Read Nepali New Revised Version, 2012 यशैया 5 Bible Online

यशैया 5 - Nepali New Revised Version, 2012 bible

यशैया 5

¹मैले प्रेम गरेको उनको दाखबारीको विषयमा म एउटा गीत गाउनेछु। एउटा अत्‍यन्‍त मलिलो डाँड़ामा मेरा प्रियको एउटा दाखबारी थियो।

²तिनले त्‍यो खने र त्‍यसका ढुङ्गाहरू टिपेर फ्‍याँके, र त्‍यसमा तिनले सबैभन्‍दा असल दाख रोपे। त्‍यसको माझमा तिनले एउटा मचान बनाए र त्‍यहाँ तिनले एउटा कोल पनि खोपे। तब असल दाख फल्‍छ कि भनेर तिनले आशा गर्न लागे, तर त्‍यसमा खराब दाख पो फल्‍यो।

³“अब हे यरूशलेमका बासिन्‍दाहरू र यहूदाका मानिसहरू हो, म र मेरो दाखबारीको बीचमा इन्‍साफ गरिदेओ।

⁴मेरो दाखबारीको निम्‍ति मैले नगरेको चाहिँ के रहेको होला, जो अरू बढ्‌ता मैले गर्नुपर्नेथियो? असल दाख पो फल्‍छ कि भनेर आशा गरेको त किन त्‍यसले खराब दाख मात्र फलायो?

⁵अब म मेरो दाखबारीलाई के गर्नेछु, सो तिमीहरूलाई भन्‍नेछु: म त्‍यसको बार उखेलिदिनेछु, र त्‍यो नष्‍ट हुनेछ। म त्‍यसको पर्खाल भत्‍काइदिनेछु, र त्‍यो कुल्‍चीमिल्‍ची गरिनेछ।

⁶त्‍यसलाई म उजाड़ भूमि पारिदिनेछु। त्‍यो न त छिमलिनेछ न गोड़िनेछ, तर त्‍यसमा सिउँड़ी र काँढ़ाहरू उम्रनेछन्‌। त्‍यसमा पानी नपरोस्‌ भनेर बादललाई पनि म आज्ञा गर्नेछु।”

⁷सर्वशक्तिमान्‌ परमप्रभुको दाखबारी इस्राएलको घराना हो, र यहूदाका मानिसहरू उहाँको आनन्‍दको बगैँचा हो। उहाँले न्‍यायको आशा गर्नुभयो, तर रक्तपात पो भयो, धार्मिकताको आशा गर्नुभयो, तर सङ्कष्‍टको रुवाबासी पो सुनियो।

⁸धिक्‍कार तिमीहरूलाई, जसले केही जग्‍गा नरहने गरी घरसित घर, र खेतसित खेत जोड्‌छौ र तिमीहरू देशको बीचमा एकलै बस्‍छौ।

⁹सर्वशक्तिमान्‌ परमप्रभुले मैले सुन्‍ने गरी भन्‍नुभएको छ, “निश्‍चय नै ठूला-ठूला घरहरू उजाड़ हुनेछन्, र सुन्‍दर भवनहरू निर्जन हुनेछन्‌।

¹⁰पाँच बिघा दाखबारीले पाँच पाथी दाखमद्य, र पचास पाथी बीउले पाँच पाथी अन्‍न मात्र उब्‍जाउनेछ!”

¹¹धिक्‍कार तिनीहरूलाई, जो मद्य पिउन बिहानै उठ्‌छन्, जो मातेर चूर हुन राती अबेरसम्‍म बस्‍छन्‌!

¹²तिनीहरूका भोजहरूमा वीणा, सारङ्गी, खैँजड़ी, बाँसुरी र मद्य हुन्‍छन्, तर तिनीहरू परमप्रभुका कामको वास्‍ता गर्दैनन्‌। तिनीहरू उहाँका हातको कामलाई आदरै गर्दैनन्‌।

¹³यसैकारण मेरा प्रजा असमझदारीको कारण कैदमा पर्नेछन्, र तिनीहरूका उच्‍च दर्जाकाहरू भोकले र तिनीहरूका भीड़हरू प्‍यासले पीडित हुनेछन्‌।

¹⁴यसैकारण चिहानले [1] आफ्‍नो भोक बढ़ाएको छ र आफ्‍नो मुख आँ गरी बाएको छ। तिनीहरूका भारदारहरू र भीड़हरू, तिनीहरूका झगड़िया र हल्‍ला गर्नेहरू त्‍यहीँ भित्र पर्नेछन्‌।

¹⁵यसरी मानिस निहुराइनेछ, र मानिस-जाति विनम्र तुल्‍याइनेछ, र अभिमानीका आँखा झुकाइनेछन्‌।

¹⁶तर सर्वशक्तिमान्‌ परमप्रभुको नाउँ इन्‍साफद्वारा उच्‍च हुनेछ, र पवित्र परमेश्‍वरले आफ्‍नो धार्मिकताद्वारा आफूलाई पवित्र देखाउनुहुनेछ।

