Read Nepali New Revised Version, 2012 यशैया 3 Bible Online

यशैया 3 - Nepali New Revised Version, 2012 bible

यशैया 3

¹अब हेर, प्रभु, सर्वशक्तिमान्‌ परमप्रभुले यरूशलेम र यहूदाबाट आपूर्ति र समर्थन, भोजन र पानीका सबै आपूर्ति,

²वीर र योद्धा, न्‍यायकर्ता र अगमवक्ता, जोखना हेर्ने र धर्म-गुरु,

³पचासका कप्‍तान र उच्‍च मानिस, सल्‍लाहकार, निपुण कारीगर र चलाख जादूगरलाई लैजानै लाग्‍नुभएको छ।

⁴तिनीहरूमाथि ठिटाहरूलाई म शासक तुल्‍याइदिनेछु, र ससाना बालकहरूले तिनीहरूमाथि शासन गर्नेछन्‌।

⁵एउटा मानिसले अर्कालाई दमन गर्नेछ। एउटा मानिस अर्को मानिसको विरुद्ध, छिमेकी छिमेकीको विरुद्ध, बुढापाकाको विरुद्ध ठिटा र आदरणीयको विरुद्धमा तुच्‍छ उठ्‌नेछ।

⁶भाइहरूमध्‍येका एउटालाई आफ्‍नै मानिसले आफ्‍नै बुबाकै घरमा पक्रेर भन्‍नेछ, “तिम्रो त पोशाक छ, तिमी हाम्रा नेता होऊ, र यो अवशेषका थुप्रोको जिम्‍मा तिमीले लेऊ!”

⁷तर त्‍यस दिन त्‍यसले चर्को सोरमा भन्‍नेछ, “भत्‍केकोलाई बनाउने मेरो त उपाय नै छैन। मेरो घरमा भोजन र लुगाफाटा नै छैन। मलाई मानिसहरूका नेता नबनाऊ।”

⁸यरूशलेम धरमरिँदैछ, यहूदाको पतन हुँदैछ, तिनीहरूका वचन र काम परमप्रभुको विरुद्धमा छन्, उहाँको महिमापूर्ण उपस्‍थितिलाई तिनीहरू खुल्‍लमखुल्‍ला विरोध गर्छन्‌।

⁹तिनीहरूका अनुहारले नै तिनीहरूका विरुद्धमा गवाही दिन्‍छन्‌। सदोमझैँ तिनीहरू आफ्‍नो पापको प्रदर्शन गर्दछन्‌। तिनीहरू यसलाई लुकाउँदैनन्‌। तिनीहरूलाई धिक्‍कार! तिनीहरूले आफैमाथि सर्वनाश ल्‍याएका छन्‌।

¹⁰धर्मी मानिसहरूलाई भन, कि तिनीहरूलाई असलै हुनेछ, किनकि तिनीहरूले आफ्‍नो सुकर्मको फल भोग्‍नेछन्‌।

¹¹दुष्‍ट मानिसहरूलाई धिक्‍कार! तिनीहरूमाथि सर्वनाश परेको छ, किनकि तिनीहरूका हातले गरेको कामको प्रतिफल तिनीहरूले पाउनेछन्‌।

¹²मेरो प्रजालाई युवाहरूले अत्‍याचार गर्दछन्, र स्‍त्रीहरूले तिनीहरूमाथि शासन गर्छन्‌। हे मेरा प्रजा, तिमीहरूलाई डोर्‍याउनेहरूले तिमीहरूलाई बरालेर लगेका छन्, र तिनीहरूले तिमीहरूलाई बाटोबाट फर्काउँछन्‌।

¹³परमप्रभु न्‍यायालयमा आफ्‍नो स्‍थान लिनुहुन्‍छ, आफ्‍नो प्रजाको इन्‍साफ गर्नलाई उहाँ उठ्‌नुहुन्‍छ।

¹⁴आफ्‍ना प्रजाका धर्म-गुरुहरू र शासकहरूका विरुद्धमा परमप्रभुले न्‍याय गर्नुहुन्‍छ। “मेरो दाखबारी नष्‍ट पार्ने तिमीहरू नै हौ। गरीबहरूलाई लुटेका माल तिमीहरूकै घरमा छन्‌।

¹⁵तिमीहरूले मेरा प्रजालाई दबाएको र गरीबहरूका अनुहारलाई पिँधेको मतलब के हो?” प्रभु, सर्वशक्तिमान्‌ परमप्रभु भन्‍नुहुन्‍छ।

¹⁶परमप्रभु भन्‍नुहुन्‍छ, “सियोनका स्‍त्रीहरू अहङ्कारी छन्, र मुण्‍टो ठाड़ो गर्दै, चञ्‍चले आँखा गर्दै, कल्‍ली पहिरी छमछम गर्दै ससाना कदम चालेर हिँड्‌छन्‌।

¹⁷यसकारण परमप्रभुले सियोनका स्‍त्रीहरूका टाउकोमा घावै-घाउ भरिदिनुहुन्‍छ। परमप्रभुले तालु खुइले बनाइदिनुहुन्‍छ।”

¹⁸त्‍यस दिन परमप्रभुले तिनीहरूका सिङ्गारका गहनाहरू, अर्थात्‌ चुरा र शिरबन्‍दी, चन्‍द्रहार,

¹⁹कुण्‍डल, बाला, झुम्‍का,

²⁰मुकुट-घुम्‍टा, कल्‍ली, पटुका, अत्तरदानी र जन्‍तर,

²¹छाप-औँठी र नत्‍थ,

²²सुन्‍दर पोशाक, अलखा, कोट र थैली,

²³हाते-ऐना र मसिनो मलमल, मुकुट र दोसल्‍लाहरू हटाउनुहुनेछ।

²⁴सुगन्‍धित मसलाको सट्टामा सड़ेको दुर्गन्‍ध हुनेछ, र पटुकाको सट्टामा डोरी, राम्ररी बाटेको कपालको सट्टामा मुडुली हुनेछ, सुन्‍दर वस्‍त्रको सट्टामा भाङ्‌ग्राको लुगा र सुन्‍दरताको सट्टामा डामै-डाम हुनेछ।

²⁵तेरा मानिसहरू तरवारले मारिनेछन्, तेरा वीरहरू लड़ाइँमा नष्‍ट हुनेछन्‌।

²⁶सियोनका मूल ढोकाहरूले विलाप गर्नेछन्‌ र रुनेछन्‌। भूइँमा नाङ्गै बसेकी स्‍त्रीजस्‍तै त्‍यो सहर उजाड़ हुनेछ।