Read Nepali New Revised Version, 2012 लेवीहरू 21 Bible Online

लेवीहरू 21 - Nepali New Revised Version, 2012 bible

लेवीहरू 21

¹परमप्रभुले मोशालाई भन्‍नुभयो, “हारूनका छोराहरू, पूजाहारीहरूलाई यसो भन्‌: ‘तिमीहरूका आफन्‍त कोही मर्दा तिमीहरू कसैले मुर्दा छोएर आफूलाई अशुद्ध नपार्नू,

²केवल आफ्‍नो साक्‍खै पर्नेहरू, अर्थात्‌ आफ्‍नी आमा, बुबा, छोराछोरी, दाजुभाइ,

³अथवा आफ्‍नी साक्‍खै कन्‍या दिदी-बहिनीको निम्‍ति मात्र त्‍यसले आफूलाई अशुद्ध तुल्‍याओस्‌।

⁴विवाहद्वारा नाता जोड़िएका कसैको निम्‍ति पनि त्‍यसले आफैलाई अशुद्ध गरेर अपवित्र नपार्नू।

⁵“‘पूजाहारीहरूले शोकमा आफ्‍नो कपाल नखौरून्, दाह्रीका कुनाहरू नछाँटून्‌ र आफ्‍नो शरीरमा कुनै चोट नपारून्‌।

⁶आफ्‍ना परमेश्‍वरको निम्‍ति तिनीहरू पवित्र रहून्, अनि आफ्‍ना परमेश्‍वरको नाउँ अपवित्र नगरून्, किनकि तिनीहरूले परमप्रभुको निम्‍ति आगोद्वारा चढ़ाइने बलि, अर्थात्‌ परमेश्‍वरको भोजन चढ़ाउने गर्दछन्‌। यसकारण तिनीहरू पवित्रै रहून्‌।

⁷“‘तिनीहरूले कुनै वेश्‍या वा बिग्रेकी स्‍त्री अथवा पतिले त्‍यागेकी स्‍त्रीलाई नल्‍याऊन्, किनभने पूजाहारीहरू आफ्‍ना परमेश्‍वरको निम्‍ति पवित्र छन्‌।

⁸तिमीहरूले पूजाहारीहरूलाई पवित्र मान, किनकि तिनीहरूले आफ्‍ना परमेश्‍वरको भोजन चढ़ाउने गर्दछन्‌। तिनीहरू तिमीहरूका निम्‍ति पवित्र होऊन्, किनकि तिमीहरूलाई पवित्र बनाउने म, परमप्रभु, पवित्र छु।

⁹“‘कुनै पूजाहारीकी छोरीले वेश्‍या काम गरेर आफूलाई अशुद्ध गरी भने, त्‍यसले आफ्‍ना बुबाको अपमान गर्छे। त्‍यो आगोमा जलाइओस्‌।

¹⁰“‘जो आफ्‍ना दाजुभाइमा प्रधान पूजाहारी भएको छ, र जसको शिरमा अभिषेकको तेल खन्‍याइसकेको छ, अनि जो पूजाहारी पदको वस्‍त्र लगाउनलाई अलग गरिएको छ, त्‍यसले आफ्‍नो शिरको कपाल शोकमा नफुकाओस्, अनि आफ्‍नो लुगा नच्‍यातोस्‌।

¹¹कुनै लाश भएको ठाउँ गएर त्‍यसले आफैलाई अशुद्ध नपारोस्‌— चाहे त्‍यो आफ्‍नै बुबा वा आमाको लाश होस्‌।

¹²त्‍यो पवित्रस्‍थानबाट बाहिर ननिस्‍किओस्, र त्‍यसले आफ्‍ना परमेश्‍वरको पवित्रस्‍थान अपवित्र नपारोस्, किनभने परमेश्‍वरका अभिषेकको तेलले त्‍यसलाई चोख्‍याएको छ। म परमप्रभु हुँ।

¹³“‘त्‍यसले कन्‍ये-केटीलाई विवाह गरोस्‌।

¹⁴त्‍यसले विधवा, विवाहविच्‍छेद भएकी स्‍त्री, बिग्रेकी स्‍त्री वा वेश्‍यालाई नल्‍याओस्, तर आफ्‍नो कुलकै कन्‍ये-केटीलाई त्‍यसले विवाह गरोस्,

¹⁵र त्‍यसले आफ्‍ना मानिसहरूका बीचमा आफ्‍नो वंशलाई अशुद्ध नतुल्‍याओस्‌। त्‍यसलाई पवित्र तुल्‍याउने परमप्रभु म नै हुँ’।”

¹⁶परमप्रभुले मोशालाई भन्‍नुभयो,

¹⁷“हारूनलाई भन्‌: ‘तेरो कुलका सबै पुस्‍तामा खोट हुने जोसुकै होस्, आफ्‍ना परमेश्‍वरको भोजन चढ़ाउनलाई त्‍यो नजिक नआओस्‌।

¹⁸खोट भएको जुनसुकै मानिस होस्, अन्‍धा वा लङ्गड़ा, रूप वा अङ्ग बिग्रेको,

¹⁹खुट्टा कि हात बाङ्गिएको,

²⁰कुप्रे, बाउन्‍ने, आँखाको रोग भएको, पाकेको घाउ भएको, अण्‍डमा चोट लागेको कोही पनि नजिक नआओस्‌।

²¹हारून पूजाहारीका वंशमध्‍येको खोट भएको कोही पनि परमप्रभुको निम्‍ति अग्‍नि-होम चढ़ाउनलाई नजिक नआओस्‌। त्‍यसमा खोट छ। त्‍यो आफ्‍ना परमेश्‍वरको भोजन चढ़ाउनलाई नजिक आउनुहुँदैन।

²²आफ्‍ना परमेश्‍वरको पवित्र र महापवित्र भोजन त्‍यसले खान सक्‍छ।

²³तर त्‍यसमा खोट भएकोले त्‍यसले पर्दा र वेदीको नजिक आएर मेरो पवित्रस्‍थान अपवित्र नपारोस्‌। तिनीहरूलाई पवित्र पार्ने परमप्रभु म नै हुँ’।”

²⁴तब मोशाले हारून, उनका छोराहरू र सारा इस्राएलीहरूलाई यी कुरा सुनाए।