Read Nepali New Revised Version, 2012 लेवीहरू 14 Bible Online

लेवीहरू 14 - Nepali New Revised Version, 2012 bible

लेवीहरू 14

²“रोगीलाई शुद्ध गर्दा यी विधिहरू पालन गर्नू। त्‍यस दिन त्‍यसलाई पूजाहारीकहाँ ल्‍याइओस्‌।

³पूजाहारीले त्‍यसलाई छाउनीबाहिर लगेर त्‍यसको जाँच गरून्‌। छालाको त्‍यो सरुवा रोग निको भएछ भने,

⁴त्‍यसको निम्‍ति दुई वटा जिउँदो शुद्ध पक्षी, देवदारुको काठ, हिसप र सिन्‍दूरे रङ्गको धागो ल्‍याउनू भनी पूजाहारीले आज्ञा देऊन्।

⁵तब पूजाहारीले ती पक्षीहरूमध्‍ये एउटालाई माटोको भाँड़ामा भएको ताजा पानीमाथि मार्ने आज्ञा देऊन्।

⁶त्‍यो जिउँदो पक्षीलाई चाहिँ देवदारुको काठ, सिन्‍दूरे रङ्गको धागो र हिसपसमेत लिई त्‍यही माटोको भाँड़ामा भएको ताजा पानीमाथि मारिएको पक्षीको रगतमा तिनले चोपलून्‌।

⁷सरुवा रोगबाट शुद्ध हुनुपर्नेमाथि सात पल्‍ट छर्केर तिनले त्‍यसलाई शुद्ध ठहराऊन्‌। तब तिनले त्‍यो जिउँदो पक्षीलाई खुला मैदानमा छोड़िदेऊन्।

⁸“त्‍यो शुद्ध हुनुपर्नेचाहिँले आफ्‍ना लुगा धोओस्, र आफ्‍ना सबै केश खौरेर नुहाओस्, अनि त्‍यो शुद्ध हुनेछ। त्‍यसपछि त्‍यो छाउनीभित्र आओस्, तर सात दिनसम्‍म आफ्‍नो पालबाहिर नै त्‍यो बस्‍नुपर्छ।

⁹सातौँ दिनमा त्‍यसले आफ्‍ना सबै केश, दाह्री र आँखीभुइँ, अर्थात्‌ आफ्‍ना सबै रौँ खौरोस्‌। त्‍यसले आफ्‍ना लुगा धोएर आफ्‍नो शरीर पानीले नुहाओस्, अनि त्‍यो शुद्ध हुनेछ।

¹⁰“आठौँ दिनमा त्‍यसले दुई वटा निष्‍खोट भेड़ाका पाठा र एक वर्षे एउटी निष्‍खोट पाठी, र अन्‍नबलिको लागि तेलमा मुछेको डेढ़ पाथी मसिनो पीठो, र आधा माना तेल ल्‍याओस्‌।

¹¹त्‍यो शुद्ध हुनुपर्ने मानिसलाई ती सामानहरूसमेत भेट हुने पालको ढोकामा परमप्रभुको सामुन्‍ने शुद्ध ठहराउने पूजाहारीले प्रस्‍तुत गर्नेछन्‌।

¹²“तब पूजाहारीले त्‍यो आधा मानाको तेलसमेत भेड़ाका पाठाहरूमध्‍ये एउटा लिएर दोषबलि गरी चढ़ाऊन्, र डोलाइने बलिको निम्‍ति ती परमप्रभुको सामु डोलाऊन्‌।

¹³अनि त्‍यसले पापबलि र होमबलि मारिने पवित्र ठाउँमा त्‍यो पाठो मारोस्, किनकि पापबलि पूजाहारीको भएझैँ दोषबलि पनि त्‍यसैको हुन्‍छ। त्‍यो अति पवित्र हो।

¹⁴तब पूजाहारीले दोषबलिको केही रगत लिएर शुद्ध हुनुपर्नेको दाहिने कानको लोती, दाहिने हातको बूढ़ी-औँलो र दाहिने खुट्टाको बूढ़ी-औँलामा लगाइदेऊन्।

¹⁵फेरि पूजाहारीले आधा माना तेल लिएर आफ्‍नो देब्रे हातको हत्‍केलामा केही खन्‍याऊन्‌।

¹⁶पूजाहारीले आफ्‍नो दाहिने हातको औँलो देब्रे हातमा रहेको तेलमा चोपलेर त्‍यसबाट केही लिएर आफ्‍नो औँलाले परमप्रभुको सामु सात पल्‍ट छर्कून्‌।

¹⁷अनि पूजाहारीले आफ्‍नो हातमा रहेको तेलबाट केही लिएर त्‍यो शुद्ध हुनुपर्नेको दाहिने कानको लोती, त्‍यसको दाहिने हातको बूढ़ी-औँलो र त्‍यसको दाहिने खुट्टाको बूढ़ी-औँलामा दोषबलिको रगतमाथि लगाइदेऊन्।

