Read Nepali New Revised Version, 2012 लेवीहरू 8 Bible Online

लेवीहरू 8 - Nepali New Revised Version, 2012 bible

लेवीहरू 8

¹फेरि परमप्रभुले मोशालाई भन्‍नुभयो,

²“तैंले हारूनलाई, त्‍यसका छोराहरूसमेत, उनीहरूका लुगाहरू, अभिषेक गर्ने तेल, पापबलिको साँढ़े, दुई वटा भेड़ा र अखमिरी रोटीको डालो लिएर

³जम्‍मै समुदायलाई भेट हुने पालको ढोकामा भेला गरा।”

⁴तब परमप्रभुले आज्ञा गर्नुभएझैँ मोशाले गरे, अनि भेट हुने पालको ढोकामा समुदाय भेला भयो।

⁵मोशाले समुदायलाई भने, “परमप्रभुले गर्नू भनी आज्ञा दिनुभएको काम यही हो।”

⁶मोशाले हारून र उनका छोराहरूलाई ल्‍याएर पानीले नुहाइदिए।

⁷तिनले हारूनलाई लबेदा लगाइदिएर पटुका बाँधिदिए र अलखा पहिराएर उनीमाथि एपोद लगाइदिए, र निपुणतासाथ बुट्टा बनाइएको पटुकाले एपोद बाँधिदिए।

⁸त्‍यसपछि तिनले हारूनलाई छाती-पाता लगाइदिएर छाती-पातामा “ऊरीम” र “तुम्‍मीम” राखे।

⁹तब उनको शिरमा तिनले फेटा लगाइदिए, र फेटामाथि अगिल्‍तिर सुनको पाता, अर्थात्‌ पवित्र मुकुट लगाइदिए, जसरी परमप्रभुले मोशालाई आज्ञा गर्नुभएको थियो।

¹⁰त्‍यसपछि मोशाले अभिषेक गर्ने तेल लिएर पवित्र वासस्‍थान र त्‍यसमा भएका यावत्‌ थोकलाई अभिषेक गरेर चोख्‍याए।

¹¹त्‍यसबाट केही तेल लिएर तिनले वेदीमा सात पल्‍ट छर्के, र वेदी र त्‍यसका सबै भाँड़ाकुँड़ाहरू, हात-खुट्टा धुने बाटा त्‍यसको बैठकसमेत चोख्‍याउनलाई अभिषेक गरे।

¹²फेरि तिनले अभिषेक गर्ने तेल लिएर हारूनको शिरमा खन्‍याई उनलाई चोख्‍याउनलाई अभिषेक गरे।

¹³त्‍यसपछि मोशाले हारूनका छोराहरूलाई ल्‍याएर लबेदा लगाइदिए अनि पटुका बाँधिदिएर उनीहरूलाई फेटा लगाइदिए, जसरी परमप्रभुले मोशालाई आज्ञा गर्नुभएको थियो।

¹⁴त्‍यसपछि तिनले पापबलिको साँढ़े ल्‍याए, र हारून र उनका छोराहरूले पापबलिका साँढ़ेको टाउकोमा आ-आफ्‍ना हात राखे।

¹⁵तब तिनले त्‍यसलाई मारे, र मोशाले रगतबाट केही लिएर आफ्‍नो औँलाले वेदीका सीङहरूमा वरिपरि लगाएर वेदीलाई चोख्‍याए। अनि बाँकी रगतचाहिँ तिनले वेदीको आधारमा खन्‍याए। त्‍यसको निम्‍ति प्रायश्‍चित गर्न तिनले यसरी वेदी चोख्‍याए।

¹⁶मोशाले आन्‍द्रा-भुँड़ीहरू ढाक्‍ने जम्‍मै बोसो र कलेजो ढाक्‍ने मासु र बोसोसमेतका दुवै मिर्गौला लिए, र वेदीमा जलाए।

¹⁷तर साँढ़ेचाहिँ त्‍यसका छाला र मासु र गोबरसमेत छाउनीबाहिर आगोमा तिनले जलाइदिए, जसरी परमप्रभुले मोशालाई आज्ञा गर्नुभएको थियो।

¹⁸त्‍यसपछि तिनले होमबलिको भेड़ा प्रस्‍तुत गरे। हारून र उनका छोराहरूले आ-आफ्‍ना हात भेड़ाको टाउकोमा राखे।

¹⁹तब तिनले त्‍यसलाई मारे। अनि मोशाले रगत वेदीको वरिपरि छर्के,

²⁰र तिनले भेड़ालाई टुक्रा-टुक्रा पारेर काटे, र टाउको र ती टुक्राहरू बोसोसमेत जलाए।

