Read Nepali New Revised Version, 2012 लेवीहरू 4 Bible Online

लेवीहरू 4 - Nepali New Revised Version, 2012 bible

लेवीहरू 4

¹परमप्रभुले मोशालाई भन्‍नुभयो,

²“इस्राएलीहरूलाई यसो भन्‌: ‘जब परमप्रभुले मनाही गर्नुभएका कुनै कुरामा कसैले अजानमा पाप गर्छ—

³“‘यदि कुनै अभिषेक भएका पूजाहारीले पाप गरेर मानिसहरूमा दोष ल्‍याए भने तिनले गरेको त्‍यस पापको निम्‍ति एउटा निष्‍खोट साँढ़े परमप्रभुअगि पापबलि चढ़ाऊन्‌।

⁴तिनले त्‍यस साँढ़ेलाई भेट हुने पालको ढोकानेर परमप्रभुकहाँ ल्‍याएर त्‍यसको टाउकोमा आफ्‍नो हात राखी त्‍यसलाई परमप्रभुको सामु मारून्‌।

⁵अनि अभिषेक भएका पूजाहारीले साँढ़ेको रगत लिएर भेट हुने पालमा ल्‍याऊन्‌।

⁶पूजाहारीले आफ्‍नो औँला रगतमा चोपेर त्‍यस रगतबाट केही पवित्रस्‍थानको पर्दाको अगिल्‍तिर परमप्रभुको सामु सात पल्‍ट छर्कून्‌।

⁷त्‍यसपछि पूजाहारीले भेट हुने पालभित्र रहेको सुगन्‍धित धूपको वेदीका सीङहरूमा परमप्रभुको सामु त्‍यस रगतबाट केही लगाऊन्, र साँढ़ेको बाँकी रगत भेट हुने पालको ढोकामा होमबलिका वेदीको आधारमा खन्‍याऊन्‌।

⁸पापबलिका साँढ़ेको बोसोजति सबै तिनले त्‍यसबाट झिकून्, आन्‍द्रा-भुँड़ी ढाक्‍ने बोसो र आन्‍द्रामाथिको बोसो,

⁹दुवै मिर्गौला र तीमाथि र कम्‍मरनेर भएको बोसो, र मिर्गौलासमेत कलेजा ढाक्‍ने मासु तिनले झिकून्‌।

¹⁰मेलबलिको बलिदानमा चढ़ाइने साँढ़ेको बोसो झिकेझैँ पूजाहारीले ती होमबलिको वेदीमा जलाऊन्,

¹¹तर साँढ़ेको छाला, त्‍यसका जम्‍मै मासु, त्‍यसका टाउको, खुट्टा र आन्‍द्रा-भुँड़ी गोबरसमेत,

¹²अर्थात्‌ सिङ्गै साँढ़े छाउनीदेखि बाहिर फ्‍याँक्‍ने चोखो ठाउँमा लगेर दाउरामाथि राखेर आगोमा जलाऊन्‌— जहाँ खरानी फ्‍याँकिन्‍छ, त्‍यहीँ नै त्‍यो जलाऊन्‌।

¹³“‘यदि इस्राएलको जम्‍मै समुदायले अजानमा पाप गरेको छ र परमप्रभुले मनाही गर्नुभएको कुनै कुरा गरेको छ भने, त्‍यो कुरोचाहिँ त्‍यस समुदायको नजरबाट छिपे तापनि यिनीहरू दोषी हुन्‍छन्‌।

¹⁴यिनीहरूले गरेको त्‍यो पाप प्रकट हुँदा समुदायले पापबलि स्‍वरूप साँढ़े ल्‍याई भेट हुने पालको अगि चढ़ाउनुपर्छ।

¹⁵समुदायका धर्म-गुरुहरूले साँढ़ेको टाउकोमाथि आ-आफ्‍ना हात परमप्रभुको सामु राखून्‌। त्‍यो साँढ़े परमप्रभुको सामु मारिओस्‌।

¹⁶त्‍यसपछि अभिषेक भएका पूजाहारीले त्‍यस साँढ़ेको रगतबाट केही लिएर भेट हुने पालमा ल्‍याऊन्‌।

¹⁷पूजाहारीले आफ्‍नो औँला रगतमा चोपेर त्‍यस रगत पर्दाको अगिल्‍तिर परमप्रभुको सामु सात पल्‍ट छर्कून्‌।

¹⁸त्‍यसपछि भेट हुने पालभित्र रहेको वेदीका सीङहरूमा तिनले परमप्रभुको सामु त्‍यस रगतबाट केही लगाऊन्, र सबै बाँकी रगतचाहिँ भेट हुने पालको ढोकामा होमबलिका वेदीको आधारमा खन्‍याऊन्‌।

