Read Nepali New Revised Version, 2012 यशैया 9 Bible Online

यशैया 9 - Nepali New Revised Version, 2012 bible

यशैया 9

¹तापनि सङ्कष्‍ट परेकाहरूका निम्‍ति नैराश्‍य हुनेछैन। पहिले त उहाँले जबूलूनको देश र नप्‍तालीको देशलाई नम्र तुल्‍याउनुभयो, तर भविष्‍यमा उहाँले यर्दनका किनारको समुद्र नजिकैको अन्‍यजातिहरूको गालीललाई सम्‍मानित तुल्‍याउनुहुनेछ।

²अन्‍धकारमा हिँड्‌ने मानिसहरूले एउटा ठूलो ज्‍योति देखेका छन्‌। मृत्‍युको छायाको देशमा बस्‍नेहरूमाथि एउटा ज्‍योति उदाएको छ।

³तपाईंले त्‍यस जातिको वृद्धि गराउनुभएको छ र तपाईंले तिनीहरूका आनन्‍द बढ़ाउनुभएको छ। कटनीको बेलामा मानिसहरू रमाएझैँ तिनीहरू तपाईंको सामुन्‍ने रमाउनेछन्, र लूटका माल बाँड्‌दा मानिसहरू खुशी भएझैँ तिनीहरू खुशी हुन्‍छन्‌।

⁴किनकि तपाईंले त्‍यसको बोझाको जुवा र त्‍यसको काँधको नोल, र त्‍यसलाई अत्‍याचार गर्नेको लाठो मिद्यानको हारको दिनमा भएझैँ चकनाचूर पारिदिनुभएको छ।

⁵लड़ाइँमा प्रयोग गरेको हरेक सिपाहीका जुत्ता र रगतमा मुछिएको हरेक पोशाक जलाउनलाई छुट्याइएको हुनेछ र आगोको निम्‍ति इन्‍धन हुनेछ।

⁶किनभने हाम्रा निम्‍ति एक जना बालकको जन्‍म भएको छ। हाम्रा निम्‍ति एक जना छोरो दिइएको छ। शासन उहाँको काँधमा हुनेछ। उहाँ अचम्‍मका सल्‍लाहकार, शक्तिशाली परमेश्‍वर, अनन्‍तका पिता, शान्‍तिका राजकुमार कहलाइनुहुनेछ।

⁷उहाँको शासन र शान्‍तिका वृद्धिको अन्‍त कहिल्‍यै हुनेछैन। दाऊदको सिंहासन र तिनको राज्‍यमाथि त्‍यसलाई न्‍याय र धार्मिकताको साथ स्‍थापित गरी स्‍थिर गराउन, त्‍यस बेलादेखि सदाको निम्‍ति उहाँले राज्‍य गर्नुहुनेछ। सर्वशक्तिमान्‌ परमप्रभुको जोशले यो पूरा गर्नेछ।

⁸परमप्रभुले याकूबको विरुद्धमा यो सन्‍देश पठाउनुभएको छ, र त्‍यो इस्राएलमाथि पर्नेछ।

⁹सारा मानिसहरू, अर्थात्‌ एफ्राइम र सामरियाका मानिसहरूले त्‍यो जान्‍नेछन्, जसले अहङ्कार र हृदयको घमण्‍डसित भन्‍दछन्,

¹⁰“इँटहरू त ढलेका छन्, तर हामीहरू कुँदेका ढुङ्गाहरूले फेरि बनाउनेछौं। अञ्‍जीरका रूखहरू काटी ढालिएका छन्, तर हामी तिनका सट्टामा देवदारु लगाउनेछौं।”

¹¹तर परमप्रभुले तिनीहरूका विरुद्धमा रसीनका शत्रुहरूलाई बलिया तुल्‍याउनुभएको छ, र तिनीहरूका शत्रुहरूलाई सुर्‍याउनुभएको छ।

¹²अरामीहरूले पूर्वतिर र पलिश्‍तीहरूले पश्‍चिमतिरबाट मुख बाएर इस्राएललाई निलेका छन्‌। यतिमा पनि उहाँको रीस मरेको छैन, र उहाँको हात अझै माथि उठाइएकै छ।

¹³तर मानिसहरू तिनीहरूलाई हिर्काउने व्‍यक्तितर्फ फर्केका छैनन्, न त तिनीहरूले सर्वशक्तिमान्‌ परमप्रभुलाई खोजेका छन्‌।

¹⁴यसैकारण परमप्रभुले इस्राएलबाट शिर र पुच्‍छर, खजूरका हाँगा र नर्कट एकै दिनमा काट्‌नुहुनेछ।

¹⁵वृद्ध र आदरणीय मानिसहरू शिर हुन्, तथा झूटा कुरा सिकाउने अगमवक्ताहरूचाहिँ पुच्‍छर हुन्‌।

¹⁶यस प्रजालाई अगुवाइ गर्नेहरूले तिनीहरूलाई भ्रममा पार्छन्‌। तिनीहरूबाट डोर्‍याइएकाहरूचाहिँ बरालिएका छन्‌।

¹⁷यसकारण तिनीहरूका जवान मानिसहरूदेखि परमप्रभु प्रसन्‍न हुनुहुन्‍न, न त उहाँले तिनीहरूका टुहुरा-टुहुरी र विधवालाई टिठ्याउनुहुनेछ। किनकि हरेक व्‍यक्ति ईश्‍वरहीन र दुष्‍ट छ। हरेकको मुखबाट खराब कुरा निस्‍कन्‍छ। यतिमा पनि उहाँको रीस मरेको छैन, र उहाँको हात अझै माथि उठाइएकै छ।

¹⁸निश्‍चय नै आगोझैँ खराबी बल्‍छ, त्‍यसले सिउँड़ी र काँढ़ाहरू भस्‍म पार्छ। त्‍यसले वनका झाड़ीहरूलाई जलाउँछ, र ती धूवाँको बाक्‍लो मुस्‍लो भएर माथितिर बटारिँदैजान्‍छन्‌।

¹⁹सर्वशक्तिमान्‌ परमप्रभुको क्रोधले देश भस्‍म हुनेछ। मानिसहरू पनि आगोको निम्‍ति इन्‍धन हुनेछन्‌। कुनै मानिसले आफ्‍नो भाइलाई पनि छोड्‌नेछैन।

²⁰दाहिनेपट्टि तिनीहरूले निल्‍नेछन्‌ र पनि भोकै हुनेछन्‌। तिनीहरूले देब्रेपट्टि खानेछन्, तरै पनि सन्‍तुष्‍ट हुनेछैनन्‌। हरेकले आफ्‍नै सन्‍तानको मासु खानेछ,

²¹मनश्‍शेले एफ्राइमलाई र एफ्राइमले मनश्‍शेलाई खानेछ, र तिनीहरू दुवै यहूदाको विरुद्धमा हुनेछन्‌। यतिमा पनि उहाँको रीस मरेको छैन, र उहाँको हात अझै माथि उठाइएकै छ।