Read Nepali New Revised Version, 2012 यशैया 38 Bible Online

यशैया 38 - Nepali New Revised Version, 2012 bible

यशैया 38

¹त्‍यस बेला हिजकिया राजा बिरामी परेर मर्नै लागेका थिए। तब आमोजका छोरा यशैया अगमवक्ताले तिनीकहाँ आएर भने, “परमप्रभु यसो भन्‍नुहुन्‍छ: तेरो घर ठीकठाक गर्, किनकि तँ मर्नेछस्, तँ निको हुनेछैनस्‌।”

²तब हिजकियाले आफ्‍नो मुख भित्तातिर फर्काएर परमप्रभुसित यसो भनेर प्रार्थना गरे,

³“हे परमप्रभु, तपाईंको सामुन्‍ने म कस्‍तो विश्‍वासयोग्‍य भई सारा हृदयको भक्तिसाथ हिँड़ेको छु, र तपाईंको दृष्‍टिमा जे असल छ त्‍यही गरेको छु, त्‍यसको सम्‍झना होस्‌।” अनि हिजकिया धुरुधुरु रोए।

⁴तब परमप्रभुको वचन यशैयाकहाँ यसो भनेर आयो,

⁵“गएर हिजकियालाई भन्, ‘तेरा पिता दाऊदका परमप्रभु परमेश्‍वर यसो भन्‍नुहुन्‍छ: मैले तेरो प्रार्थना सुनें र मैले तेरो आँसु देखें। म तेरो आयु अरू पन्‍ध्र वर्ष बढ़ाइदिनेछु।

⁶म तँलाई र यस सहरलाई अश्‍शूरका राजाको हातबाट छुटकारा दिनेछु। म यस सहरको रक्षा गर्नेछु।

⁷“‘परमप्रभु आफैले प्रतिज्ञा गर्नुभएको कुरो गर्नुहुनेछ भन्‍ने परमप्रभुको चिन्‍ह तँलाई यो हुनेछ:

⁸आहाजको सिँढ़ीमा घामको छाया, जो तल गइसकेको छ, म दश खुट्‌किला पछि सार्नेछु’।” यसैले घामको छाया तलतिर गएको भए तापनि दश खुट्‌किला पछि सर्‍यो।

⁹बिरामी परेर निको भएपछि यहूदाका राजा हिजकियाले लेखेका कुरा:

¹⁰मैले भनें, “के मेरो आयुको मस्‍त जवानीमा नै मृत्‍युको ढोकाभित्र जानुपर्ने र मेरो आयुको शेष भाग हरण हुने?”

¹¹मैले भनें, “म परमप्रभुलाई फेरि देख्‍नेछैनँ, जीवितहरूको देशमा परमप्रभुलाई म देख्‍नेछैनँ। मानव-जातिलाई म अब देख्‍नेछैनँ, न त संसारमा अहिले बस्‍नेहरूसँग म हुनेछु।

¹²गोठालाको पालझैँ मेरो घर भत्‍काएर मबाट खोसी लगियो। जुलाहाले लुगा बेहेरेझैँ मैले मेरो जीवन बेहेरेको छु, र उहाँले मलाई तानबाट काटिदिनुभएको छ। दिन र रातभरिमा नै तपाईंले मेरो अन्‍त गराइदिनुभयो।

¹³बिहानसम्‍म म धैर्यसाथ पर्खिबसें। तर सिंहले झैँ उहाँले मेरा सबै हड्डी भाँच्‍नुभयो। दिन र रातभरिमा नै तपाईंले मेरो अन्‍त गराइदिनुभयो।

¹⁴गौँथलीझैँ वा सारिका चराझैँ म चिरबिर गर्थें। ढुकुरझैँ विलाप गर्थें, माथितिर हेर्दा-हेर्दा मेरा आँखा टट्टाइसके। हे परमप्रभु, म दु:खमा परेको छु। तपाईं मलाई सहायता गर्नुहोस्‌।”

¹⁵तर म अब के भन्‍न सक्‍छु र? उहाँ मसित बोल्‍नुभयो, र उहाँले नै यो गर्नुभयो। मेरो प्राणको यो सुर्ताको कारण म मेरो सारा जीवनभरि नै नम्र भएर हिँड्‌नेछु।

¹⁶हे परमप्रभु, यी नै कुराद्वारा मानिसहरू जिउँछन्, र मेरो आत्‍माले पनि तिनमा नै जीवन पाउँछ। तपाईंले मलाई स्‍वस्‍थ पार्नुभयो, र मलाई बाँच्‍न दिनुभयो।

¹⁷निश्‍चय नै मेरो भलाइको निम्‍ति मैले यस्‍तो वेदना सहनुपर्‍यो। तपाईंले मलाई प्रेम गरेर विनाशको खाड़लबाट जोगाउनुभयो। तपाईंले मेरा सबै पाप आफ्‍नै पछिल्‍तिर राख्‍नुभयो।

¹⁸पातालले तपाईंको प्रशंसा गर्न सक्‍दैन। मृत्‍युले तपाईंको प्रशंसा गर्न सक्‍दैन। खाड़लमा जानेहरूले तपाईंका विश्‍वस्‍तताको आशा गर्न सक्‍दैनन्‌।

¹⁹जीवित, जीवितले मात्र तपाईंको प्रशंसा गर्छ, जसरी आज म गरिरहेछु। बुबाहरूले आफ्‍ना छोराछोरीहरूलाई तपाईंको विश्‍वस्‍तताको विषयमा वर्णन गर्छन्‌।

²⁰परमप्रभुले मलाई उद्धार गर्नुहुनेछ, र हामी आफ्‍ना जीवनभरि परमप्रभुको मन्‍दिरमा तार-बाजाहरूसित भजन गाउनेछौं।

²¹यशैयाले यसो भनेका थिए, “नेभाराको लेप बनाएर हिजकियाको पिलोमा लगाइदेओ, र तिनी निको हुनेछन्‌।”

²²हिजकियाले यसो भनेर सोधेका थिए, “म परमप्रभुको मन्‍दिरमा जानेछु भन्‍ने चिन्‍ह के हुनेछ?”