²¹मोशाले आन्‍द्रा-भुँड़ी र खुट्टाहरू पानीले पखाले, र त्‍यो परमप्रभुको निम्‍ति आगोद्वारा चढ़ाइएको, मीठो बास्‍नाको होमबलि स्‍वरूप तिनले सिङ्गै भेड़ा वेदीमा जलाए, जसरी परमप्रभुले मोशालाई आज्ञा गर्नुभएको थियो।

²²त्‍यसपछि तिनले अर्को भेड़ा, अर्थात्‌ अर्पणको भेड़ा प्रस्‍तुत गरे। अनि हारून र उनका छोराहरूले आ-आफ्‍ना हात त्‍यस भेड़ाको टाउकोमा राखे।

²³तब मोशाले त्‍यसलाई मारे, र तिनले त्‍यसको रगतबाट लिएर हारूनको दाहिने कानको लोतीमा, उनको दाहिने हातको बूढ़ी-औँलामा र उनको दाहिने खुट्टाको बूढ़ी-औँलामा लगाइदिए।

²⁴त्‍यसपछि मोशाले हारूनका छोराहरूलाई ल्‍याए, र तिनले उनीहरूका दाहिने-दाहिने कानका लोतीमा, दाहिने-दाहिने हातका बूढ़ी-औँलामा र दाहिने-दाहिने खुट्टाका बूढ़ी-औँलामा रगत लगाइदिए, अनि रगत वेदीको वरिपरि छर्के।

²⁵तब तिनले बोसो, बोसे-पुच्‍छर, आन्‍द्रा-भुँड़ी ढाक्‍ने सबै बोसो, कलेजो ढाक्‍ने मासु, बोसोसमेतका दुवै मिर्गौला र दाहिने साँप्रो लिए।

²⁶अनि परमप्रभुको सामुन्‍ने भएको अखमिरी रोटीको डालोबाट तिनले एउटा फुरौला, तेलमा मुछिएको एउटा रोटी र एउटा बाबर लिएर ती बोसो र दाहिने साँप्रोमाथि राखे।

²⁷ती जम्‍मै हारून र उनका छोराहरूका हातमा राखिदिए, र परमप्रभुको सामु डोलाइने बलिको रूपमा डोलाए।

²⁸त्‍यसपछि मोशाले उनीहरूका हातबाट ती लिएर परमप्रभुको निम्‍ति आगोद्वारा चढ़ाइएको, मीठो बास्‍नाको अर्पणबलिको रूपमा होमबलिमाथि वेदीमा जलाए।

²⁹मोशाले ह्याकुला पनि लिएर डोलाइने बलिको रूपमा परमप्रभुको सामुन्‍ने डोलाए, जसरी परमप्रभुले मोशालाई आज्ञा गर्नुभएको थियो। त्‍योचाहिँ अर्पणको भेड़ाबाट मोशाको भाग भयो।

³⁰तब मोशाले अभिषेकको केही तेल र वेदीमाथि भएको रगतबाट केही लिएर हारून र उनका लुगाहरूमा अनि उनका छोराहरू र उनका छोराहरूका लुगासमेतमा छर्के। यसरी तिनले हारूनलाई उनका लुगासमेत र उनका छोराहरूलाई उनीहरूका लुगासमेत पवित्र गरे।

³¹तब मोशाले हारून र उनका छोराहरूलाई भने, “मैले हारून र उनका छोराहरूले खानू भनी आज्ञा गरेझैँ मासु भेट हुने पालको ढोकामा पकाओ र अर्पणबलिको डालोमा भएको रोटीसमेत त्‍यहीँ खाओ।

³²उब्रेका मासु र रोटीचाहिँ जलाइदेओ।

³³तिमीहरूका अर्पणका दिन पूरा नहोउञ्‍जेल सात दिनसम्‍म तिमीहरू भेट हुने पालको ढोकाबाट बाहिर नजानू, किनकि तिमीहरूको अर्पण सात दिनसम्‍म रहनेछ।

³⁴आज जे-जस्‍तो भएको छ परमप्रभुले तिमीहरूका प्रायश्‍चितको निम्‍ति त्‍यस्‍तै आज्ञा गर्नुभएको थियो।

³⁵तिमीहरू सात दिनसम्‍म दिनरात भेट हुने पालको ढोकामा बसेर परमप्रभुले दिनुभएको दायित्‍व पूरा गर, नत्रता मरौला, किनकि मलाई यही आज्ञा भएको छ।”

³⁶अनि परमप्रभुले मोशाद्वारा दिनुभएका सबै आज्ञा हारून र उनका छोराहरूले पालन गरे।