Read Nepali New Revised Version, 2012 लेवीहरू 13 Bible Online

लेवीहरू 13 - Nepali New Revised Version, 2012 bible

लेवीहरू 13

²“कुनै मानिसको छाला फुल्‍यो कि बिमिरा कि उज्‍ज्‍वल दाग निस्क्यो, र त्‍यसको छालामा सरुवा रोग लाग्‍यो भने, त्‍यसलाई पूजाहारी हारून अथवा तिनका पूजाहारी छोराहरूमध्‍ये एक जना कहाँ ल्‍याइओस्‌।

³त्‍यसको छालामा लागेको त्‍यो घाउ पूजाहारीले हेरून्, अनि त्‍यसको रोग लागेको ठाउँमा उम्रेको रौँ सेतो भएको छ र त्‍यो घाउ छालाभन्‍दा गहिरो देखा पर्‍यो भने, त्‍यो सरुवा रोग हो। पूजाहारीले त्‍यसलाई जाँचेपछि त्‍यसलाई अशुद्ध ठहराऊन्‌।

⁴तर त्‍यो दाग छालामा सेतो भए, र हेर्दा त्‍यो छालाभित्रसम्‍म देखिएन भने, र त्‍यसमा उम्रेको रौँ पनि सेतो भएको रहेनछ भने, पूजाहारीले त्‍यस रोगीलाई सात दिनसम्‍म अलग्‍गै राखून्‌।

⁵सातौँ दिनमा पूजाहारीले त्‍यसलाई जाँच गर्दा त्‍यो घाउ जस्‍ताको तस्‍तै रहेछ, र छालामा त्‍यो घाउ फैलिएको रहेनछ भने, पूजाहारीले त्‍यसलाई अरू सात दिनसम्‍म अलग्‍ग राखून्‌।

⁶सातौँ दिनमा पूजाहारीले त्‍यसलाई फेरि जाँच गर्दा रोग मत्‍थर भएको छ र छालामा फैलिएको छैन भने, पूजाहारीले त्‍यसलाई शुद्ध ठहराऊन्‌। त्‍यो खटिरो मात्र हो। त्‍यसले आफ्‍ना लुगा धोएर त्‍यो शुद्ध हुनेछ।

⁷तर शुद्ध ठहरिनलाई पूजाहारीकहाँ देखाइसकेपछि पनि त्‍यो खटिरो छालामा फैलिएर आयो भने, त्‍यसले फेरि पूजाहारीकहाँ गएर आफैलाई देखाउनुपर्छ।

⁸अनि पूजाहारीले जाँच गर्दा छालामा खटिरा फैलिएकै रहेछ भने, पूजाहारीले त्‍यसलाई अशुद्ध ठहराऊन्, त्‍यो सरुवा रोग हो।

⁹“कुनै मानिसलाई छालाको सरुवा रोग लागेको छ भने, त्‍यो पूजाहारीकहाँ ल्‍याइओस्‌।

¹⁰अनि पूजाहारीले जाँच गर्दा छाला सेतो भएर फुलिएको रहेछ भने र त्‍यसको रौँ सेतो परेको र सुनिएको ठाउँमा आलो घाउ रहेछ भने,

¹¹यो धेरै समयसम्‍म रहने छालाको रोग हो, र पूजाहारीले त्‍यसलाई अशुद्ध ठहराऊन्‌। तिनले त्‍यसलाई चाहिँ अलग्‍ग नराखून्, किनभने त्‍यो अशुद्ध भइसकेको छ।

¹²“रोग छालामा फैलिँदैगयो, र त्‍यो पूजाहारीले हेर्दा रोगीको शिरदेखि खुट्टासम्‍मै छालामा फैलिएको रहेछ भने,

¹³र पूजाहारीले त्‍यसलाई जाँच गर्दा रोग सारा शरीरमा ढाकिएको छ भने, तिनले त्‍यस रोगीलाई शुद्ध ठहराऊन्‌। त्‍यो जम्‍मै सेतै भइसकेको कारणले त्‍यो मान्‍छे शुद्ध हो।