¹⁷तब भेड़ाहरू आफ्‍नै खर्कमा झैँ चर्नेछन्, र थुमाहरूलेचाहिँ धनीहरूका अवशेषका बीचमा खानेछन्‌।

¹⁸धिक्‍कार तिनीहरूलाई, जसले पापलाई छलका डोरीले र दुष्‍ट्याइँलाई गाड़ा तान्‍ने डोरीहरूले झैँ तानेर ल्‍याउँछन्,

¹⁹तिनीहरूलाई जसले भन्‍छन्, “परमप्रभुले छिट्टै गरून्, उहाँले आफ्‍नो काम चाँड़ो गरून्‌ र हामी हेरौं। त्‍यो नजिक आओस्, इस्राएलका परमपवित्रको योजना पूरा होस्, र हामी थाहा पाउन सकौं।”

²⁰धिक्‍कार तिनीहरूलाई, जसले खराबलाई असल र असललाई खराब भन्‍दछन्, जसले अँध्‍यारोलाई उज्‍यालो र उज्‍यालोलाई अँध्‍यारो मान्‍दछन्‌ अनि तीतोलाई मीठो र मीठोलाई तीतोको निम्‍ति लिन्‍छन्‌।

²¹धिक्‍कार तिनीहरूलाई, जो आफ्‍नै दृष्‍टिमा बुद्धिमान्, र आफ्‍नै नजरमा चलाक छन्‌।

²²धिक्‍कार तिनीहरूलाई, जो दाखमद्य पिउनलाई वीर, र मद्य मिसाउनलाई निपुण छन्,

²³जसले घूस लिएर दोषीहरूलाई छोड़िदिन्‍छन्, र निर्दोषहरूको ठीक न्‍याय गर्दैनन्‌।

²⁴यसैकारण जसरी आगोको ज्‍वालाले पराललाई भस्‍म गर्दछ, र सुकेको घाँस ज्‍वालामा भस्‍म हुन्‍छ, त्‍यसै गरी तिनीहरूका जरा सड़ेर जानेछन्, र तिनीहरूका फूल धूलो उड़ेझैँ उड़ेर जानेछन्‌। किनभने तिनीहरूले सर्वशक्तिमान्‌ परमप्रभुको व्‍यवस्‍थालाई इन्‍कार गरेका छन्, र इस्राएलका परमपवित्रको वचनलाई हेला गरेका छन्‌।

²⁵यसकारण परमप्रभुको रीस आफ्‍ना प्रजामाथि उठेको छ। उहाँले आफ्‍नो हात तिनीहरूका विरुद्धमा उठाउनुभएको छ, र तिनीहरूलाई हिर्काउनुहुन्‍छ। डाँड़ाहरू हल्‍लिन्‍छन्, र मानिसहरूका लाश सड़कमा कसिङ्गरझैँ छन्‌। यतिमा पनि उहाँको रीस मरेको छैन, र उहाँको हात अझैमाथि उठाइएकै छ।

²⁶उहाँले टाढ़ाका जातिहरूका निम्‍ति एउटा झन्‍डा खड़ा गर्नुहुन्‍छ, उहाँले पृथ्‍वीका कुना-कुनामा बस्‍नेहरूलाई सुसेलीले बोलाउनुहुन्‍छ। तिनीहरू चाँड़ो र फूर्तिसित आउँछन्‌!

²⁷तिनीहरूमध्‍ये कोही थाक्‍ने कि ठक्‍कर खानेछैनन्, कोही झुल्‍ने वा निदाउनेछैनन्‌। तिनीहरूका कम्‍मरको पटुका खुकुलो हुनेछैन, तिनीहरूका जुत्ताको फित्ता चुँड़िनेछैन।

²⁸तिनीहरूका काँड़हरू तीखा-तीखा छन्, र धनुमा ताँदो चढ़ाएका हुनेछन्‌। तिनीहरूका घोड़ाका टाप चकमक ढुङ्गाजस्‍तै, र तिनीहरूका रथका चक्‍काहरू आँधीबेहरीजस्‍तै हुनेछन्‌।

²⁹तिनीहरूको गर्जन सिंहको जस्‍तै छ, तिनीहरू जवान सिंहजस्‍तै गर्जन्‍छन्‌। तिनीहरूले शिकार समात्‍दा ङ्‌वारङ्‌वार गर्छन्‌। त्‍यसलाई तिनीहरूबाट छुटाउने कोही पनि हुनेछैन।

³⁰त्‍यस दिन तिनीहरू समुद्र गर्जेझैँ त्‍यसमाथि गर्जनेछन्‌। यदि देशलाई कसैले हेर्‍यो भने, त्‍यहाँ अन्‍धकार र सङ्कष्‍ट मात्र त्‍यसले देख्‍नेछ, र उज्‍यालो पनि बादलले अँध्‍यारो पार्नेछ।