Read Nepali New Revised Version, 2012 लेवीहरू 10 Bible Online

लेवीहरू 10 - Nepali New Revised Version, 2012 bible

लेवीहरू 10

¹हारूनका छोराहरू नादाब र अबीहूले आ-आफ्‍नो धुपौरो लिएर त्‍यसमा आगो भरे, र त्‍यस आगोमा धूप हालेर परमप्रभुले आज्ञा नगर्नुभएको आगो हालेर उहाँको सामु चढ़ाए।

²यसकारण त्‍यतिखेर परमप्रभुबाट आगो निस्‍केर उनीहरूलाई भस्‍म पार्‍यो, र उनीहरू परमप्रभुको सामु मरे।

³तब मोशाले हारूनलाई भने, “परमप्रभुले भन्‍नुभएको कुरा यही हो: ‘मेरो नजिक आउनेहरूमा म पवित्र बन्‍नेछु, अनि सारा मानिसहरूका सामु म महिमित हुनेछु’।” हारून चूप बसे।

⁴मोशाले हारूनका काका उज्‍जीएलका छोराहरू मीशाएल र एलसाफानलाई बोलाएर भने, “आएर तिमीहरूका भाइहरूलाई पवित्रस्‍थानको अघिबाट बोकेर छाउनीबाट लैजाओ।”

⁵यसैले तिनीहरू आएर उनीहरूले लाएकै लबेदामा मोशाले भनेबमोजिम छाउनीबाहिर उनीहरूलाई बोकेर लगे।

⁶तब मोशाले हारून र उनका छोराहरू, एलाजार र ईतामारलाई भने, “तिमीहरूका शिरका केश नफुकाओ, आफ्‍ना लुगा नच्‍यात, नत्रता तिमीहरू मर्नेछौ र सबै समुदायमाथि परमप्रभुको क्रोध पर्ला। तर परमप्रभुले पठाउनुभएको अग्‍निले नष्‍ट भई मरेकाहरूका लागि तिमीहरूका नातेदारहरू, इस्राएलका सारा घरानाले विलाप गरे हुन्‍छ।

⁷तिमीहरूचाहिँ भेट हुने पालको ढोकाबाट बाहिर नजानू, नत्रता तिमीहरू मरौला, किनभने परमप्रभुका अभिषेकको तेल तिमीहरूमाथि छ।” यसर्थ उनीहरूले मोशाको वचनअनुसार गरे।

⁸त्‍यसपछि परमप्रभुले हारूनलाई भन्‍नुभयो,

⁹“तिमीहरू भेट हुने पालमा जाँदा तिमी र तिम्रा छोराहरूले दाखमद्य अथवा अरू मद्य नपिउनू, नत्रता तिमीहरू मरौला।” यो तिमीहरूका आउँदा पुस्‍ताहरूमा अन्‍नबलिको विधि होस्‌।

¹⁰पवित्र र साधारण, अनि शुद्ध र अशुद्धमा तिमीहरूले भेद राख्‍नुपर्छ।

¹¹परमप्रभुले मोशाद्वारा दिनुभएको विधि सबै इस्राएलीहरूलाई तिमीहरूले सिकाउनुपर्छ।”

¹²मोशाले हारून र उनका बाँचेका छोराहरू, एलाजार र ईतामारलाई भने, “परमप्रभुको निम्‍ति आगोद्वारा चढ़ाइएका बलिहरूबाट बाँकी रहेको अन्‍नबलि लिएर वेदीनेर खमिरविना खाओ, किनभने त्‍यो अति पवित्र छ।

¹³तिमीहरूले त्‍यो कुनै चोखो ठाउँमा खाओ, किनभने परमप्रभुको निम्‍ति आगोद्वारा चढ़ाइएका बलिहरूबाट यो तिम्रो र तिम्रा छोराहरूको भाग हो, किनकि मलाई यस्‍तै आज्ञा भएको छ।

¹⁴तर डोलाइएको ह्याकुला र प्रस्‍तुत गरिएको साँप्राचाहिँ तिमी र तिम्रा छोराछोरीहरूले चोखो ठाउँमा खानू, किनकि तीचाहिँ इस्राएलीहरूका मेलबलिबाट तिमी र तिम्रा छोराछोरीहरूको भाग दिइएका हुन्‌।

¹⁵आगोद्वारा चढ़ाइएका बलिहरूको बोसोसहित, प्रस्‍तुत गरिएको साँप्रो र डोलाइएको ह्याकुलो परमप्रभुको सामु डोलाइने बलिको निम्‍ति तिनीहरूले ल्‍याऊन्, र परमप्रभुले आज्ञा गर्नुभएबमोजिम तिमी र तिम्रा छोराछोरीहरूका निम्‍ति ती सदाको हक हुनेछ।”

¹⁶जब मोशाले पापबलिका बोकाको विषयमा सोधे, र त्‍यो जलाइसकेको भेट्टाए, तिनले हारूनका बाँचेका छोराहरू, एलाजार र ईतामारलाई रिसाएर भने,

¹⁷“तिमीहरूले किन पापबलि पवित्रस्‍थानमा तोकिएको ठाउँमा खाएनौ? किनभने त्‍यो अति पवित्र थोक हो। समुदायको लागि प्रायश्‍चित गरेर तिनीहरूको दोष हटाउन भनी त्‍यो तिमीहरूलाई दिइएको हो।

¹⁸त्‍यसको रगत पवित्रस्‍थानभित्र नल्‍याइएकोले तिमीहरूले निश्‍चय नै मैले अह्राएबमोजिम त्‍यो बोका पवित्रस्‍थानभित्र खानुपर्नेथियो।”

¹⁹तब हारूनले मोशालाई भने, “आजै तिनीहरूले आफ्‍ना पापबलि र होमबलि परमप्रभुको सामु चढ़ाएका छन्, तापनि ममाथि आज यस्‍ता कुरा परिआएका छन्‌। मैले आज पापबलि खाएको भएदेखि के त्‍यो परमप्रभुको दृष्‍टिमा असल ठहरिनेथियो र?”

²⁰जब मोशाले यो कुरा सुने, तब तिनको चित्त बुझ्‍यो।