Read Nepali New Revised Version, 2012 यशैया 35 Bible Online

यशैया 35 - Nepali New Revised Version, 2012 bible

यशैया 35

¹मरुभूमि र निर्जल-भूमि हर्षित हुनेछन्‌। उजाड़-स्‍थान रमाउनेछ र फुल्‍नेछ केशरझैँ

²त्‍यो फुलेर फक्रनेछ। यो अत्‍यन्‍त प्रफुल्‍लित हुनेछ, र हर्षले गाउँदै रमाहट गर्नेछ। लेबनानको गौरव, कर्मेल र शारोनको शोभा त्‍यसलाई दिइनेछ। तिनीहरूले परमप्रभुको महिमा र हाम्रा परमेश्‍वरको ऐश्‍वर्य देख्‍नेछन्‌।

³कमजोर हातहरू बलिया बनाओ, र दुर्बल घुँड़ाहरू दह्रा पार।

⁴डरले हृदय भरिएकाहरूलाई भन, “साहस गर, नडराओ। तिमीहरूका परमेश्‍वर बदला दिनलाई आउनुहुनेछ, ईश्‍वरीय प्रतिफलसहित तिमीहरूलाई बचाउनलाई उहाँ आउनुहुनेछ।”

⁵तब अन्‍धाहरूका आँखा खोलिनेछन्, र बहिराहरूका कान उघारिनेछन्‌।

⁶तब लङ्गड़ाहरू मृगझैँ उफ्रनेछन्, र गूँगाहरूको जिब्रोले स्‍तुति गर्नेछ। उजाड़-स्‍थानमा पानी फुटेर निस्‍कनेछ र मरुभूमिमा खोलाहरू बग्‍नेछन्‌।

⁷गर्मीले डढ़ेको बालुवा दह हुनेछ, र सुक्‍खा भूमिमा पानीका मूल फुट्‌नेछन्‌। स्‍यालहरू बस्‍ने ठाउँमा घाँस, काँस र कुश उम्रनेछन्‌।

⁸त्‍यहाँ एउटा मूलबाटो हुनेछ, त्‍योचाहिँ पवित्रताको बाटो भनिनेछ। कोही अशुद्ध जन त्‍यसबाट भएर जानेछैन। तर त्‍यस मार्गमा हिँड्‌नेहरूका निम्‍ति मात्र त्‍यो हुनेछ। दुष्‍ट मूर्खहरू त्‍यसबाट जान पाउनेछैनन्‌।

⁹त्‍यहाँ कुनै सिंह हुनेछैन, न त कुनै हिंसक पशु त्‍यहाँबाट भएर जानेछ। ती त्‍यहाँ पाइनेछैनन्‌। तर उद्धार पाएकाहरू मात्र त्‍यहाँ हिँड्‌नेछन्,

¹⁰अनि परमप्रभुले मोल तिरेर छुटकारा दिनुभएकाहरू फर्केर आउनेछन्‌। तिनीहरू सियोनमा गाउँदै पस्‍नेछन्‌। सदासर्वदाको आनन्‍द तिनीहरूका शिरको मुकुट हुनेछ। तिनीहरूले रमाहट र आनन्‍द प्राप्‍त गर्नेछन्, र शोक र सुस्‍केरा दूर हुनेछन्‌।