Read Nepali New Revised Version, 2012 लेवीहरू 18 Bible Online

लेवीहरू 18 - Nepali New Revised Version, 2012 bible

लेवीहरू 18

¹परमप्रभुले मोशालाई भन्‍नुभयो,

²“इस्राएलीहरूलाई भन्‌: ‘म परमप्रभु तिमीहरूका परमेश्‍वर हुँ।

³तिमीहरूले प्रवास गरेको मिश्रीका रीतिथिति नमान्‍नू। अनि अब म तिमीहरूलाई कनान देशमा लैजाँदैछु, यसकारण त्‍यहाँका रीतिथिति र विधिहरू पनि नमान्‍नू।

⁴तिमीहरूले मेरा विधान र विधिहरू पालन गरेर त्‍यसअनुसार चल्‍नुपर्छ। म परमप्रभु तिमीहरूका परमेश्‍वर हुँ।

⁵तिमीहरूले मेरा यी विधिविधानहरू पालन गर्नू, किनभने ती पालन गर्ने मानिस तीद्वारा जीवित रहनेछ। म परमप्रभु हुँ।

⁶“‘तिमीहरूमध्‍ये कसैले पनि आफ्‍नो नजिकको साइनो पर्नेसित सहवास नगरोस्‌। म परमप्रभु हुँ।

⁷“‘तेरी आमासित सहवास गरेर आफ्‍ना बुबालाई शर्ममा नपार्‌। त्‍यो तेरी आमा हो। त्‍यससित तैंले सहवास नगर्‌।

⁸“‘तैंले आफ्‍ना बुबाकी पत्‍नीसित सहवास नगर्‌। त्‍यसो गर्नाले तैंले आफ्‍ना बुबाको अपमान गर्छस्‌।

⁹“‘तैंले आफ्‍नी साक्‍खै दिदी-बहिनी अथवा आफ्‍ना आमा वा बुबापट्टिकी झट्‌केली छोरीसित सहवास नगर्‌— त्‍यो आफ्‍नै घरमा होस्‌ कि बाहिर जन्‍मेर बढ़ेकी होस्‌।

¹⁰“‘आफ्‍नो छोरापट्टिकी होस्‌ कि छोरीपट्टिकी होस्, तैंले आफ्‍नी नातिनीसित सहवास नगर्‌। त्‍यसबाट तैंले आफ्‍नै अपमान गर्नेछस्‌।

¹¹“‘तैंले आफ्‍नी सौतिनी आमापट्टिकी छोरीसित सहवास नगर्‌। त्‍यो तेरी बहिनी हो।

¹²“‘तैंले आफ्‍नी फुपूसित सहवास नगर्‌। त्‍यो तेरा बुबाकी नजिककी नातेदार हो।

¹³“‘तैंले आफ्‍नी आमाकी दिदीबहिनीसित सहवास नगर्‌। त्‍यो तेरी आमाकी नजिककी नातेदार हो।

¹⁴“‘तैंले तेरी बड़ी-आमा कि काकीसित सहवास गरेर आफ्‍ना बुबाका दाजुभाइको अपमान नगर्‌। त्‍यो तेरी बड़ी-आमा अथवा काकी हो।

¹⁵“‘तैंले आफ्‍नी बुहारीसित सहवास नगर्‌। त्‍यो तेरो छोराकी पत्‍नी हो। तैंले त्‍यससित सहवास नगर्‌।

¹⁶“‘तैंले आफ्‍नी भाउजू वा भाइबुहारीसित सहवास गरेर आफ्‍नो दाजुभाइको अपमान नगर्‌।

¹⁷“‘कुनै स्‍त्री र त्‍यसकी छोरी दुवैसित तैंले सहवास नगर्‌। अनि त्‍यसको छोरा अथवा छोरीपट्टिकी नातिनीसित पनि सहवास नगर्‌। तिनीहरू नजिकका नातेदार हुन्‌। त्‍यसो गर्नु दुष्‍टता हो।

¹⁸“‘तैंले आफ्‍नी पत्‍नीकै जीवनकालमा त्‍यसकी दिदी वा बहिनीलाई सौता ल्‍याएर सहवास नगर्‌।

¹⁹“‘कुनै स्‍त्रीका रजस्‍वलाको समयमा त्‍यससित सहवास नगर्‌।

²⁰“‘तैंले परस्‍त्रीसित सहवास नगर्‌। त्‍यसरी तैंले आफूलाई अशुद्ध नपार्‌।

²¹“‘आफ्‍ना छोराछोरी मोलोखको निम्‍ति आगोमा चढ़ाएर आफ्‍ना परमेश्‍वरको नाउँ अपवित्र नपार्‌। म नै परमप्रभु हुँ।

²²“‘स्‍त्रीहरूसँगझैँ पुरुषसँग सम्‍भोग नगर्‌। त्‍यो घृणित कार्य हो।

²³“‘कुनै पशु-प्राणीसित सम्‍भोग गरेर तैंले आफूलाई अशुद्ध नगर्‌। स्‍त्री पनि सम्‍भोग गर्नलाई पशु-प्राणीसित नसुतोस्‌। त्‍यो अस्‍वाभाविक दुराचरण हो।

²⁴“‘यस्‍ता सबै कामहरूद्वारा तिमीहरू आफैलाई अशुद्ध नपार। म तिमीहरूका सामुन्‍नेबाट जुन जातिहरूलाई निकाल्‍दैछु तिनीहरू यी सबै कुरामा नै अशुद्ध भएका छन्‌।

²⁵त्‍यसरी नै त्‍यो देश अशुद्ध भएको हो। अनि मैले त्‍यसमाथि त्‍यसका अधर्मको दण्‍ड उठाएँ, र देशले आफ्‍ना बासिन्‍दाहरूलाई उकेलेर फ्‍याँकिदियो।

²⁶तर चाहे स्‍वदेशी होस्, चाहे तिमीहरूका बीचमा प्रवास गर्ने परदेशी होस्, तिमीहरूले मेरा विधिविधानहरू पालन गर्नू, र यस्‍ता घिनलाग्‍दा कामहरू नगर्नू।

²⁷किनभने यस्‍तै सबै घिनलाग्‍दा कामहरू त्‍यस देशका पूर्वबासिन्‍दाहरूले गरे, र त्‍यो देश अशुद्ध भयो।

²⁸मेरा विधिविधान पालन नगरेर यदि तिमीहरूले त्‍यस देशलाई अशुद्ध पार्‍यो भने त्‍यसका पूर्वबासिन्‍दालाई झैँ तिमीहरूलाई पनि त्‍यसले उकेलेर फ्‍याँकिदिनेछ।

²⁹“‘कसैले यीमध्‍ये कुनै घृणित काम गर्‍यो भने त्‍यो आफ्‍ना मानिसहरूबाट बहिष्‍कार गरिओस्‌।

³⁰यसकारण अघि-अघिकाहरूले गरिआएका घृणित काम तिमीहरूले चाहिँ नगर्नू र आफैलाई अशुद्ध नगर्नू भनी मैले दिएका आदेश पालन गर। म परमप्रभु तिमीहरूका परमेश्‍वर हुँ’।”