Read Nepali New Revised Version, 2012 यशैया 52 Bible Online

यशैया 52 - Nepali New Revised Version, 2012 bible

यशैया 52

¹जाग्, जाग्, ए सियोन, तेरो शक्ति धारण गर्‌। ए पवित्र सहर, यरूशलेम, आफ्‍नो महिमित पोशाक लगा। अब उप्रान्‍त खतना नभएका र बिटुलिएकाहरू फेरि तँभित्र आउनेछैनन्‌।

²तेरो धूलो टकटक्‍या। ए यरूशलेम, उठ्‌ र सिंहासनमा बस्‌। हे कैदमा परेकी सियोनकी छोरी, तेरो घिच्रोको बन्‍धन फुकालिदे।

³किनकि परमप्रभु यसो भन्‍नुहुन्‍छ: “तिमीहरू सित्तैँमा बेचियौ, र तिमीहरू रुपियाँविनै छुटाइनेछौ।”

⁴किनकि परमप्रभु परमेश्‍वर यसो भन्‍नुहुन्‍छ: “पहिले मेरा प्रजा मिश्रदेशमा बसोबास गर्न गए, र हालैमा अश्‍शूरहरूले तिनीहरूलाई अत्‍याचार गरे।

⁵अनि अब मेरो यहाँ के छ र?” परमप्रभु भन्‍नुहुन्‍छ। “किनकि मेरो प्रजा सित्तैँमा लगियो, र तिनीहरूलाई शासन गर्नेहरू तिनीहरूको ठट्टा गर्छन्,” परमप्रभु भन्‍नुहुन्‍छ। “दिनभरि नै मेरो नाउँ निरन्‍तर निन्‍दित भइरहन्‍छ।

⁶यसैकारण मेरो प्रजाले मेरो नाउँ जान्‍नेछ। तिनीहरूले त्‍यो दिन जान्‍नेछन्‌ कि अघि देखि भन्‍ने मै हुँ। हो, त्‍यो म नै हुँ।”

⁷सुसमाचार प्रचार गर्नेहरूका पाउ डाँड़ाहरू हुँदो कति सुन्‍दर छन्, जसले शान्‍तिको घोषणा गर्दछन्, जसले शुभ समाचार ल्‍याउँछन्, जसले उद्धारको घोषणा गर्दछन्, जसले सियोनलाई भन्‍दछन्, “तेरा परमेश्‍वरले राज्‍य गर्नुहुन्‍छ।”

⁸ध्‍यानसित सुन्‌। तेरा पहरादारहरू आफ्‍नो सोर उचालेर एकसाथ आनन्‍दले कराउँछन्‌। जब परमप्रभु सियोनमा आउनुहुन्‍छ, तब तिनीहरूले त्‍यो आफ्‍नै आँखाले देख्‍नेछन्‌।

⁹हे यरूशलेमका भग्‍नावशेषहरू हो, आनन्‍दले एकसाथ गीतहरू गाओ, किनकि परमप्रभुले आफ्‍ना प्रजालाई सान्‍त्‍वना दिनुभएको छ, उहाँले मोल तिरेर यरूशलेमलाई छुटकारा दिनुभएको छ।

¹⁰सारा जातिहरूको दृष्‍टिमा परमप्रभुले आफ्‍नो पवित्र बाहुबल प्रकट गर्नुहुनेछ, र पृथ्‍वीको पल्‍लो छेउकाहरूले पनि हाम्रा परमेश्‍वरको उद्धारलाई देख्‍नेछन्‌।

¹¹जाओ, जाओ, त्‍यहाँबाट जाओ, अशुद्ध थोक नछोओ! हे परमप्रभुका पात्र बोक्‍ने हो, त्‍यसबाट निस्‍केर आओ, र आफैलाई शुद्ध पार।

¹²तर तिमीहरू हतार-हतार गरेर अथवा भागेर जानेछैनौ, किनकि परमप्रभु तिमीहरूका अगिअगि जानुहुनेछ, इस्राएलका परमेश्‍वर तिमीहरूका पछिल्‍तिर रक्षक हुनुहुनेछ।

¹³हेर्, मेरो दासले बुद्धिले काम गर्नेछ। ऊ उचालिनेछ, अल्‍गाइनेछ र ऊ अति उच्‍च पारिनेछ।

¹⁴जसरी उसदेखि धेरै जना व्‍याकुल थिए— उसको अनुहार चिन्‍नै नसकिने गरी र उसको चेहरा मानिसको भन्‍दा पनि कुरूप बनाइएको थियो—

¹⁵त्‍यसरी नै उसले धेरै जातिहरूमाथि छर्कनेछ। उसको कारण राजाहरू चूपचाप रहनेछन्‌। किनकि तिनीहरूलाई नभनेको कुरा तिनीहरूले देख्‍नेछन्, र तिनीहरूले नसुनेका कुरा तिनीहरूले बुझ्‍नेछन्‌।