Read Nepali New Revised Version, 2012 यशैया 31 Bible Online

यशैया 31 - Nepali New Revised Version, 2012 bible

यशैया 31

¹धिक्‍कार तिनीहरूलाई, जो मिश्रदेशमा सहायताको निम्‍ति जान्‍छन्, र घोड़ाहरूमा भर पर्दछन्, र तिनीहरूका असंख्‍य रथहरू र घोड़चढ़ीहरूको ठूलो शक्तिमा भरोसा गर्दछन्, तर तिनीहरूले इस्राएलका परमपवित्रतिर हेर्दैनन्‌ र परमप्रभुको सहायतालाई खोज्‍दैनन्‌।

²तापनि उहाँ पनि बुद्धिमान्‌ हुनुहुन्‍छ र उहाँले नाश ल्‍याउन सक्‍नुहुन्‍छ, र आफ्‍नो वचन फिर्ता लिनुहुन्‍न। कुकर्म गर्नेहरूको घराना र अधर्म काम गर्नेलाई सहायता दिनेहरूका विरुद्धमा उहाँ उठ्‌नुहुनेछ।

³तर मिश्रीहरू त मानिसहरू हुन्‌ र परमेश्‍वर होइनन्‌। तिनीहरूका घोड़ाहरू शरीर हुन्, आत्‍मा होइनन्‌। जब परमप्रभुले आफ्‍नो हात पसार्नुहुनेछ, तब सहायता गर्नेले ठोकर खानेछ, र सहायता पाउने लोट्‌नेछ, र ती दुवै एकैसाथ नष्‍ट हुनेछन्‌।

⁴परमप्रभुले मलाई यसो भन्‍नुहुन्‍छ, “जसरी सिंह अथवा ठूलो सिंह आफ्‍नो शिकारमाथि घुर्रघुर्र गर्छ— र त्‍यसको विरुद्धमा गोठालाहरूको सम्‍पूर्ण दल उठे तापनि तिनीहरूको कराइले त्‍यो डराउँदैन, न त तिनीहरूको हल्‍लाले त्‍यो विचलित हुन्‍छ— त्‍यसै गरी सर्वशक्तिमान्‌ परमप्रभु सियोन पर्वत र त्‍यसका डाँड़ाहरूमा लड़ाइँ गर्नलाई ओर्लनुहुनेछ।

⁵चराहरूले आफ्‍ना गुँडलाई रक्षा गरेझैँ सर्वशक्तिमान्‌ परमप्रभुले यरूशलेमको रक्षा गर्नुहुनेछ। उहाँले त्‍यसलाई रक्षा गर्नुहुनेछ, र त्‍यसलाई छुटाउनुहुनेछ। उहाँ त्‍यसबाट भएर जानुहुनेछ र त्‍यसलाई छुटाउनुहुनेछ।”

⁶हे इस्राएली हो, जसको विरुद्धमा तिमीहरूले ठूलो विद्रोह गरेका छौ, उहाँतर्फ फर्क।

⁷किनभने त्‍यस दिन तिमीहरू हरेकले आफ्‍ना सुनका र चाँदीका मूर्तिहरू, जो तिमीहरूले आफ्‍नै पापी हातले बनाएका छौ, तिनलाई इन्‍कार गर्नेछौ।

⁸“अश्‍शूरीहरू तरवारले ढालिनेछन्, जुन तरवार मानिसबाटको होइन। त्‍यसै तरवारले तिनीहरू नष्‍ट हुनेछन्, जो मरणशील मानिसको होइन। त्‍यस तरवारको अगाड़ि तिनीहरू भाग्‍नेछन्, र तिनीहरूका जवान मानिसहरूचाहिँ बेगारी काममा लगाइनेछन्‌।

⁹तिनीहरूको किल्‍ला त्रासले गर्दा ढल्‍नेछ र तिनीहरूका सेनापतिहरू लड़ाइँको झन्‍डा देखेर डरले आत्तिनेछन्‌। परमप्रभु, जसको अग्‍नि सियोनमा र भट्टी यरूशलेममा छ, उहाँले भन्‍नुभएको छ।