।”

¹⁸मृत्‍युसितको तिमीहरूको करार रद्द गरिनेछ, र पातालसित गरेको तिमीहरूको सम्‍झौता स्‍थिर रहनेछैन। जब विपत्तिको बाढ़ यताबाट जानेछ, तिमीहरूलाई त्‍यसले डुबाउनेछ।

¹⁹जहिले-जहिले त्‍यो उर्लेर आउँछ, त्‍यसले तिमीहरूलाई बगाएर लैजानेछ। बिहानैपिच्‍छे, दिनमा र रातमा त्‍यो उर्लेर आउनेछ।” यो सन्‍देशको बुझाइले घोर त्रास मात्र ल्‍याउनेछ।

²⁰लम्‍पसार पर्नलाई ओछ्यान साह्रै छोटो हुन्‍छ, आफूलाई ढाक्‍न कम्‍बल साह्रै सानो हुन्‍छ।

²¹पराजीम पर्वतमा उठ्‌नुभएझैँ परमप्रभु उठ्‌नुहुनेछ, गिबोनको बेँसीमा उहाँ जाग्‍नुभएझैँ जाग्‍नुहुनेछ— आफ्‍नो काम, आफ्‍नो अनौठो काम गर्न र आफ्‍नो कार्य, अर्थात्‌ आफ्‍नो अर्कै कार्य पूरा गर्न।

²²अब आफ्‍नो ठट्टा रोक, नत्रता तिमीहरूका साङ्‌ला अझ गह्रौँ हुनेछन्‌। परमप्रभु, सर्वशक्तिमान्‌ परमप्रभुले सारा देश नै नष्‍ट हुने कुरा मलाई भन्‍नुभएको छ।

²³सुन र मेरो सोर सुन, ध्‍यान देऊ, र मैले भनेको कुरा सुन।

²⁴जब कुनै किसानले केही रोप्‍नलाई जमिन जोत्‍छ, त के उसले जोतिरहन्‍छ? के त्‍यसले निरन्‍तर माटो खनेर डल्‍ला फोर्दै रहन्‍छ?

²⁵जब उसले जमिन खनेर सम्‍म बनाउँछ तब के उसले सूँप र जीरा छर्दैन? के उसले गहूँ त्‍यसकै स्‍थानमा रोप्‍दैन? र जौ त्‍यसको नियत स्‍थानमा रोप्‍दैन? र कठिया खेतमा रोप्‍दैन?

²⁶उसका परमेश्‍वरले उसलाई ठीक शिक्षा दिनुहुन्‍छ र ठीक-ठीक तरीका सिकाउनुहुन्‍छ।

²⁷कुनै घनले सूँप छाँटिँदैन, न त गाड़ाको पाङ्‌ग्राले जीरामाथि दाइँ गरिन्‍छ। तर सूँप लहुरोले र जीराचाहिँ एउटा लहुरोले चुटिन्‍छ।

²⁸रोटी बनाउने अन्‍न पिँधिनैपर्छ, कसैले त्‍यसलाई चुटिरहँदैन। अनि त्‍यसले गाड़ाको पाङ्‌ग्रा त्‍यसमाथि गुड़ाए तापनि घोड़ाले त्‍यो पिँध्‍दैन।

²⁹यी सबै पनि सर्वशक्तिमान्‌ परमप्रभुबाटै हुन आउँछ, जो सल्‍लाह दिनमा उदेकका र बुद्धिमा सर्वोत्तम हुनुहुन्‍छ।