Read Nepali New Revised Version, 2012 लेवीहरू 24 Bible Online

लेवीहरू 24 - Nepali New Revised Version, 2012 bible

लेवीहरू 24

¹परमप्रभुले मोशालाई भन्‍नुभयो,

²“इस्राएलीहरूलाई आज्ञा दे: ‘बत्ती निरन्‍तर बलिरहनलाई तिमीहरूले प्रकाशको लागि कुटेको भद्राक्षको चोखो तेल ल्‍याउनू’।

³भेट हुने पालमा गवाहीको पर्दादेखि बाहिर परमप्रभुको सामु साँझदेखि बिहानसम्‍म हारूनले ती बत्तीहरू निरन्‍तर रेखदेख गरोस्‌। यो तिमीहरूका पुस्‍तौँ-पुस्‍तौँका लागि अनन्‍तको विधि होस्‌।

⁴त्‍यसले परमप्रभुको सामुन्‍ने निरन्‍तर निखुर सुनको पानसमा भएका बत्तीहरू रेखदेख गरोस्‌।

⁵“मसिनो पीठो लिएर तैंले बाह्र वटा रोटी पकाउनू। प्रत्‍येक रोटीमा एक पाथी पीठो होस्‌।

⁶छ-छ वटाको लहर गरी दुई ताँती परमप्रभुको सामु निखुर सुनको टेबिलमा राख्‍नू।

⁷एक-एक ताँतीमा चोखो धूप राख्‍नू, र त्‍यो रोटीको सम्‍झना स्‍वरूप आगोद्वारा परमप्रभुलाई चढ़ाइएको भेटी होस्‌।

⁸हरेक शबाथ परमप्रभुको सामुन्‍ने त्‍यो रोटी बारम्‍बार राखिओस्‌। इस्राएलीहरूका निम्‍ति यो अनन्‍तको करार होस्‌।

⁹हारून र त्‍यसका छोराहरूका निम्‍ति त्‍यो हो, र तिनीहरूले पवित्र ठाउँमा त्‍यो खाऊन्, किनकि परमप्रभुको निम्‍ति आगोद्वारा चढ़ाइएका बलिहरूमध्‍ये यो तिनीहरूका सदाको भाग अति पवित्र हो।”

¹⁰एक जना मिश्री बुबा र इस्राएली आमाको छोरो इस्राएलीहरूका माझमा गएको थियो। त्‍यस इस्राएली स्‍त्रीको छोरो र एक जना इस्राएली पुरुष छाउनीभित्र आपसमा झगड़ा गरे।

¹¹त्‍यस इस्राएली स्‍त्रीको छोराले पवित्र नाउँको निन्‍दा गरेर सराप्‍न लाग्‍यो, र मानिसहरूले त्‍यसलाई मोशाकहाँ ल्‍याए। त्‍यसकी आमाको नाउँ शलोमीत थियो। त्‍यो दानका कुलको दिब्रीकी छोरी थिई।

¹²परमप्रभुको इच्‍छा तिनीहरूले थाहा नपाएसम्‍म त्‍यसलाई थुनामा राखे।

¹³तब परमप्रभुले मोशालाई भन्‍नुभयो,

¹⁴“त्‍यस सराप बक्‍नेलाई छाउनीदेखि बाहिर लैजा, र त्‍यसले भनेका कुरा सुन्‍नेहरू सबैले आ-आफ्‍ना हात त्‍यसको टाउकोमा राखून्‌। त्‍यसपछि जम्‍मै समुदायले त्‍यसलाई ढुङ्गा हानेर मारून्‌।

¹⁵तैंले इस्राएलीहरूलाई यसो भन्‌: ‘जसले आफ्‍ना परमेश्‍वरलाई सराप्‍छ, यसको निम्‍ति त्‍यो उत्तरदायी हुनेछ।

¹⁶परमप्रभुका नाउँको निन्‍दा गर्नेलाई सारा समुदायले ढुङ्गा हानेर मार्नुपर्छ। स्‍वदेशी अथवा परदेशी जोसुकै होस्, त्‍यसले परमप्रभुका नाउँको निन्‍दा गर्‍यो भने त्‍यसलाई मार्नैपर्छ।

¹⁷“‘कसैलाई मर्ने गरी हिर्काउनेलाई मार्नैपर्छ।

¹⁸पशुलाई मर्ने गरी हिर्काउनेले त्‍यसको भर्ना देओस्‌— पशुको साटो पशु।

¹⁹कुनै मानिसले आफ्‍नो छिमेकीको कुनै अङ्गको नोक्‍सान गरिदियो भने, त्‍यसले जसो गरेको छ त्‍यसलाई त्‍यसै गरिओस्‌।

²⁰चोटको साटो चोट, आँखाको साटो आँखा, दाँतको साटो दाँत, जसरी त्‍यसले कसैको अङ्गको नोक्‍सान गरिदियो त्‍यसलाई पनि त्‍यसरी नै गर्नू।

²¹पशु मार्नेले त्‍यसको भर्ना गरोस्‌। तर ज्‍यानमाराचाहिँ मारिनैपर्छ।

²²स्‍वदेशीको निम्‍ति र परदेशीको निम्‍ति एउटै किसिमको ऐन होस्‌। म परमप्रभु तिमीहरूका परमेश्‍वर हुँ’।”

²³मोशाले इस्राएलीहरूलाई यो कुरा बताएपछि तिनीहरूले त्‍यस सराप्‍नेलाई छाउनीबाहिर लगेर ढुङ्गाले हानेर मारे। यसरी परमप्रभुले मोशालाई आज्ञा दिनुभएबमोजिम इस्राएलीहरूले गरे।