Read Nepali New Revised Version, 2012 लेवीहरू 22 Bible Online

लेवीहरू 22 - Nepali New Revised Version, 2012 bible

लेवीहरू 22

¹परमप्रभुले मोशालाई भन्‍नुभयो,

²“हारून र त्‍यसका छोराहरूलाई भन्‌: ‘इस्राएलीहरूले मेरो निम्‍ति चढ़ाएका पवित्र थोकहरूका बारेमा तिमीहरू होशियार रहो, र मेरो नाउँ अपवित्र नगर्नू। म परमप्रभु हुँ’।

³“तिनीहरूलाई भन्‌: ‘तिमीहरूको कुनै पुस्‍तामा पनि यदि कोही अशुद्ध मान्‍छे इस्राएलीहरूले परमप्रभुलाई अर्पण गरेका पवित्र थोकहरूका नजिक गयो भने, त्‍यस मान्‍छे मेरो सामुन्‍नेबाट बहिष्‍कृत हुनेछ। म परमप्रभु हुँ।

⁴“‘हारूनका सन्‍तानमध्‍ये कसैलाई पनि छालाको सरुवा रोग वा धातुको रोग छ भने, त्‍यो शुद्ध नहोउञ्‍जेल पवित्र थोकहरूबाट त्‍यसले केही नखाओस्‌। लाश छुने, धातु रोगीलाई छुने,

⁵घस्रने जीवजन्‍तुलाई छुने र कुनै पनि अशुद्धता भएको मान्‍छेलाई छुने

⁶मानिस साँझसम्‍म अशुद्ध रहोस्‌। त्‍यसले आफ्‍नो शरीर नधोउञ्‍जेल पवित्र थोकहरूबाट नखाओस्‌।

⁷सूर्य अस्‍ताएपछि मात्र त्‍यो शुद्ध हुनेछ। त्‍यसपछि त्‍यसले पवित्र थोकहरूबाट खान सक्‍छ, किनभने त्‍यो त्‍यसको भोजन हो।

⁸आफै मरेको अथवा जङ्गली पशुले फहराएर मारेको जन्‍तु खाएर त्‍यसले आफूलाई अशुद्ध नपारोस्‌। म परमप्रभु हुँ।

⁹“‘पूजाहारीहरूले मेरा आज्ञाहरू पालन गरून्, नत्रता तिनीहरूले मेरा आज्ञा घृणा गरेको कारण तिनीहरू दोषी भएर मर्लान्‌। तिनीहरूलाई पवित्र तुल्‍याउने परमप्रभु म नै हुँ।

¹⁰“‘पूजाहारीको परिवारबाहेक जुनसुकै मान्‍छेले पवित्र थोक नखाओस्, न त पूजाहारीको पाहुना वा ज्‍यालादारी नोकरले पवित्र थोक खाओस्‌।

¹¹तर दाम हालेर किनेको पूजाहारीको कमाराले र तिनको घरमा जन्‍मेका कमाराहरूले पनि पूजाहारीका भोजनको भागबाट खाए हुन्‍छ।

¹²पूजाहारीकी छोरी अरू कुलको कुनै पुरुषसित विवाह भएकी छे भने त्‍यसले कुनै पवित्र भेटीहरूबाट नखाओस्‌।

¹³तर कुनै पूजाहारीकी छोरी विधवा वा त्‍यागिएकी छे र त्‍यसका छोराछोरी नभई आफ्‍ना बुबाको घरमा बसेकी छे भने, त्‍यसको बाल्‍यावस्‍थामा झैँ त्‍यसले बुबाको भोजनबाट खाओस्‌। तर अरू कुलको जोसुकैले त्‍यसबाट नखाओस्‌।

¹⁴“‘कुनै मानिसले थाहा नपाई पवित्र थोकबाट केही खायो भने, त्‍यसको पाँचौँ भाग थपेर त्‍यस पवित्र थोकको भर्ना पूजाहारीलाई देओस्‌।

¹⁵इस्राएलीहरूले परमप्रभुलाई चढ़ाएका पवित्र थोकहरू पूजाहारीले अपवित्र नपारून्‌।

¹⁶पूजाहारीले पवित्र भेटीबाट मानिसहरूलाई खान नदेऊन्, नत्रता तिनीहरूले आफ्‍नो अधर्मको दोष र दण्‍ड भोग्‍नेछन्‌। तिनीहरूलाई पवित्र तुल्‍याउने परमप्रभु म नै हुँ’।”

