Read Nepali New Revised Version, 2012 यर्मिया 28 Bible Online

यर्मिया 28 - Nepali New Revised Version, 2012 bible

यर्मिया 28

¹त्‍यही वर्ष, यहूदाका राजा सिदकियाहका राजकालको चौथो वर्षको पाँचौँ महिनामा अज्‍जूरका छोरा, गिबोनमा बस्‍ने हनन्‍याह अगमवक्ताले परमप्रभुको भवनमा पूजाहारीहरू र सारा मानिसहरूका सामुन्‍ने मलाई भने:

²“सर्वशक्तिमान्‌ परमप्रभु, इस्राएलका परमेश्‍वर यसो भन्‍नुहुन्‍छ: ‘म बेबिलोनका राजाको जुवा भाँचिदिनेछु।

³बेबिलोनको राजा नबूकदनेसरले परमप्रभुको भवनका जति मालसामानहरू यस ठाउँबाट बेबिलोनमा लगेको थियो, ती सबै दुई वर्ष भित्रैमा म फेरि यस ठाउँमा फर्काइल्‍याउनेछु।

⁴अनि यहूदाका राजा यहोयाकीमका छोरा यहोयाकीन र यहूदाबाट लगिएका सबै निर्वासित भएकाहरूलाई म फेरि यस ठाउँमा फर्काएर ल्‍याउनेछु,’ परमप्रभु भन्‍नुहुन्‍छ, ‘किनभने म बेबिलोनका राजाको जुवा भाँचिदिनेछु’।”

⁵तब परमप्रभुको भवनमा उभिरहेका पूजाहारीहरू र सबै मानिसहरूका सामुन्‍ने यर्मिया अगमवक्ताले हनन्‍याह अगमवक्तालाई जवाफ दिए।

⁶तिनले भने, “आमेन, परमप्रभुले त्‍यसै नै गरून्‌! तिमीले अगमवाणी कहेका कुरा परमप्रभुले पूरा गरिदेऊन्। परमप्रभुको भवनका मालसामानहरू र सबै निर्वासित भएका मानिसहरूलाई उहाँले बेबिलोनबाट यस ठाउँमा फर्काइल्‍याऊन्‌।

⁷तापनि तिमी र यी सबै मानिसहरूले सुन्‍ने गरी मैले भनेको यो वचन तिमी सुन:

⁸म र तिम्रा अघि आएका अगमवक्ताहरूले त धेरै देशहरू र ठूला-ठूला राज्‍यहरूका विरुद्धमा लड़ाइँ, अनिकाल र रूढ़ीका विषयमा अगमवाणी भनेका छन्‌।

⁹तर जुन अगमवक्ताले शान्‍तिको अगमवाणी कहन्‍छन्, यदि त्‍यो पूरा भयो भने मात्र यथार्थमा ती नै अगमवक्तालाई परमप्रभुले पठाउनुभएको रहेछ भनी चिनिनेछ।”

¹⁰तब हनन्‍याह अगमवक्ताले यर्मिया अगमवक्ताको काँधबाट त्‍यो जुवा निकालेर भाँचिदिए।

¹¹अनि हनन्‍याहले सबै मानिसहरूका सामुन्‍ने यसो भने, “परमप्रभु यसो भन्‍नुहुन्‍छ: ‘यसरी नै यी दुई वर्ष भित्रमा म सबै जातिका काँधबाट बेबिलोनको राजा नबूकदनेसरको जुवा भाँचिदिनेछु’।” तब यर्मिया अगमवक्ताचाहिँ आफ्‍नो बाटो लागे।

¹²हनन्‍याह अगमवक्ताले यर्मिया अगमवक्ताको काँधबाट जुवा भाँचेका केही समयपछि परमप्रभुको यो वचन यर्मियाकहाँ आयो:

¹³“गएर हनन्‍याहलाई भन्, ‘परमप्रभु यसो भन्‍नुहुन्‍छ: तैंले त काठको जुवा भाँचेको छस्, तर म त्‍यसको सट्टामा फलामको जुवा ल्‍याउनेछु।

¹⁴सर्वशक्तिमान्‌ परमप्रभु, इस्राएलका परमेश्‍वर यसो भन्‍नुहुन्‍छ: बेबिलोनको राजा नबूकदनेसरको सेवा गर्नलाई म यी सबै जातिहरूका काँधमा फलामको जुवा लगाइदिनेछु, र उनीहरूले त्‍यसको सेवा गर्नेछन्‌। वनका पशुहरूलाई पनि म त्‍यसको अधीनमा राख्‍नेछु’।”

¹⁵अनि यर्मिया अगमवक्ताले हनन्‍याह अगमवक्तालाई भने, “हे हनन्‍याह, सुन, परमेश्‍वरले तिमीलाई पठाउनुभएको होइन। तापनि तिमीले यी मानिसहरूलाई झूटा कुरामा विश्‍वास गर्न लगाएका छौ।

¹⁶यसकारण परमप्रभु यसो भन्‍नुहुन्‍छ: ‘मैले तँलाई यस पृथ्‍वीबाट हटाउन लागेको छु। यही वर्ष तँ मर्नेछस्, किनभने तैंले परमप्रभुको विरुद्धमा विद्रोही कुरा प्रचार गरेको छस्‌’।”

¹⁷त्‍यही वर्षको सातौँ महिनामा हनन्‍याह अगमवक्ता मरे।