Read Nepali New Revised Version, 2012 यशैया 66 Bible Online

यशैया 66 - Nepali New Revised Version, 2012 bible

यशैया 66

¹परमप्रभु यसो भन्‍नुहुन्‍छ, “स्‍वर्ग मेरो सिंहासन हो, र पृथ्‍वीचाहिँ मेरो पाउदान हो। मेरो निम्‍ति तिमीहरूले बनाउने भवन कहाँ छ? मेरो विश्राम गर्ने ठाउँ कुन हुनेछ?

²के यी सबै थोक त मेरै हातले बनाएका होइनन्, र यसरी यी हुन आए?” परमप्रभु भन्‍नुहुन्‍छ। “जो आत्‍मामा दीन र चूर्ण छ, र मेरो वचनमा काम्‍दछ, त्‍यसलाई म आदर गर्दछु।

³तर गोरुको बलि गर्नेचाहिँ मान्‍छे मार्नेजस्‍तै हो। थुमा बलिदान चढ़ाउनेचाहिँ कुकुरको घिच्रो भाँच्‍नेजस्‍तै हो। जसले अन्‍नबलि चढ़ाउँछ, त्‍यो सुँगुरको रगत चढ़ाउनेजस्‍तै हो। जसले सम्‍झना स्‍वरूप धूप बाल्‍छ, त्‍यो मूर्तिलाई पूजा गरेजस्‍तै हो। तिनीहरूले आफ्‍नै बाटो चुनेका छन्‌ र तिनीहरूका प्राण आफ्‍नै घिनलाग्‍दा कामहरूमा खुशी हुन्‍छन्‌।

⁴यसैले म पनि तिनीहरूसित कड़ा व्‍यवहार गर्नेछु, र तिनीहरूले डरले मानेका कुरा तिनीहरूमाथि ल्‍याउनेछु। किनकि मैले बोलाउँदा कसैले जवाफ दिएन। जब म बोलें, कसैले ध्‍यानै दिएन। जे मेरो दृष्‍टिमा खराब थियो, तिनीहरूले त्‍यही गरे, र जुन कुरा मलाई मन पर्दैन, त्‍यही तिनीहरूले चुने।”

⁵तिमीहरू, जो परमप्रभुको वचनमा काम्‍दछौ, उहाँको वचन सुन: “तिमीहरूका दाजुभाइहरू, जसले तिमीहरूलाई घृणा गर्छन्, जसले तिमीहरूलाई मेरो नाउँको खातिर बहिष्‍कार गर्छन्, तिनीहरूले यसो भनेका छन्, ‘परमप्रभुको महिमा होस्, ताकि हामी तिमीहरूको आनन्‍द हेरौं!’ तापनि तिनीहरू लज्‍जित हुनेछन्‌।

⁶सहरबाट निस्‍केको त्‍यो ठूलो हल्‍ला सुन! मन्‍दिरबाट निस्‍केको आवाज सुन। यो आफ्‍ना शत्रुहरूलाई उचित बदला दिनुहुने परमप्रभुको सोर हो!

⁷“प्रसववेदनामा पर्नुभन्‍दा पहिले नै त्‍यसले जन्‍माउँछे। सुत्‍केरी व्‍यथा लाग्‍नुभन्‍दा पहिले नै त्‍यसले एउटा छोरा जन्‍माउँछे।

⁸यस्‍तो कुरा कसले सुनेको छ? यस्‍तो कुरा कसले देखेको छ? के एकै दिनमा एउटा देश उत्‍पन्‍न हुन्‍छ र? अथवा के एकै क्षणमा एउटा जाति निकाल्‍न सकिन्‍छ र? तापनि सियोनले त प्रसववेदना लाग्‍ने बित्तिकै बालकहरू जन्‍माउँछे।

⁹के जन्‍माउने समयसम्‍म ल्‍याएर जन्‍माउनेचाहिँ नतुल्‍याऊँ?” परमप्रभु भन्‍नुहुन्‍छ। “के म, जसले जन्‍माउन लाउँछु, म गर्भ थुन्‍छु र?” तेरा परमेश्‍वर भन्‍नुहुन्‍छ।

¹⁰“हे यरूशलेमलाई प्रेम गर्ने हो, तिमीहरू सबै त्‍यससित आनन्‍द गर, र त्‍यसको निम्‍ति प्रसन्‍न होओ। हे त्‍यसको निम्‍ति शोक गर्ने हो, आनन्‍दले प्रफुल्‍लित होओ।

¹¹किनकि त्‍यसका सान्‍त्‍वना दिने स्‍तन चुसेर तिमीहरू सन्‍तुष्‍ट हुनेछौ, र दूध पूरै चुसेर त्‍यसको प्रशस्‍तपनमा आनन्‍दित हुनेछौ।”

