Read Nepali New Revised Version, 2012 यशैया 42 Bible Online

यशैया 42 - Nepali New Revised Version, 2012 bible

यशैया 42

¹“मेरा दास यहाँ छन्, जसलाई म समर्थन गर्दछु, मेरो चुनिएका जन, जसमा म प्रसन्‍न हुन्‍छु। तिनमा म मेरो आत्‍मा राखिदिनेछु। तिनले जाति-जातिहरूमा न्‍याय ल्‍याउनेछन्‌।

²तिनी चिच्‍च्‍याउनेछैनन्, वा कराउनेछैनन्‌ अथवा तिनले आफ्‍नो सोर सड़कमा सुनाउनेछैनन्‌।

³फुटेको निगालो तिनले भाँच्‍नेछैनन्, र धिपधिप भइरहेको सलेदो तिनले निभाउनेछैनन्‌। तिनले विश्‍वस्‍ततामा न्‍याय गर्नेछन्‌।

⁴जबसम्‍म तिनले पृथ्‍वीमा इन्‍साफ स्‍थापित गरिसक्‍दैनन्‌ तबसम्‍म न त तिनी दुर्बल हुनेछन्, न निरुत्‍साहित हुनेछन्‌। तिनको व्‍यवस्‍थामा टापूहरूले आफ्‍नो आशा राख्‍नेछन्‌।”

⁵परमेश्‍वर परमप्रभु यसो भन्‍नुहुन्‍छ— आकाश सृष्‍टि गरेर त्‍यो फैलाउनुहुने, अनि पृथ्‍वी र त्‍यसबाट उत्‍पन्‍न हुने सबैलाई फैलाउनुहुने, र त्‍यसमा भएका मानिसहरूलाई सास अनि त्‍यसमा हिँड्‌डुल गर्नेहरूलाई आत्‍मा दिनुहुने:

⁶“म, परमप्रभुले तिमीलाई मेरो धार्मिकताअनुसार बोलाएको छु। म तिम्रो हात समात्‍नेछु, र तिम्रो रक्षा गर्नेछु। तिमीलाई नै म जाति-जातिहरूका निम्‍ति करार र अन्‍यजातिहरूका निम्‍ति ज्‍योति बनाउनेछु,

⁷अन्‍धाहरूका आँखा खोल्‍नलाई, कैदीहरूलाई कारागारबाट र अन्‍धकारमा बस्‍नेहरूलाई कैदी राख्‍ने तहखानाबाट निकाल्‍नलाई।

⁸“म परमप्रभु हुँ, मेरो नाउँ त्‍यही हो! मेरो महिमा म अरूलाई दिनेछैनँ, अथवा मेरो प्रशंसा मूर्तिहरूलाई दिनेछैनँ।

⁹हेर, पहिलेका कुराहरू भइसके, र नयाँ कुराहरू म बताउँछु। ती हुनभन्‍दा अघि नै म तिनका विषयमा तिमीहरूलाई प्रकाशित गर्नेछु।

¹⁰परमप्रभुको निम्‍ति एउटा नयाँ भजन गाओ, उहाँको प्रशंसा पृथ्‍वीको पल्‍लो छेउदेखि गर, हे तिमी समुद्रमा यात्रा गर्ने र त्‍यसमा भएका सारा थोक हो, हे टापूहरू र तिनका सबै बासिन्‍दा हो!

¹¹मरुभूमि र त्‍यसमा भएका नगरहरूले आ-आफ्‍ना सोर उचालून्‌। केदार बसेका बस्‍तीहरूसमेतले गाऊन्, सेलाका मानिसहरू आनन्‍दले गाऊन्‌। तिनीहरू पर्वतका टाकुराबाट कराऊन्‌।

¹²तिनीहरूले परमप्रभुलाई महिमा देऊन्, र टापूहरूमा उहाँका प्रशंसाको घोषणा गरून्‌।

¹³परमप्रभु शक्तिशाली पुरुषझैँ निस्‍कनुहुनेछ। एक जना योद्धालेझैँ उहाँले आफ्‍नो जोश देखाउनुहुनेछ। उहाँ कराउनुहुनेछ, र ठूलो सोरले युद्ध-ध्‍वनि उठाउनुहुनेछ। उहाँ आफ्‍ना शत्रुहरूमाथि विजयी हुनुहुनेछ।

