Read Nepali New Revised Version, 2012 यशैया 65 Bible Online

यशैया 65 - Nepali New Revised Version, 2012 bible

यशैया 65

¹“मलाई नसोध्‍नेहरूलाई मैले स्‍वयम्‌ प्रकट गरें। जसले मलाई खोजेनन्, तिनीहरूले मलाई भेट्टाए। मेरो नाम नै नलिने जातिलाई मैले भनें, ‘म यहाँ छु। म यहाँ छु’।

²मैले मेरो हात दिनभरि नै एउटा अटेरी प्रजाको अगि फैलाएँ, जो आफ्‍नै कल्‍पनामा यस्‍तो बाटोमा हिँड्‌छन्‌ जो असल छैन—

³एउटा यस्‍ता प्रजा, जसले निरन्‍तर मेरै सामुन्‍ने मलाई रीस उठाउँछन्, बगैँचाहरूमा बलिदान चढ़ाउँछन्, र इँटाले बनाएका वेदीमा धूप बाल्‍छन्,

⁴जो चिहानहरूमा बस्‍छन्, र गुप्‍त ठाउँहरूमा कुरेर रात बिताउँछन्, जसले सुँगुरको मासु खान्‍छन्, र जसका भाँड़ामा घिनलाग्‍दा कुराहरूको झोल हुन्‍छ,

⁵जसले भन्‍छन्, ‘पर जा, मेरो नजिक नआइज, किनकि म तेरो निम्‍ति अति पवित्र छु’। यस्‍ता मानिसहरू त मेरा नाकमा धूवाँ, र दिनभरि बलिरहने आगो हुन्‌।

⁶“हेर, मेरो सामुन्‍ने यस्‍तो लेखिएको छ, म चूप रहनेछैनँ, तर पूरै साटो लिनेछु। निश्‍चय नै म तिनीहरूकै काखमा साटो लिनेछु—

⁷तिमीहरूका र तिमीहरूका पिता-पुर्खाहरूका पापको साटो म लिनेछु” परमप्रभु भन्‍नुहुन्‍छ। “किनभने तिनीहरूले पर्वतहरूमा बलिदान जलाए, र डाँड़ाहरूमा मेरो विरोध गरे। म तिनीहरूका पहिलेका कामको बदला तिनीहरूकै काखमा पूरा भरिदिनेछु।”

⁸परमप्रभु यसो भन्‍नुहुन्‍छ, “जसरी दाखको झुप्‍पामा रस पाएर, मानिसहरूले भन्‍छन्, ‘त्‍यसलाई नबिगार्, किनकि त्‍यसमा अझै राम्रो रस होला,’ त्‍यसरी नै म मेरा सेवकहरूको पक्षमा गर्नेछु, म तिनीहरू सबैलाई नष्‍ट गर्नेछैनँ।

⁹म याकूबबाट सन्‍तान-दरसन्‍तान र यहूदाबाट मेरा पर्वतहरूका उत्तराधिकारीहरू उत्‍पन्‍न गर्नेछु। मेरा चुनिएकाहरूले त्‍यसको अधिकार गर्नेछन्, र मेरा दासहरू त्‍यहाँ बस्‍नेछन्‌।

¹⁰मलाई खोज्‍ने मेरा प्रजाहरूका निम्‍ति, शारोनचाहिँ भेड़ाबाख्राहरूको चरन, र आकोरको बेँसीचाहिँ गाईबस्‍तुहरूका विश्रामको ठाउँ हुनेछ।

¹¹“तर तिमीहरू, जसले परमप्रभुलाई त्‍याग्‍छौ, र मेरो पवित्र पर्वतलाई बिर्सन्‍छौ, जसले भाग्‍य-देवको निम्‍ति टेबिल तयार गर्छौ, र भावी-देवीको निम्‍ति मिसाएको दाखमद्यले बाटाहरू भर्छौ,

¹²म तिमीहरूलाई तरवारको निम्‍ति खटाउनेछु, र तिमीहरू सबै काटिनलाई निहुरनेछौ। किनकि जब मैले तिमीहरूलाई बोलाएँ, तब तिमीहरूले जवाफ दिएनौ। जब म बोलें, तब तिमीहरूले ध्‍यानसित सुनेनौ। मेरो दृष्‍टिमा जे खराब थियो, तिमीहरूले त्‍यही काम गर्‍यौ, र मलाई मन नपर्ने काम गर्न तिमीहरूले रोज्‍यौ।”