¹⁸पूजाहारीले आफ्‍नो हातमा रहेको बाँकी तेल त्‍यस शुद्ध हुनुपर्नेको टाउकोमा लगाइदेऊन्, अनि तिनले परमप्रभुको सामु त्‍यसको निम्‍ति प्रायश्‍चित गरून्‌।

¹⁹“तब त्‍यो अशुद्धपनाबाट शुद्ध हुनुपर्ने कारणले पूजाहारीले पापबलि चढ़ाएर त्‍यसको निम्‍ति प्रायश्‍चित गरून्‌। त्‍यसपछि तिनले होमबलि मारून्‌।

²⁰पूजाहारीले होमबलि र अन्‍नबलि वेदीमा चढ़ाऊन्, र त्‍यसको निम्‍ति प्रायश्‍चित गरून्, र त्‍यो शुद्ध हुनेछ।

²¹“तर त्‍यो दरिद्र छ र त्‍यति पनि पाउन सक्‍दैन भने, त्‍यसले आफ्‍नो प्रायश्‍चितको निम्‍ति दोषबलिको लागि डोलाउनलाई भेड़ाको एउटा पाठो, र अन्‍नबलिको लागि तेलमा मुछेको आधा पाथी मसिनो पीठो, र आधा माना तेल,

²²र आफूले जस्‍तो पाउन सक्‍छ, दुई वटा ढुकुर कि दुई वटा परेवाका बचेरा, एउटा पापबलिको लागि र अर्को होमबलिको लागि ल्‍याओस्‌।

²³“आठौँ दिनमा आफू शुद्ध हुनलाई त्‍यसले भेट हुने पालको ढोकामा परमप्रभुको सामुन्‍ने पूजाहारीकहाँ ती ल्‍याओस्‌।

²⁴तब पूजाहारीले दोषबलिको पाठो र आधा माना तेल लिएर डोलाइने बलिको निम्‍ति परमप्रभुको सामु ती डोलाऊन्‌।

²⁵दोषबलिको पाठो मारेर पूजाहारीले बलिको रगतबाट केही लिएर त्‍यो शुद्ध हुनुपर्नेको दाहिने कानको लोती, दाहिने हातको बूढ़ी-औँलो र दाहिने खुट्टाको बूढ़ी-औँलामा लगाइदेऊन्।

²⁶पूजाहारीले त्‍यस तेलबाट आफ्‍नो देब्रे हातको हत्‍केलामा केही खन्‍याऊन्,

²⁷र आफ्‍नो दाहिने हातको औँलाले आफ्‍नो देब्रे हातमा भएको केही तेल परमप्रभुको सामु सात पल्‍ट छर्कून्‌।

²⁸अनि पूजाहारीले आफ्‍नो हातमा भएको तेलबाट केही लिएर त्‍यो शुद्ध हुनुपर्नेको दाहिने कानको लोती, दाहिने हातको बूढ़ी-औँलो र दाहिने खुट्टाको बूढ़ी-औँलामा दोषबलिको रगत लगाएकै ठाउँमा लगाइदेऊन्।

²⁹अनि पूजाहारीले आफ्‍नो हातमा रहेको बाँकी तेल त्‍यस शुद्ध हुनुपर्नेका प्रायश्‍चितको निम्‍ति परमप्रभुको सामु त्‍यसको टाउकोमा लगाइदेऊन्।

³⁰त्‍यसपछि ढुकुर अथवा परेवाका बचेरा जे त्‍यसले पाउन सक्‍छ,

³¹एउटा पापबलिको निम्‍ति, अर्को होमबलिको निम्‍ति पूजाहारीले अन्‍नबलिको साथमा चढ़ाऊन्‌। यसरी पूजाहारीले त्‍यस शुद्ध हुनुपर्नेको निम्‍ति परमप्रभुको सामुन्‍ने प्रायश्‍चित गर्नेछन्‌।”

³²छालाको सरुवा रोग लागेर शुद्ध हुनलाई औकात नपुग्‍ने मानिसको निम्‍ति विधिहरू यी नै हुन्‌।

³³परमप्रभुले मोशा र हारूनलाई भन्‍नुभयो,

³⁴“जब मैले तिमीहरूको अधिकारमा दिन लागेको कनान देशमा तिमीहरू पुगौला, र तिमीहरूले अधिकारमा पाएको देशको कुनै घरमा फैलिने ढुसी मैले उत्‍पन्‍न गराएँ भने,