¹²किनकि परमप्रभु यसो भन्‍नुहुन्‍छ, “म शान्‍तिलाई नदीझैँ र जाति-जातिहरूको सम्‍पत्ति उर्लंदो खोलाझैँ त्‍यसतर्फ बढ़ाउनेछु। तिमीहरू दूध चुस्‍नेछौ र तिमीहरू आँगमा बोकिनेछौ, र घुँड़ामा खेलाइनेछौ।

¹³आमाले आफ्‍ना बालकलाई सान्‍त्‍वना दिएझैँ म तिमीहरूलाई सान्‍त्‍वना दिनेछु। र तिमीहरूले यरूशलेमको कारण सान्‍त्‍वना पाउनेछौ।

¹⁴जब तिमीहरूले यो देख्‍नेछौ तब तिमीहरूका हृदय रमाउनेछन्, र तिमीहरू घाँसझैँ भरिला हुनेछौ। परमप्रभुको हात आफ्‍ना दासहरूतिर पसारेको तर उहाँको क्रोधचाहिँ उहाँका शत्रुहरूमाथि भएको थाहा गराइनेछ।

¹⁵हेर, परमप्रभु अग्‍निसाथ आउँदैहुनुहुन्‍छ, र उहाँका रथहरूचाहिँ आँधीबेहरीझैँ छन्‌। आफ्‍नो रीस झोँकसित र आफ्‍नो हप्‍काइ आगोको ज्‍वालासित उहाँले ल्‍याउनुहुनेछ।

¹⁶किनकि आगो र तरवारद्वारा परमप्रभुले सबै मानिसको न्‍याय गर्नुहुनेछ, र परमप्रभुबाट मारिएकाहरू धेरै हुनेछन्‌।

¹⁷“ती, जसले आफूलाई पवित्र र शुद्ध पारेर बगैँचामा सुँगुर र मूसा तथा अन्‍य घिनलाग्‍दा कुरा खानेमध्‍ये कसैलाई पछ्याउँछन्, तिनीहरू सबैको एकैसाथ अन्‍त हुनेछ,” परमप्रभु भन्‍नुहुन्‍छ।

¹⁸“तिनीहरूका काम र तिनीहरूका कल्‍पनाको कारण म सारा जातिहरू र विभिन्‍न भाषा बोल्‍नेहरूलाई जम्‍मा गर्न आउनेछु, र तिनीहरू आएर मेरो महिमा देख्‍नेछन्‌।

¹⁹“म तिनीहरूका बीचमा एउटा चिन्‍ह राख्‍नेछु, र तिनीहरूमध्‍ये बाँचेकाहरूलाई म जाति-जातिहरूकहाँ पठाउनेछु— अर्थात्‌ तर्शीशमा, लिबियाली तथा लूदीहरू, जसले धनु धारण गर्छन्, तूबल र ग्रीसमा, र टाढ़ाका टापूहरूमा, जसले मेरो कीर्ति सुनेका छैनन्‌ र मेरो महिमा देखेका छैनन्‌। तिनीहरूले मेरो महिमा जाति-जातिहरूका बीचमा घोषणा गर्नेछन्‌।

²⁰अनि तिनीहरूले सारा जाति-जातिहरूबाट तिमीहरूका सबै दाजुभाइहरूलाई घोड़ाहरू, रथहरू, पालकीहरू, खच्‍चरहरू र ऊँटहरूमा चढ़ाएर मेरो पवित्र पर्वत यरूशलेममा परमप्रभुको निम्‍ति बलिजस्‍तै ल्‍याउनेछन्,” परमप्रभु भन्‍नुहुन्‍छ। “इस्राएलका सन्‍तानले आफ्‍नो अन्‍नबलि चोखो भाँड़ामा परमप्रभुको मन्‍दिरमा ल्‍याएझैँ तिनीहरूले यिनीहरूलाई ल्‍याउनेछन्,

²¹अनि तिनीहरूमध्‍येका कति जनालाई पनि पूजाहारी र लेवीहरू हुन म चुन्‍नेछु,” परमप्रभु भन्‍नुहुन्‍छ।

²²“जसरी नयाँ आकाश र नयाँ पृथ्‍वी, जो म बनाउनेछु, ती मेरै सामुन्‍ने रहिरहनेछन्,” परमप्रभु भन्‍नुहुन्‍छ, “त्‍यसरी नै तिमीहरूको नाउँ र तिमीहरूका सन्‍तान रहिरहनेछन्‌।

²³एक औंसीदेखि अर्को औंसी र एक शबाथदेखि अर्को शबाथसम्‍म, सबै मानिस-जाति आएर मेरो सामुन्‍ने निहुरनेछन्,” परमप्रभु भन्‍नुहुन्‍छ।

²⁴“अनि तिनीहरूले निस्‍केर मेरो विरुद्धमा बागी हुने मानिसहरूका मृत शरीरलाई हेर्नेछन्‌। तिनीहरूको कीरा मर्नेछैन, तिनीहरूको आगो निभ्‍नेछैन, र तिनीहरू सबै मानिस-जातिका निम्‍ति घृणित हुनेछन्‌।”