¹⁹त्‍यसको जम्‍मै बोसो तिनले त्‍यसबाट झिकेर वेदीमा जलाऊन्‌।

²⁰पापबलिको साँढ़ेलाई तिनले जसो गरेका थिए यस साँढ़ेलाई पनि त्‍यसै गरून्‌। यसरी पूजाहारीले तिनीहरूका निम्‍ति प्रायश्‍चित गर्नेछन्, र तिनीहरूलाई क्षमा हुनेछ।

²¹तिनले त्‍यस साँढ़ेलाई छाउनीबाहिर लगेर पहिलालाई जलाएझैँ जलाऊन्‌। यो समुदायको निम्‍ति पापबलि हो।

²²“‘जब कुनै नायकले अजानमा पाप गर्छन्‌ र परमप्रभु तिनका परमेश्‍वरले मनाही गर्नुभएका कुरामध्‍ये कुनै कुरो गर्छन्, तब तिनी दोषी हुन्‍छन्‌।

²³तिनले गरेको पाप तिनलाई प्रकट हुँदा, तिनले एउटा निष्‍खोट बोका आफ्‍नो भेटीको निम्‍ति ल्‍याउनुपर्छ।

²⁴तिनले बोकाको टाउकोमा आफ्‍नो हात राखून्, र जहाँ परमप्रभुको सामु होमबलिको पशु मारिन्‍छ, त्‍यहीँ नै त्‍यसलाई मारून्‌। योचाहिँ पापबलि हो।

²⁵त्‍यसपछि पूजाहारीले आफ्‍नो औँलाले पापबलिको रगतबाट केही लिएर होमबलिको वेदीका सीङहरूमा लगाऊन्, अनि बाँकी रगत वेदीको आधारमा खन्‍याऊन्‌।

²⁶त्‍यसको सबै बोसो पनि मेलबलिको बोसोझैँ वेदीमा तिनले जलाऊन्‌। यसरी पूजाहारीले ती मानिसको पापको लागि प्रायश्‍चित गर्नेछन्, र तिनलाई क्षमा हुनेछ।

²⁷“‘यदि समुदायका मानिसहरूमध्‍ये कसैले अजानमा पाप गर्छ र परमप्रभुले मनाही गर्नुभएका कुराहरूमध्‍ये कुनै कुरो गर्छ भने, त्‍यो दोषी हुन्‍छ।

²⁸त्‍यसले गरेको त्‍यो पाप त्‍यसलाई प्रकट हुँदा, आफूले गरेको पापको निम्‍ति आफ्‍नो भेटी स्‍वरूप निष्‍खोट बाख्री त्‍यसले ल्‍याउनुपर्छ।

²⁹त्‍यसले पापबलिको टाउकोमा आफ्‍नो हात राखोस्, र होमबलिको ठाउँमा त्‍यो पापबलि मारोस्‌।

³⁰त्‍यसपछि पूजाहारीले आफ्‍नो औँलाले पापबलिको रगतबाट केही लिएर होमबलिको वेदीका सीङहरूमा लगाऊन्, र त्‍यसको बाँकी रगत वेदीको आधारमा खन्‍याऊन्‌।

³¹त्‍यसको सबै बोसो मेलबलिका बलिदानको बोसोझैँ त्‍यसले झिकोस्, अनि पूजाहारीले परमप्रभुको निम्‍ति मीठो बास्‍ना हुनलाई त्‍यो वेदीमा जलाऊन्‌। यसरी पूजाहारीले त्‍यसको निम्‍ति प्रायश्‍चित गर्नेछन्, र त्‍यसलाई क्षमा हुनेछ।

³²“‘यदि त्‍यसले पापबलिको निम्‍ति भेड़ाका पाठा आफ्‍नो भेटी स्‍वरूप ल्‍यायो भने निष्‍खोट पाठी ल्‍याओस्‌।

³³त्‍यसले पापबलिको टाउकोमा आफ्‍नो हात राखोस्, र जहाँ होमबलिको पशु मारिन्‍छ, त्‍यहीँ नै पापबलिको निम्‍ति त्‍यसलाई मारोस्‌।

³⁴त्‍यसपछि पूजाहारीले आफ्‍नो औँलाले पापबलिको रगतबाट केही लिएर होमबलिको वेदीका सीङहरूमा लगाऊन्, र त्‍यसको बाँकी रगतचाहिँ वेदीको आधारमा खन्‍याऊन्‌।

³⁵त्‍यसको सबै बोसो मेलबलिका पाठाको बोसोझैँ त्‍यसले झिकोस्, र पूजाहारीले त्‍यो परमप्रभुको निम्‍ति अग्‍नि-होममाथि वेदीमा जलाऊन्‌। यसरी त्‍यसले गरेको पापको निम्‍ति पूजाहारीले त्‍यसको निम्‍ति प्रायश्‍चित गर्नेछन्, र त्‍यसलाई क्षमा हुनेछ’।”