Read Nepali New Revised Version, 2012 यशैया 34 Bible Online

यशैया 34 - Nepali New Revised Version, 2012 bible

यशैया 34

¹हे जाति-जातिका मानिस हो, नजिक आओ र ध्‍यानसित सुन। हे मानिस हो, ध्‍यान लगाएर सुन! पृथ्‍वी र त्‍यसमा भएका जम्‍मैले सुनून्, संसार र त्‍यसबाट उत्‍पन्‍न भएका सारा थोकले सुनून्‌!

²परमप्रभुको रीस सारा जातिहरूमाथि उठेको छ, उहाँको क्रोध तिनका सारा सेनामाथि परेको छ। उहाँले तिनीहरूलाई बिलकुलै नाश गर्नुहुनेछ, हत्‍या गर्नेको हातमा उहाँले तिनीहरूलाई सुम्‍पनुहुनेछ।

³तिनीहरूका मारिएकाहरू बाहिर फालिनेछन्, र तिनीहरूका लाशबाट दुर्गन्‍ध निस्‍कनेछ, र पर्वतहरू तिनीहरूका रगतले भिज्‍नेछ।

⁴आकाशका सबै ताराहरू विलीन हुनेछन्‌। र आकाशचाहिँ चर्मपत्रको मुट्ठोझैँ बेह्रिनेछ, दाखको बोटबाट ओइलिएका पातहरू र अञ्‍जीरको बोटबाट चाउरी परेका फलहरू झरेझैँ आकाशका तारानक्षत्रहरू झर्नेछन्‌।

⁵मेरो तरवारले स्‍वर्गमा अघाउञ्‍जेल पिएको छ। हेर, इन्‍साफको लागि एदोममाथि त्‍यसको प्रहार पर्नेछ, त्‍यस जातिमाथि जसलाई मैले सर्वनाश गरेको छु।

⁶परमप्रभुको तरवार रगतमा चोपिएको छ। त्‍यो बोसोले भरिएको छ— भेड़ा-बाख्राहरूको रगतले, भेड़ाबाख्राका मिर्गौलाको बोसोले त्‍यो लतपत भएको छ। किनभने बोज्रामा परमप्रभुको एउटा बलि छ, र एदोममा एक ठूलो संहार।

⁷अर्नाहरू तिनीहरूसित, र बाछाहरू र ठूला-ठूला साँढ़ेहरू सोतर हुन्‍छन्‌। तिनीहरूका देश रगतले निथ्रुक्‍क हुनेछन्‌ र तिनीहरूको बोसोले सम्‍पूर्ण माटो भरिनेछ।

⁸किनभने सियोनको पक्षमा परमप्रभुको बदला लिने एक दिन छ, साटो लिने एक वर्ष छ।

⁹एदोमका खोलाहरू अलकत्रामा, त्‍यसको धूलो जलिरहेको गन्‍धकमा, र त्‍यसको देशचाहिँ बल्‍दो अलकत्रामा परिवर्तन हुनेछ।

¹⁰त्‍यो रातदिन निभ्‍नेछैन। त्‍यसको धूवाँ निरन्‍तर उठिरहनेछ। पुस्‍तादेखि पुस्‍तासम्‍म त्‍यो उजाड़ भएर रहनेछ, त्‍यसबाट भएर कोही पनि फेरि कहिल्‍यै जानेछैन।

¹¹तर मरुभूमिको लाटोकोसेरो र कराउने लाटोकोसेराको त्‍यो वासस्‍थान हुनेछ, भुल्‍का र कागहरूले त्‍यसमा गुँड़ बनाउनेछन्‌। परमेश्‍वरले एदोममाथि खैलाबैलाको नाप्‍ने डोरी र शून्‍यताको साहुल तान्‍नुहुनेछ।

¹²त्‍यसका भारदारहरूसित त्‍यसलाई राज्‍य भनिने केही पनि रहनेछैन, र त्‍यसका राजकुमारहरू लोप हुनेछन्‌।

¹³त्‍यसका किल्‍लाका बुर्जाहरूमा काँढ़ा, र त्‍यसका किल्‍लाहरूमा सिस्‍नु र सिउँड़ीहरू उम्रनेछन्‌। त्‍यो स्‍यालहरूको बस्‍ने अखड़ा र लाटोकोसेराहरूको घर हुनेछ।

¹⁴मरुभूमिका जनावरहरू हुँड़ारहरूसित मिलेर त्‍यहाँ बस्नेछन्, जङ्गली बाख्राहरूले आफ्‍नो साथीलाई डाक्‍नेछन्, रातका जन्‍तुहरूले पनि विश्राम गर्ने ठाउँ पाएर त्‍यहाँ विश्राम गर्नेछन्‌।

¹⁵त्‍यहाँ लाटोकोसेराले आफ्‍नो गुँड़ बनाएर फुल पार्नेछ, र ओथ्रनेछ, र आफ्‍नो पखेटाको छायामुनि बचेराहरूलाई हेरचाह गर्नेछ। त्‍यहाँ भालेपोथी बाजहरू आ-आफ्‍ना जोड़ीसित जम्‍मा हुनेछन्‌।

¹⁶परमप्रभुको पत्रको मुट्ठामा हेर र पढ़। यिनमा एउटै पनि हराउनेछैन, कसैलाई आफ्‍नो जोड़ीको अभाव हुँदैन, किनकि उहाँको मुखले यो हुकुम दिनुभएको हो, र उहाँका आत्‍माले तिनीहरूलाई एकसाथ जम्‍मा गर्नुहुनेछ।

¹⁷उहाँले तिनीहरूका भाग छुट्ट्याइदिनुहुन्‍छ। उहाँकै हातले नापेर तिनीहरूलाई बाँड़िदिनुभएको छ। तिनीहरूले सदासर्वदा त्‍यो अधिकार गर्नेछन्, र पुस्‍तादेखि पुस्‍तासम्‍म तिनीहरू त्‍यहाँ वास गर्नेछन्‌।