¹⁷परमप्रभुले मोशालाई भन्‍नुभयो,

¹⁸“हारून, त्‍यसका छोराहरू र सबै इस्राएलीहरूलाई भन्‌: ‘इस्राएली अथवा इस्राएलमा वास गर्ने परदेशीले भाकल वा राजीखुशीको होमबलि परमप्रभुलाई चढ़ाउँदा,

¹⁹त्‍यो ग्रहणयोग्‍य हुनलाई साँढ़े, भेड़ा वा बोकाहरूबाट निष्‍खोट नरचाहिँ चढ़ाओस्‌।

²⁰खोट भएको जे छ त्‍यो तिमीहरूले नचढ़ाउनू, किनकि त्‍यो ग्रहणयोग्‍य हुनेछैन।

²¹मेलबलि चढ़ाएर परमप्रभुलाई आफ्‍नो भाकल पूरा गर्दा अथवा राजीखुशीको बलि चढ़ाउँदा बथान वा बगालबाट लिइने पशु ग्रहणयोग्‍य हुनलाई त्‍यो सिद्ध र निष्‍खोट हुनुपर्छ।

²²अन्‍धा, चोट भएका, अङ्गभङ्ग भएका, मूसा वा पाकेको घाउ भएका, यस्‍तालाई तिमीहरूले परमप्रभुको निम्‍ति अग्‍नि-होमको रूपमा वेदीमा नचढ़ाउनू।

²³तर अङ्गभङ्ग भएको साँढ़े वा भेड़ाचाहिँ तिमीहरूले राजीखुशीको बलिमा चढ़ाए हुन्‍छ। तर भाकलको बलिमा चाहिँ त्‍यो ग्रहण हुनेछैन।

²⁴जुन पशुका अण्‍ड कुच्‍च्‍याइएका वा चूर पारिएका, फोरिएका वा चिरिएका हुन्‍छन्, त्‍यो परमप्रभुको निम्‍ति नचढ़ाउनू। तिमीहरूको देशभरि नै त्‍यसो गर्नु निषेध छ।

²⁵कुनै परदेशीबाट लिएर पनि यस्‍तो कुनै पशु परमेश्‍वरको भोजन स्‍वरूप नचढ़ाउनू। तिनीहरूमा भएका अङ्गभङ्ग र खोटले गर्दा, ती तिमीहरूका निम्‍ति ग्रहणयोग्‍य हुनेछैन’।”

²⁶परमप्रभुले मोशालाई भन्‍नुभयो,

²⁷“बाछा वा भेड़ाबाख्राका पाठा बियाएको सात दिनसम्‍म त्‍यसकै माउसँग बसोस्‌। आठौँ दिनदेखि त्‍यसलाई आगोद्वारा बलि गरे त्‍यो परमप्रभुमा ग्रहणयोग्‍य हुनेछ।

²⁸गाई अथवा भेड़ीलाई त्‍यसको पाठासमेत एकै दिनमा नमार्नू।

²⁹“तिमीहरूले परमप्रभुको निम्‍ति धन्‍यवाद बलि चढ़ाउँदा त्‍यो ग्रहणयोग्‍य हुने गरी चढ़ाओ।

³⁰त्‍यही दिन त्‍यो खाइओस्‌। त्‍यसमा उब्रेको केही पनि बिहानसम्‍म नछोड़िओस्‌। म परमप्रभु हुँ।

³¹“तिमीहरूले मेरा आज्ञाहरू पालन गर्नू। म परमप्रभु हुँ।

³²मेरो पवित्र नाउँ तिमीहरूले अपवित्र नगर्नू। इस्राएलीहरूले म पवित्र छु भनी स्‍वीकार गरून्‌। तिमीहरूलाई पवित्र गराउने,

³³र तिमीहरूका परमेश्‍वर हुनलाई तिमीहरूलाई मिश्रबाट निकाली ल्‍याउने परमप्रभु मै हुँ। म परमप्रभु हुँ।”