¹⁴तर त्‍यसमा आलो मासु देखा पर्‍यो भने त्‍यो अशुद्ध हुनेछ।

¹⁵पूजाहारीले त्‍यसको आलो मासु हेर्दा तिनले त्‍यसलाई अशुद्ध ठहराऊन्‌। त्‍यो आलो मासु अशुद्ध हो, त्‍यो सरुवा रोग हो।

¹⁶तर त्‍यो आलो मासु फेरि सेतो भएर आयो भने त्‍यो मानिस पूजाहारीकहाँ जाओस्,

¹⁷अनि पूजाहारीले त्‍यसलाई जाँच गर्दा त्‍यो रोग सेतो भएको छ भने पूजाहारीले त्‍यस रोगीलाई शुद्ध ठहराऊन्‌। तब त्‍यो मान्‍छे शुद्ध हुनेछ।

¹⁸“कसैको छालामा पिलो निस्‍केर निको भयो,

¹⁹र त्‍यो पिलो भएको ठाउँ सेतो भएर फुल्‍यो अथवा रातो परेको सेतो दाग त्‍यहाँ निस्क्यो भने, त्‍यसले पूजाहारीकहाँ गएर आफैलाई देखाओस्‌।

²⁰पूजाहारीले जाँच गर्दा त्‍यो दाग छालाभन्‍दा गहिरो देखियो र रौँ पनि सेतो भएको छ भने, पूजाहारीले त्‍यसलाई अशुद्ध ठहराऊन्‌। त्‍यो सरुवा रोग हो। त्‍यो पिलोबाट निस्‍केको हो।

²¹तर पूजाहारीले जाँच गर्दा त्‍यसमा कुनै सेतो रौँ रहेनछ, अनि त्‍यो छालाभन्‍दा गहिरो छैन तर सुकेर हराउँदैगयो भने, पूजाहारीले त्‍यसलाई सात दिनसम्‍म अलग्‍ग राखून्‌।

²²त्‍यो छालामा फैलिएको छ भने, पूजाहारीले त्‍यसलाई अशुद्ध ठहराऊन्, त्‍यो सरुवा हो।

²³तर त्‍यो दाग नफैलिएर एकै ठाउँमा रहेछ भने त्‍यो पिलोको खत हो। पूजाहारीले त्‍यसलाई शुद्ध ठहराऊन्‌।

²⁴“कसैको छालामा पोलेको घाउ भयो र त्‍यो पोलेको घाउको आलो मासुमा रातो-रातो परेको सेतो अथवा सेतो दाग देखा पर्‍यो भने,

²⁵पूजाहारीले त्‍यो दाग जाँच गरून्, र त्‍यो दागमा उम्रेको रौँ सेतो र हेर्दा छालाभन्‍दा गहिरो देखियो भने, त्‍यो सरुवा रोग हो। त्‍यो पोलेको घाउमा फुटेर निस्‍केको हो। पूजाहारीले त्‍यसलाई अशुद्ध ठहराऊन्, यो छालाको सरुवा रोग हो।

²⁶तर पूजाहारीले जाँच गर्दा त्‍यस दागमा सेतो रौँ रहेनछ, र छालाभन्‍दा गहिरो पनि रहेनछ तर सुक्‍दैगएको रहेछ भने, पूजाहारीले त्‍यसलाई सात दिनसम्‍म अलग्‍ग राखून्‌।

²⁷पूजाहारीले त्‍यसलाई सातौँ दिनमा जाँच गरून्‌। त्‍यो छालामा फैलिएको रहेछ भने पूजाहारीले त्‍यसलाई अशुद्ध ठहराऊन्‌। त्‍यो छालाको सरुवा रोग हो।

²⁸तर त्‍यो दाग नफैलिएर एकै ठाउँमा रहेछ र हराउँदैगयो भने, त्‍यो पोलेको घाउबाट सुनिएको हो। तब पूजाहारीले त्‍यसलाई शुद्ध ठहराऊन्, किनभने त्‍यो पोलेको घाउको खत मात्र हो।