¹⁴“धेरै समयसम्‍म म चूपचाप बसें। म शान्‍त बसें, र आफैलाई रोकिराखें। तर बच्‍चा पाउन लागेकी स्‍त्रीझैँ अब म कराउँछु, मलाई स्‍वाँ-स्‍वाँ हुन्‍छ र सास फेर्छु।

¹⁵म पहाड़ र डाँड़ाहरूलाई उजाड़ पार्नेछु, र तिनका सारा वनस्‍पतिलाई सुकाइदिनेछु। नदीहरूलाई म टापूमा परिवर्तन गरिदिनेछु, र दहहरूलाई सुकाइदिनेछु।

¹⁶म अन्‍धाहरूलाई तिनीहरूले नचिनेको बाटोमा डोर्‍याउनेछु। तिनीहरूले नजानेको बाटोमा म तिनीहरूलाई बाटो देखाउँदै लानेछु। म तिनीहरूका अगि अँध्‍यारोलाई उज्‍यालो र खाल्‍टाखुल्‍टी ठाउँलाई सम्‍म बनाउनेछु। यी कामहरू म गर्नेछु। म तिनीहरूलाई त्‍याग्‍नेछैनँ।

¹⁷तर देवताहरूमा भरोसा राख्‍नेहरू, र मूर्तिहरूलाई ‘तपाईंहरू नै हाम्रा ईश्‍वर हुनुहुन्‍छ’ भन्‍नेहरू ठूलो लाजमा पर्नेछन्‌।

¹⁸“हे बहिरा हो, सुन! हे अन्‍धा हो, हेर र देख!

¹⁹मेरो दासबाहेक अन्‍धो अरू को छ? अथवा मैले पठाउने समाचारवाहकजस्‍तो अरू को बहिरा छ? ममा समर्पित हुनेझैँ अन्‍धा को छ? परमप्रभुको दासजस्‍तो अन्‍धा को छ?

²⁰तैंले धेरै कुराहरू देखेको छस्, तर ध्‍यान दिएको छैनस्‌। तेरा कान त खुल्‍लै छन्, तर तैंले केही सुन्‍दैनस्‌।

²¹आफ्‍नो धार्मिकताको खातिर आफ्‍नो व्‍यवस्‍थालाई महान्‌ र महिमित पार्न परमप्रभुलाई खुशी लाग्‍यो।

²²तर यो एउटा यस्‍तो जाति हो, जो ठगिएका र लुटिएका छन्‌। तिनीहरू सबै खाल्‍डामा जाकिएका छन्‌ अथवा तिनीहरू झ्‍यालखानमा लुकाइएका छन्‌। तिनीहरू लुटिएका छन्, तिनीहरूलाई छुटाउने कोही छैन। तिनीहरू लूट बनाइएका छन्, र तिनीहरूलाई फर्काई पठाइदेओ भन्‍ने कोही छैन।

²³तिमीहरूमध्‍ये को छ, जसले यस कुरालाई सुन्‍छ। वा आउने समयमा ध्‍यान दिन्‍छ?

²⁴याकूबलाई लूट बन्‍न, र इस्राएललाई डाँकूहरूका वशमा पर्न कसले सुम्‍पिदियो? के परमप्रभुले होइन र, जसको विरुद्धमा हामीले पाप गरेका छौं? किनकि तिनीहरू उहाँको बाटोमा हिँड़ेनन्, तिनीहरूले उहाँको व्‍यवस्‍था पालन गरेनन्‌।

²⁵यसैकारण उहाँले तिनीहरूमाथि आफ्‍नो बलिरहेको रीस र लड़ाइँको हिंसा पोखाउनुभयो। त्‍यसैले तिनीहरूका चारैतिर आगो सल्‍कियो, तापनि तिनीहरूले बुझेनन्‌। त्‍यसले तिनीहरूलाई भस्‍म पार्‍यो, तापनि तिनीहरूले त्‍यो कुरा मनमा राखेनन्‌।