³⁵त्‍यस घरको धनी गएर ‘मेरो घरमा ढुसी परेजस्‍तो लाग्‍छ’ भनी पूजाहारीलाई भनोस्‌।

³⁶ढुसी जाँच गर्नुभन्‍दा अघि चीजबीज अशुद्ध नठहराऊन्‌ भनेर घर रित्तो पार्ने आदेश पूजाहारीले देऊन्। त्‍यसपछि पूजाहारी घर जाँच गर्न भित्र जाऊन्‌।

³⁷अनि तिनले त्‍यो ढुसी जाँच गरून्‌। त्‍यो ढुसी घरका भित्तामा हरियो कि रातो रङ्गको गहिराइजस्‍तो रहेछ भने, र भित्ता गड़ेको देखा पर्दोरहेछ भने,

³⁸घरदेखि ढोका भएर बाहिर निस्‍केर पूजाहारीले सात दिनसम्‍म त्‍यस घरलाई बन्‍द गरून्‌।

³⁹फेरि सातौँ दिनमा आएर पूजाहारीले त्‍यो हेरून्, र त्‍यो घरका भित्ताहरूमा ढुसी फैलिएको रहेछ भने,

⁴⁰पूजाहारीले ती ढुसी परेका ढुङ्गाहरू निकालेर सहरबाहिर कहीँ अशुद्ध ठाउँमा फाल्‍ने आज्ञा देऊन्।

⁴¹तिनले घरको भित्रपट्टि चारैतिर खुर्किन लगाऊन्, र खुर्किएको लिउनको माटो तिनीहरूले सहरबाहिर कहीँ अशुद्ध ठाउँमा फालून्‌।

⁴²त्‍यसपछि तिनीहरूले अरू ढुङ्गा ल्‍याएर ती ढुङ्गाहरूका ठाउँमा लगाइदेऊन्, अनि अर्को लिउन ल्‍याएर घर पोतिदेऊन्।

⁴³“ढुङ्गाहरू निकाली घर खुर्केर पोतिसकेपछि पनि त्‍यो ढुसी त्‍यस घरमा फेरि देखा पर्‍यो भने,

⁴⁴पूजाहारी गएर हेरून्‌। त्‍यो ढुसी घरमा फैलिएको रहेछ भने, त्‍यो खतरनाक ढुसी हो। त्‍यो घर अशुद्ध ठहर्नेछ।

⁴⁵त्‍यो घर भत्‍काइओस्, त्‍यसका ढुङ्गाहरू, काठपातहरू र सबै लिउनहरू लगेर सहरबाहिर कहीँ अशुद्ध ठाउँमा फालिओस्‌।

⁴⁶“त्‍यस उप्रान्‍त त्‍यो घर बन्‍द रहुञ्‍जेल कोही त्‍यसभित्र पस्‍यो भने त्‍यो साँझसम्‍म अशुद्ध रहन्‍छ।

⁴⁷अनि त्‍यस घरमा सुत्‍ने वा खानेले पनि आफ्‍ना लुगा धुनुपर्छ।

⁴⁸“तर पूजाहारीले त्‍यस घरभित्र पसेर जाँच गर्दा घर पोतिएपछि ढुसी फैलिएको रहेनछ भने, पूजाहारीले त्‍यस घरलाई शुद्ध ठहराऊन्, किनभने ढुसी हटेको छ।

⁴⁹अनि घर शुद्ध पार्नलाई तिनले दुई वटा चरा, देवदारुको काठ, हिसप र सिन्‍दूरे रङ्गको धागो ल्‍याऊन्‌।

⁵⁰अनि तिनले माटोको भाँड़ामा भएको ताजा पानीमाथि चराहरूमध्‍ये एउटालाई मारून्‌।

⁵¹त्‍यसपछि देवदारुको काठ, हिसप, सिन्‍दूरे रङ्गको धागो र जिउँदो चरालाई लिएर त्‍यो मारिएको चराको रगतमा र ताजा पानीमा चोपेर त्‍यस घरमा सात पल्‍ट छर्कून्‌।

⁵²तिनले चराको रगत, ताजा पानी, जिउँदो चरा, देवदारुको काठ, हिसप र सिन्‍दूरे रङ्गको धागोले घरलाई शुद्ध पारून्‌।

⁵³तब तिनले जिउँदो चरालाई चाहिँ सहरबाहिर खुला मैदानमा छोड़िदेऊन्। यसरी तिनले त्‍यस घरको निम्‍ति प्रायश्‍चित गर्नेछन्, अनि त्‍यो शुद्ध हुनेछ।”

⁵⁴छालाका सबै किसिमका सरुवा रोग, र चिलाउने व्‍यथा,

⁵⁵लुगाको र घरको ढुसी,

⁵⁶सूज र बिमिरा र उज्‍ज्‍वल दागको निम्‍ति शुद्ध वा अशुद्ध ठहराउने विधि यी नै हुन्‌।

⁵⁷छालाका सरुवा रोगहरू र ढुसीको निम्‍ति विधिहरू यी नै हुन्‌।