²⁹“कुनै पुरुष वा स्‍त्रीको कपाल अथवा चिउँड़ोमा घाउ रहेछ भने,

³⁰पूजाहारीले त्‍यो घाउ जाँच गरून्, र त्‍यो छालाभन्‍दा गहिरो देखियो र त्‍यसमा भएको रौँ मसिनो र पहेँलो छ भने, पूजाहारीले त्‍यसलाई अशुद्ध ठहराऊन्‌। त्‍योचाहिँ चिलाउने व्‍यथा, अर्थात्‌ कपाल वा चिउँड़ोको सरुवा रोग हो।

³¹तर पूजाहारीले त्‍यो चिलाउने व्‍यथा जाँच गर्दा त्‍यो छालाभन्‍दा गहिरो देखिँदैन र त्‍यसमा कालो रौँ पनि छैन भने, पूजाहारीले त्‍यस रोगीलाई सात दिनसम्‍म अलग्‍ग राखून्‌।

³²सातौँ दिनमा पूजाहारीले त्‍यस घाउलाई जाँच गरून्, र त्‍यो चिलाउने व्‍यथा फैलिएको छैन र त्‍यसमा रौँ पहेँलो भएको छैन अनि त्‍यो छालाभन्‍दा गहिरो छैन भने,

³³त्‍यसले घाउचाहिँ छोड़ेर आफ्‍नो कपाल र दाह्री खौरोस्‌। पूजाहारीले त्‍यस रोगीलाई अझै सात दिनसम्‍म अलग्‍ग राखून्‌।

³⁴सातौँ दिनमा पूजाहारीले त्‍यसको चिलाउने व्‍यथा जाँच गरून्‌। त्‍यो व्‍यथा नफैलिएर छालाभन्‍दा गहिरो देखिएन भने पूजाहारीले त्‍यसलाई शुद्ध ठहराऊन्‌। अनि त्‍यसले आफ्‍ना लुगा धोएर त्‍यो शुद्ध हुनेछ।

³⁵तर त्‍यो शुद्ध ठहरिएपछि पनि त्‍यो चिलाउने व्‍यथा छालामा फैलिन थाल्‍यो भने,

³⁶पूजाहारीले त्‍यो जाँच गरून्‌। त्‍यो छालामा फैलियो भने, पूजाहारीले पहेँलो रौँ छ कि छैन भनेर हेर्नुपर्दैन। त्‍यो अशुद्ध हो।

³⁷तर पूजाहारीले जाँच गर्दा त्‍यो चिलाउने व्‍यथा जस्‍ताको त्‍यस्‍तै रहेछ र त्‍यसमा कालो रौँ उम्रेछ भने, त्‍यो व्‍यथा निको भएको हो। त्‍यो शुद्ध छ, र पूजाहारीले त्‍यसलाई शुद्ध ठहराऊन्‌।

³⁸“कुनै पुरुष अथवा स्‍त्रीको छालामा सेता दागहरू रहेछन्‌ भने,

³⁹पूजाहारीले ती जाँच गरून्, र त्‍यसको छालामा ती दागहरू फिक्‍का सेता रहेछन्‌ भने त्‍यो चर्मरोग मात्र हो, जो छालामा निस्‍केको छ। त्‍यो मानिस शुद्धै हो।

⁴⁰“कसैको केश झरेको रहेछ भने त्‍यो तालुखुइलेको हो, तर त्‍यो शुद्धै हो।

⁴¹त्‍यसको केश त्‍यसका टाउकोको अगिल्‍तिर खुइलेको छ भने त्‍यो निधार खुइलेको हो, तर त्‍यो शुद्धै हो।

⁴²तर त्‍यसको तालु अथवा निधार खुइलेकोमा रातो-रातो परेको सेतो खटिरा भए त्‍यो तालु अथवा निधारबाट फुटेर निस्‍केको सरुवा रोग हो।

⁴³पूजाहारीले त्‍यसलाई जाँच गरेर हेर्दा सरुवा रोगको जस्‍तै तालु अथवा निधार खुइलेको ठाउँमा सुनिएर रातो-रातो परेको सेतो खटिरा देखियो भने,

⁴⁴त्‍यो मानिस रोगी र अशुद्ध हो। त्‍यसको टाउकोमा भएको खटिराको कारणले, पूजाहारीले त्‍यसलाई अशुद्ध ठहराउनेछन्‌।

