Read Nepali New Revised Version, 2012 यशैया 41 Bible Online

यशैया 41 - Nepali New Revised Version, 2012 bible

यशैया 41

¹“हे टापू हो, मेरो सामुन्‍ने चूपचाप बस। जाति-जातिले नयाँ बल प्राप्‍त गरून्‌! तिनीहरू नजिक आऊन्‌ र बोलून्‌। हामी एकसाथ न्‍यायालयमा जम्‍मा होऔं।

²उहाँको सेवा गर्न धार्मिकतामा बोलाउँदै कसले पूर्व दिशाबाट एक जनालाई उत्तेजित गरेको छ? उहाँले जाति-जातिहरूलाई तिनको अधीनमा पारिदिनुहुन्‍छ, र राजाहरूलाई तिनको सामुन्‍ने आफ्‍नो अधिकारमा ल्‍याउनुहुन्‍छ। तिनले उनीहरूलाई आफ्‍नो तरवारले धूलोजस्‍तै र आफ्‍नो धनुले उड़ाएको भुसजस्‍तै पारिदिन्‍छन्‌।

³तिनले उनीहरूलाई खेद्‌छन्, अघि कहिल्‍यै यात्रा नगरेका बाटाहरू भएर तिनी विनाक्षति बढ्‌दैजान्‍छन्‌।

⁴प्रारम्‍भदेखि पुस्‍ताहरूलाई बोलाएर यो काम पूरा गर्ने को हो? के म नै होइन र? म, परमप्रभु, तिनीहरूका पहिलो र पछिल्‍लोसित रहने म उही नै हुँ।”

⁵टापूहरूले यो देखे र डराए। पृथ्‍वीका पल्‍लो छेउसम्‍मका देशहरू कामे। तिनीहरू नजिक गई अगाड़ि आउँछन्‌।

⁶एउटाले अर्कोलाई सहायता गर्छ, र आफ्‍नो भाइलाई भन्‍छ, “ढाड़स गर।”

⁷निपुण कारीगरले सुनारलाई साहस दिन्‍छ र लिहीमाथि चुट्‌नेलाई घनले सम्‍म्‍याउनेले प्रोत्‍साहन दिन्‍छ। त्‍यसले रसायनको विषयमा भन्‍छ, “यो असलै छ,” र त्‍यो नहल्‍लिओस्‌ भनेर मूर्तिलाई कीला ठोकेर बलियो बनाउँछ।

⁸“तर तँ, ए इस्राएल मेरो दास, याकूब, जसलाई मैले छानेको छु। मेरो मित्र अब्राहामको वंश,

⁹तँलाई मैले पृथ्‍वीको अन्‍तदेखि समातेर ल्‍याएँ, र पृथ्‍वीको पल्‍लो छेउदेखि तँलाई बोलाएँ। मैले भनें, ‘तँ मेरो दास होस्‌।’ मैले तँलाई छानेको छु, र तँलाई इन्‍कार गरेको छैनँ।

¹⁰यसैले नडरा, किनकि म तँसित छु। निरुत्‍साहित नहो, किनकि म तेरा परमेश्‍वर हुँ। म तँलाई बलियो पार्नेछु। म तँलाई सहायता गर्नेछु। मेरो धार्मिकताको दाहिने हातले म तँलाई सम्हाल्‍नेछु।

¹¹“तँदेखि रिसाउनेहरू सबै निश्‍चय नै लज्‍जित हुनेछन्, र शर्ममा पर्नेछन्‌। तेरो विरोध गर्नेहरू केही न केहीका हुनेछन्‌ र नष्‍ट हुनेछन्‌।

¹²तेरा शत्रुहरूलाई तैंले खोजे पनि उनीहरूलाई भेट्टाउनेछैनस्‌। तेरो विरोधमा युद्ध गर्नेहरू पनि बिलकुल निरर्थक हुनेछन्, र नष्‍ट हुनेछन्‌।

¹³किनकि म, परमप्रभु तेरा परमेश्‍वर हुँ, म तेरो दाहिने हात समात्‍छु, र तँलाई यसो भन्‍छु, ‘नडरा, म तँलाई सहायता गर्नेछु’।

¹⁴ए कीरा याकूब, ए सानो इस्राएल, नडरा! किनकि म नै तेरो सहायता गर्नेछु,” तँलाई उद्धार गर्नुहुने इस्राएलका परमपवित्र परमप्रभु घोषणा गर्नुहुन्‍छ।

¹⁵“हेर्, म तँलाई नयाँ र तीखा दाँत भएको अन्‍न कुट्‌ने हतियार बनाउनेछु। तैंले पर्वतहरूलाई छाँट्‌नेछस्, र कुटी-कुटी धूलोपीठो बनाउनेछस्, र डाँड़ाहरूलाई भुस पार्नेछस्‌।