¹³यसैकारण परमप्रभु परमेश्‍वर यसो भन्‍नुहुन्‍छ, “हेर, मेरा दासहरूले खानेछन्, तर तिमीहरू भने भोकै बस्‍नेछौ। मेरा दासहरूले पिउनेछन्, तर तिमीहरू भने तिर्खाउनेछौ। मेरा दासहरूले हर्ष मनाउनेछन्, तर तिमीहरूचाहिँ लाजमा पर्नेछौ।

¹⁴मेरा दासहरू हृदयको आनन्‍दले गाउनेछन्, तर तिमीहरूचाहिँ हृदयमा चिन्‍ता भएकोले रुनेछौ, र आत्‍मामा खिन्‍न भएकोले चिच्‍च्‍याई-चिच्‍च्‍याई रुनेछौ।

¹⁵तिमीहरूले आफ्‍नो नाउँ मेरा छानिएकाहरूका निम्‍ति सरापको रूपमा छोड्‌नेछौ, र परमप्रभु परमेश्‍वरले तिमीहरूलाई मार्नुहुनेछ। तर उहाँले आफ्‍ना दासहरूलाई अर्को नाउँ दिनुहुनेछ।

¹⁶जसले यस देशमा आशिष्‌को आह्वान गर्नेछ, त्‍यसले साँचो परमेश्‍वरको नाउँमा यसो गर्नेछ, र यस देशमा शपथ खानेले परमेश्‍वरको नाउँमा शपथ खानेछ, किनभने अघि-अघिका दु:खहरू बिर्सिसकिएका हुनेछन्, र ती मेरो नजरबाट लुकिएका हुनेछन्‌।

¹⁷“हेर, म नयाँ आकाश र नयाँ पृथ्‍वी सृष्‍टि गर्नेछु। अघि-अघिका कुराहरूको सम्‍झना हुनेछैन, न त ती मनमा आउनेछन्‌।

¹⁸तर मैले सृष्‍टि गर्ने कुरामा सदासर्वदा आनन्‍द गर र हर्ष मनाओ। किनकि म यरूशलेमलाई हर्षदायक र त्‍यसका मानिसहरूलाई आनन्‍ददायक तुल्‍याउनेछु।

¹⁹म यरूशलेमदेखि हर्षित हुनेछु, र मेरो प्रजामा खुशी हुनेछु, र त्‍यहाँ रुवाइ र कराइको आवाज फेरि कहिल्‍यै सुनिनेछैन।

²⁰“थोरै दिनसम्‍म बाँच्‍ने बालक वा आफ्‍नो पूरा उमेरसम्‍म नबाँच्‍ने वृद्ध मानिस त्‍यहाँ कहिल्‍यै हुनेछैन। सय वर्षसम्‍म बाँचेर मर्नेचाहिँ जवान मानिनेछ, र सय वर्षसम्‍म नबाँच्‍नेचाहिँ श्रापित मानिनेछ।

²¹तिनीहरूले घर बनाएर तिनमा वास गर्नेछन्‌। तिनीहरूले दाखबारी लगाएर तिनका फल खानेछन्‌।

²²तिनीहरूले घरहरू बनाएर तिनमा अरूहरू बस्‍ने, र तिनीहरूले रोपेर अरूहरूले खाने कहिल्‍यै हुनेछैन। किनकि रूखको आयु जस्‍तै मेरा प्रजाको आयु हुनेछ, र मेरा छानिएकाहरूले आफ्‍ना हातले गरेका काम धेरै दिनसम्‍मै भोग गर्नेछन्‌।

²³तिनीहरूले व्‍यर्थमा परिश्रम गर्नेछैनन्, अथवा विपत्तिको निम्‍ति बालकहरू जन्‍माउनेछैनन्‌। किनकि तिनीहरू, तिनीहरूका वंशसमेत परमप्रभुको आशिष्‌ पाएका प्रजा हुनेछन्‌।

²⁴तिनीहरूले बिन्‍ती गर्न अघि नै म जवाफ दिनेछु। तिनीहरूले बोल्‍दाबोल्‍दै तिनीहरूका कुरा म सुन्‍नेछु।

²⁵ब्‍वाँसो र थुमा एउटै ठाउँमा एकसाथ खानेछन्, र सिंहले चाहिँ गोरुले झैँ पराल खानेछ, तर सर्पको आहारा धूलो हुनेछ। मेरो सारा पवित्र पर्वतमा तिनीहरूले न त नोक्‍सानी गर्नेछन्, न नष्‍ट गर्नेछन्,” परमप्रभु भन्‍नुहुन्‍छ।”