⁴⁵“सरुवा रोग भएको मानिसले च्‍यातिएका लुगा लगाउनुपर्छ, र त्‍यसको शिरको केश अस्‍तव्‍यस्‍त रहनुपर्छ। त्‍यसले आफ्‍नो मुखको पल्‍लो भाग ढाकेर ‘अशुद्ध, अशुद्ध’ भनेर कराओस्‌।

⁴⁶जहिलेसम्‍म त्‍यो रोगग्रस्‍त रहन्‍छ, त्‍यो अशुद्धै रहनेछ। त्‍यो एकलै रहनुपर्छ। छाउनीबाहिर त्‍यसको डेरा होस्‌।

⁴⁷“जुन लुगामा ढुसीको दाग छ, चाहे ऊनी होस्‌ अथवा सूती,

⁴⁸ताना होस्‌ अथवा बाना, सूती कि ऊनी जेसुकै होस्, छाला अथवा छालाले बनेको होस्‌—

⁴⁹ढुसी हरियो अथवा रातो परेको, लुगा, छाला, ताना, बाना अथवा छालाको कुनै वस्‍तुमा भए त्‍यो फैलिने ढुसी हो, र पूजाहारीलाई देखाउनुपर्छ।

⁵⁰पूजाहारीले त्‍यसको दागलाई जाँच गरून्, र त्‍यो दाग लागेको वस्‍तुलाई सात दिनसम्‍म अलग्‍ग राखून्‌।

⁵¹पूजाहारीले त्‍यो दागलाई सातौँ दिनमा जाँच गरून्‌। लुगा, ताना, बाना अथवा जुनसुकै काममा लाउने छालामा त्‍यो ढुसी फैलिएको रहेछ भने त्‍यो खतरनाक ढुसी हो। त्‍यो वस्‍तु अशुद्ध हो।

⁵²तब त्‍यो ढुसी लागेको लुगा, ताना, ऊनी, सूती अथवा छालाको कुनै वस्‍तु भए पनि पूजाहारीले त्‍यो जलाइदेऊन्, किनभने त्‍यो कुहाउने ढुसी हो। त्‍यो आगोमा जलाइओस्‌।

⁵³“तर पूजाहारीले जाँच गर्दा त्‍यो ढुसी लुगा, ताना, बाना, अथवा छालाको कुनै वस्‍तुमा फैलिएको छैन भने,

⁵⁴त्‍यो ढुसी लागेको वस्‍तु तिनीहरूले धुनू भनी पूजाहारीले आज्ञा देऊन्। तब तिनले अझै सात दिनसम्‍म त्‍यसलाई अलग्‍ग राखून्‌।

⁵⁵त्‍यो वस्‍तु धोएपछि पूजाहारीले जाँच गरून्, र ढुसी फैलिएको नभए तापनि आफ्‍नो रङ्ग बद्‌लेको छैन भने त्‍यो अशुद्ध हो। त्‍यो ढुसी भित्रपट्टि होस्‌ वा बाहिरपट्टि होस्, त्‍यसलाई आगोमा जलाइदिनू।

⁵⁶त्‍यो वस्‍तु धोएपछि पूजाहारीले जाँच गर्दा ढुसी हराउँदैगएको रहेछ भने त्‍यो लुगा, ताना वा बाना वा छालाबाट त्‍यो ढुसी लागेको भाग मात्र पूजाहारीले च्‍यातून्‌।

⁵⁷तर त्‍यो ढुसी अझै पनि लुगा, ताना, बाना वा छालाको कुनै वस्‍तुमा फेरि देखियो भने, त्‍यो फैलिँदैगएको हो। त्‍यो ढुसी भएको वस्‍तु आगोमा जलाइनुपर्छ।

⁵⁸जुन लुगा, ताना, बाना अथवा छालाको जुनसुकै वस्‍तु भए पनि धुँदा त्‍यसबाट ढुसी गयो भने, त्‍यो दोस्रो पल्‍ट धोइओस्, र त्‍यो शुद्ध हुनेछ।

⁵⁹ऊनी अथवा सूती लुगामा, ताना वा बानामा अथवा छालाको कुनै वस्‍तुमा ढुसीको दागलाई शुद्ध वा अशुद्ध ठहराउनलाई पालन गरिने विधि यी नै हुन्‌’।”