¹⁶तैंले तिनीहरूलाई निफन्‍नेछस्, र बतासले तिनलाई उठाएर लैजानेछ, र आँधीले तिनीहरूलाई उड़ाएर लैजानेछ। तर तँचाहिँ परमप्रभुमा रमाहट गर्नेछस्‌। तैंले इस्राएलका परमपवित्रको महिमा गर्नेछस्‌।

¹⁷“गरीब र दरिद्रहरूले पानी खोज्‍छन्, तर केही पनि हुँदैन, तिनीहरूको जिब्रो प्‍यासले सुक्‍नेछ। तर म परमप्रभुले तिनीहरूलाई जवाफ दिनेछु। म इस्राएलका परमेश्‍वरले तिनीहरूलाई त्‍याग्‍नेछैनँ।

¹⁸नाङ्गो टाकुराहरूबाट म नदीहरू बगाउनेछु, र बेँसीमा पानीका मूलहरू निकाल्‍नेछु। म मरुभूमिलाई पानीको दह, र सुक्‍खा जमिनलाई पानीका मूलमा परिवर्तन गर्नेछु।

¹⁹मरुभूमिमा म देवदारुहरू र बबुल, असारे-फूल र जैतूनका रूखहरू उमार्नेछु। म रूखो जमिनमा सल्‍लाहरू र धूपीका रूखहरू एकसाथ उमार्नेछु,

²⁰ताकि मानिसहरूले देखेर जानून्‌ र विचार गरून्‌ र पूरा रीतिले बुझून्‌ कि यो परमप्रभुका हातको काम हो, अर्थात्‌ इस्राएलका परमपवित्रले गर्नुभएको हो।

²¹“आफ्‍नो मुद्दा-मामिला पेश गर,” परमप्रभु भन्‍नुहुन्‍छ। “आफ्‍नो तर्क ल्‍याओ,” याकूबका महाराजाधिराज भन्‍नुहुन्‍छ।

²²“जे हुन आउनेछ सो बताइदिन तिमीहरूका मूर्तिहरूलाई ल्‍याओ। यसरी भइसकेका कुरा हामीलाई बताइदेओ, र हामी तिनको विचार गरौं, र तिनको आखिरी नतीजा के हुन्‍छ भनी हामी जान्‍न सकौं। अथवा हुन आउने कुरा हामीलाई बताइदेओ।

²³अब आउने कुराहरू हामीलाई प्रकट गर, र तिमीहरू ईश्‍वर हौ भनी हामी जान्‍न सकौंला। असल वा खराब केही गर, कि हामी हरेस खाऔं अनि डरमा परौं।

²⁴तर तिमीहरू त कामै नलाग्‍ने हौ, र तिमीहरूका काम बिलकुलै व्‍यर्थका छन्‌। जसले तिमीहरूलाई चुन्‍छ त्‍यो घृणित हुन्‍छ।

²⁵“मैले कसैलाई उत्तर दिशादेखि उक्‍साएको छु, र तिनी आउँछन्‌। सूर्य उदय हुने दिशाबाट आएर तिनले मेरो नाउँ लिन्‍छन्‌। तिनले हिलोलाई कुल्‍चेझैँ शासकहरूलाई कुल्‍चनेछन्, कुमालेले माटो कुल्‍चेझैँ।

²⁶सुरुदेखि कसले यो प्रकट गरेको छ र हामीले जान्‍न सक्‍थ्‍यौं? अथवा अघिदेखि कसले यो प्रकट गर्‍यो र उहाँ ठीकै हुनुहुन्‍थ्‍यो भनी हामी भन्‍न सक्‍थ्‍यौं? यो कुरा कसैले हामीलाई बताएन, पहिले कसैले एक वचन पनि भनेन। तिमीहरूका वचन सुन्‍ने कोही थिएन।

²⁷सियोनलाई ‘हेर, तिनीहरू त यहाँ छन्‌’ भन्‍ने सबैभन्‍दा पहिले म नै थिएँ। यरूशलेमलाई शुभ समाचार दिन एक जना समाचारवाहक पठाउने म नै थिएँ।

²⁸म खोज्‍छु, तर त्‍यहाँ कोही पनि छैन। सल्‍लाह दिनका लागि तिनीहरूका बीचमा कोही पनि छैन। तिनीहरूलाई सोध्‍दा कसैले जवाफ दिँदैन।

²⁹हेर, ती सबै झूटा हुन्‌! तिनीहरूका काम केही मोलका छैनन्‌। तिनीहरूका मूर्तिहरू हावा र अलमल मात्र हुन्‌।