Read Nepali New Revised Version, 2012 यशैया 49 Bible Online

यशैया 49 - Nepali New Revised Version, 2012 bible

यशैया 49

¹हे टापूहरू हो, मेरो कुरा सुन। हे टाढ़ाका जातिहरू हो, यो कुरा सुन। जन्‍मनुभन्‍दा अघि परमप्रभुले मलाई बोलाउनुभयो। मेरो जन्‍मदेखि नै उहाँले मेरो नाउँको चर्चा गर्नुभएको छ।

²उहाँले मेरो मुख लाग्‍ने तरवारजस्‍तै बनाउनुभयो। उहाँले मलाई आफ्‍नो हातको छहारीमुनि लुकाउनुभयो। उहाँले मलाई चिल्‍लो र टल्‍कने काँड़ बनाउनुभयो, र मलाई आफ्‍नो ठोक्रोमा लुकाइराख्‍नुभयो।

³उहाँले मलाई भन्‍नुभयो, “तँ मेरो दास इस्राएल होस्‌। तँमा नै मेरो ऐश्‍वर्य म प्रकट गर्नेछु।”

⁴तर मैले भनें, “मैले केही अभिप्राय नराखी परिश्रम गरें। मैले व्‍यर्थमा र शून्‍यताको लागि मेरो बल खर्च गरें। तापनि जे मैले पाउनुपर्छ, त्‍यो परमेश्‍वरको हातमा छ, र मेरो प्रतिफल मेरा परमेश्‍वरसित छ।”

⁵अब परमप्रभु भन्‍नुहुन्‍छ— जसले मलाई उहाँको दास हुन, याकूबलाई फेरि उहाँकहाँ ल्‍याउन, र इस्राएललाई उहाँकहाँ जम्‍मा गर्न गर्भदेखि नै रच्‍नुभयो, किनकि परमप्रभुको दृष्‍टिमा म मानको गनिएको छु, र मेरा परमेश्‍वर मेरो बल हुनुभएको छ—

⁶उहाँ भन्‍नुहुन्‍छ: “याकूबका कुलहरूलाई फेरि पुनर्स्‍थापन गर्न र इस्राएलको बाँकी भागलाई फेरि फर्काई ल्‍याउन तँ मेरो दास हुने कुरो तेरो लागि अति सानो कुरो छ। पृथ्‍वीको पल्‍लो छेउसम्‍म तैंले मेरो उद्धार पुर्‍याओस्‌ भनी अन्‍यजातिहरूकहाँ एउटा ज्‍योति पनि म तँलाई बनाउनेछु।”

⁷शासकहरूका दास, जसलाई जाति-जातिहरूले तुच्‍छ ठाने र घृणा गरे, त्‍यसलाई परमप्रभु, उद्धारक र इस्राएलका परमपवित्र भन्‍नुहुन्‍छ: “राजाहरूले तँलाई देख्‍नेछन्‌ र खड़ा हुनेछन्‌। राजकुमारहरूले देख्‍नेछन्‌ र तेरो अघि घोप्‍टो पर्नेछन्‌। किनभने विश्‍वासयोग्‍य परमप्रभु, इस्राएलका परमपवित्रले तँलाई चुन्‍नुभएको छ।”

⁸परमप्रभु यसो भन्‍नुहुन्‍छ: “निगाहको समयमा म तँलाई जवाफ दिनेछु, र उद्धारको दिनमा तँलाई म सहायता दिनेछु। देश पुनर्स्‍थापित गर्न र त्‍यसको नष्‍ट भएका जायजातहरू फेरि अधिकारको निम्‍ति दिन म तँलाई जोगाइराख्‍छु र मानिसहरूका निम्‍ति तँलाई करार बनाउँछु,

⁹कैदीहरूलाई ‘निस्‍केर आओ,’ र अन्‍धकारमा हुनेहरूलाई ‘मुक्त होओ’ भन्‍न। तिनीहरूले बाटोको छेउमा खानेछन्, र सबै रूखा डाँड़ाहरूमा तिनीहरूले खर्क पाउनेछन्‌।

¹⁰तिनीहरू न त भोकाउनेछन्‌ न तिर्खाउनेछन्, न मरुभूमि वा सूर्यको रापले तिनीहरूलाई पोल्‍नेछ, किनकि तिनीहरूमाथि कृपा गर्नेले तिनीहरूलाई डोर्‍याउनुहुनेछ र पानीको धारानेर तिनीहरूलाई अगुवाइ गर्नुहुनेछ।

¹¹म मेरा सबै पर्वतहरू बाटो बनाइदिनेछु, र मेरा मूलबाटाहरू उच्‍च पारिनेछन्‌।

¹²हेर, तिनीहरू टाढ़ादेखि आउनेछन्‌— कोही उत्तरदेखि, कोही पश्‍चिमदेखि र कोही आश्‍वानको देशदेखि आउनेछन्‌।”

¹³हे आकाश, आनन्‍दले चिच्‍च्‍याएर गा। हे पृथ्‍वी, आनन्‍दित हो। हे पर्वतहरू हो, गला खोलेर गाओ! किनकि परमप्रभुले आफ्‍नो प्रजालाई सान्‍त्‍वना दिनुभएको छ, र कष्‍ट पाएको उहाँको प्रजामाथि उहाँले टिठ्याउनुहुनेछ।

¹⁴तर सियोनले भन्‍यो, “परमप्रभुले मलाई त्‍याग्‍नुभएको छ। मेरा परमप्रभुले मलाई बिर्सनुभएको छ।”

¹⁵“के कुनै आमाले आफ्‍नो दूधेबालकलाई बिर्सन सक्‍छे र? आफूले जन्‍माएको बालकलाई के त्‍यसले टिठ्याउँदिनँ र? त्‍यसले बिर्सन पनि सक्‍छे, तर म त तँलाई बिर्सन सक्‍दिनँ।

¹⁶हेर्, मैले तँलाई मेरो हत्‍केलामा खोपेको छु। तेरा पर्खालहरू निरन्‍तर मेरै सामुन्‍ने छन्‌।

¹⁷तेरा छोराहरू हतार-हतार गरी फर्किआउँछन्, र तँलाई उजाड़ पार्नेहरू तेरो सामुन्‍नेबाट निस्‍केर जान्‍छन्‌।

¹⁸तेरा आँखा उचालेर चारैतिर हेर्‌। तेरा छोराहरू सबै जम्‍मा भएर तँकहाँ आउँछन्‌। परमप्रभु घोषणा गर्नुहुन्‍छ, “जस्‍तो म जीवित छु, तँ गहनाले सिँगारिएझैँ यी सबले सिँगारिनेछस्, र दुलहीले झैँ तैंले यी सबै लगाउनेछस्‌।

¹⁹“यद्यपि तँ पतित र नष्‍ट भइस्‌ र तेरो देश रूखो पारियो, तापनि अब तेरा मानिसहरूका लागि तँ साह्रै सानो हुनेछस्, र तँलाई निल्‍नेहरूचाहिँ धेरै टाढ़ा हुनेछन्‌।

²⁰बिछोड़को समयमा जन्‍मेका तेरा छोराछोरीहरूले तैंले सुन्‍ने गरी यसो भन्‍नेछन्, ‘यो जग्‍गा हाम्रा निम्‍ति साह्रै सानो भयो। हामीलाई बस्‍न अझै अरू ठाउँ दिनुहोस्‌।’

²¹तब तैंले तेरो मनमा भन्‍नेछस्, ‘यिनीहरूलाई मेरो लागि कसले जन्‍माए? म बिछोड़मा परेकी, बाँझी, निर्वासित भएकी र त्‍यागिएकी थिएँ। यिनीहरूलाई मेरो निम्‍ति कसले पालनपोषण गर्‍यो? म त एकलै छोड़िएकी थिएँ। तर यिनीहरूचाहिँ कताबाट आए’?”

²²परमप्रभु परमेश्‍वर यसो भन्‍नुहुन्‍छ: “हेर, म अन्‍यजातिहरूलाई हातको इशाराले बोलाउनेछु र मेरो झन्‍डा जाति-जातिहरूका सामुन्‍ने खड़ा गर्नेछु। तिनीहरूले तेरा छोराहरूलाई आफ्‍ना हातमा बोकेर ल्‍याइदिनेछन्, र तेरा छोरीहरूचाहिँ तिनीहरूका काँधमा बोकेर ल्‍याउनेछन्‌।

²³राजाहरू तेरा धर्म-बुबा र तिनीहरूका रानीहरू तेरा स्‍याहार गर्ने आमा हुनेछन्‌। तिनीहरूले भूइँमा घोप्‍टो परेर तँलाई दण्‍डवत्‌ गर्नेछन्, र तेरा खुट्टाको सामुको धूलो चाट्‌नेछन्‌। तब तैंले जान्‍नेछस्‌ कि म परमप्रभु हुँ, मेरो आशा गर्नेहरू निराश हुनेछैनन्‌।”

²⁴के योद्धाहरूबाट लूटको माल खोस्‍न सकिन्‍छ? अथवा निष्‍ठुरहरूका हातबाट कैदीहरूलाई छुटाउन सकिन्‍छ?

²⁵तर परमप्रभु यो भन्‍नुहुन्‍छ: “हो, योद्धाहरूबाट कैदीहरू र निष्‍ठुरहरूबाट लूटको माल खोस्‍न सकिन्‍छ। तँसित झगड़ा गर्नेसँग म झगड़ा गर्नेछु, र तेरा छोराछोरीहरूलाई म बचाउनेछु।

²⁶तँलाई अत्‍याचार गर्नेहरूलाई म तिनीहरूको आफ्‍नै मासु खान लगाउनेछु। दाखमद्यले मातेझैँ तिनीहरू आफ्‍नै रगतले मात्‍नेछन्‌। तब सारा मानिस-जातिले यो कुरा थाहा पाउनेछन्, कि म, परमप्रभु तेरा उद्धारक, मोल तिरेर तँलाई छुटाउने याकूबको शक्तिशाली जन हुँ।”