Read Nepali New Revised Version, 2012 यर्मिया 29 Bible Online

यर्मिया 29 - Nepali New Revised Version, 2012 bible

यर्मिया 29

¹बचेका धर्म-गुरुहरू, अनि पूजाहारी, अगमवक्ता र सबै मानिसहरू, जसलाई नबूकदनेसरले यरूशलेमबाट बेबिलोनमा निर्वासित गरेर लगेका थिए, तिनीहरूलाई यर्मिया अगमवक्ताले पठाएको पत्रका कुरा यी नै हुन्‌।

²(राजा यहोयाकीन, राजमाता, महलका अधिकृतहरू, यहूदा र यरूशलेमका अगुवाहरू, कारीगर र निपुण कलाकारहरू यरूशलेमबाट निर्वासित भएपछि यो पत्र लेखिएको हो।)

³तिनले यो पत्र शापानका छोरा एलासा र हिल्‍कियाहका छोरा गमर्याहलाई जिम्‍मा दिए, जसलाई यहूदाका राजा सिदकियाहले राजा नबूकदनेसरकहाँ बेबिलोनमा पठाएका थिए। पत्र यस्‍तो थियो:

⁴यरूशलेमबाट बेबिलोनमा आफूले निर्वासन गरी लगेका सबैलाई सर्वशक्तिमान्‌ परमप्रभु, इस्राएलका परमेश्‍वर यसो भन्‍नुहुन्‍छ:

⁵“त्‍यहाँ तिमीहरू घर बनाएर बस, बारीहरू लगाओ र तिनका उब्‍जनीहरू खाओ।

⁶विवाहबारी गरेर छोराछोरीहरू जन्‍माओ, छोराहरूका निम्‍ति बुहारीहरू ल्‍याओ, र छोरीहरूको विवाह गरिदेओ, र तिनीहरूले छोराछोरीहरू जन्‍माऊन्‌। त्‍यहाँ आफ्‍नो संख्‍या बढ़ाओ, घटेर नजाओ।

⁷मैले तिमीहरूलाई निर्वासित गरेको सहरको भलो चिताओ, र त्‍यसको निम्‍ति परमप्रभुसित प्रार्थना गर। किनभने त्‍यसको उन्‍नति भएकोमा नै तिमीहरूको उन्‍नति हुनेछ।”

⁸हो, सर्वशक्तिमान्‌ परमप्रभु, इस्राएलका परमेश्‍वर यसो भन्‍नुहुन्‍छ: “तिमीहरूका बीचमा हुने तिमीहरूका अगमवक्ताहरू र जोखना हेर्नेहरूले तिमीहरूलाई धोका नदेऊन्। तिमीहरूको इच्‍छाअनुसार तिनीहरूले देखेका सपनाका कुराहरूमा ध्‍यान नदेओ।

⁹तिनीहरूले मेरो नाउँमा तिमीहरूलाई झूटा अगमवाणी कहन्‍छन्‌। मैले तिनीहरूलाई पठाएको होइनँ,” परमप्रभु भन्‍नुहुन्‍छ’।

¹⁰परमप्रभु यसो भन्‍नुहुन्‍छ, “बेबिलोनको निम्‍ति सत्तरी वर्ष पूरा भएपछि म तिमीहरूकहाँ आउनेछु, र तिमीहरूलाई यस ठाउँमा फर्काएर ल्‍याउनेछु भनी मेरो कृपालु प्रतिज्ञा म पूरा गर्नेछु।

¹¹किनभने जुन योजनाहरू मैले तिमीहरूका निम्‍ति बनाएको छु, ती म जान्‍दछु,” परमप्रभु भन्‍नुहुन्‍छ। “ती तिमीहरूका उन्‍नतिको निम्‍ति हुन्, नोक्‍सानीको निम्‍ति होइनन्, तिमीहरूलाई आशा र भविष्‍य दिनलाई।

¹²तब तिमीहरू मकहाँ आउनेछौ, र मलाई प्रार्थना गर्नेछौ, र म तिमीहरूको प्रार्थना ध्‍यानसित सुन्‍नेछु।

¹³जब तिमीहरूले आफ्‍ना सारा हृदयले मलाई खोज्‍नेछौ, तब तिमीहरूले मलाई खोजेर पाउनेछौ।

¹⁴तिमीहरूले मलाई भेट्टाउनेछौ,” परमप्रभु भन्‍नुहुन्‍छ,” र कैदबाट म तिमीहरूलाई फर्काइल्‍याउनेछु। मैले तिमीहरूलाई निर्वासन गरेर पठाएका सबै जाति-जातिहरू र ठाउँ-ठाउँहरूदेखि म तिमीहरूलाई जम्‍मा गर्नेछु,” परमप्रभु भन्‍नुहुन्‍छ, “र जुन ठाउँदेखि मैले तिमीहरूलाई निर्वासन गरेर पठाएको थिएँ, त्‍यही ठाउँमा म तिमीहरूलाई फेरि फर्काइल्‍याउनेछु।”

¹⁵शायद तिमीहरू भन्‍नेछौ, “परमप्रभुले त हाम्रा निम्‍ति बेबिलोनमा नै अगमवक्ताहरू खड़ा गर्नुभएको छ।”

¹⁶तर दाऊदको सिंहासनमा बस्‍ने राजा र यस सहरमा बस्‍ने सबै मानिसहरू, तिमीहरूका आफन्‍तहरू, जो तिमीहरूसित निर्वासनमा गएनन्, तिनीहरूका विषयमा सर्वशक्तिमान्‌ परमप्रभु यो भन्‍नुहुन्‍छ—

¹⁷हो, सर्वशक्तिमान्‌ परमप्रभु यसो भन्‍नुहुन्‍छ: “म तिनीहरूका विरुद्धमा तरवार, अनिकाल र रूढ़ी पठाउनेछु, र म तिनीहरूलाई कुहेका अञ्‍जीरहरूझैँ तुल्‍याउनेछु, जो यति साह्रो कुहेका हुन्‍छन्‌ कि ती खान पनि सकिँदैनन्‌।

¹⁸तिनीहरूलाई म तरवार, अनिकाल र रूढ़ीले खेद्‌नेछु। म तिनीहरूलाई पृथ्‍वीका सबै राज्‍यहरूमा घृणाको पात्र तुल्‍याउनेछु। मैले तिनीहरूलाई धपाएका सारा जातिहरूका बीचमा म तिनीहरूलाई सराप, त्रास, गिल्‍ला र निन्‍दाका पात्र बनाउनेछु।

¹⁹किनकि तिनीहरूले मेरा कुरा ध्‍यानसित सुनेनन्,” परमप्रभु भन्‍नुहुन्‍छ। “जुन वचन मैले मेरा दास अगमवक्ताहरूद्वारा घरीघरी पठाएको थिएँ। र तिमी निर्वासितहरूले पनि ध्‍यानसित सुनेनौ,” परमप्रभु भन्‍नुहुन्‍छ।

²⁰यसकारण हे सबै निर्वासनमा लगिएकाहरू, जसलाई मैले यरूशलेमदेखि बेबिलोनमा पठाएँ, परमप्रभुको वचन सुन।

²¹कोलायाहको छोरो आहाब र मासेयाहको छोरो सिदकियाह, जसले मेरो नाउँमा झूटा अगमवाणी कहँदैछन्, तिनीहरूको विषयमा सर्वशक्तिमान्‌ परमप्रभु यसो भन्‍नुहुन्‍छ: “म तिनीहरूलाई बेबिलोनको राजा नबूकदनेसरको हातमा सुम्‍पिदिनेछु, र त्‍यसले तिमीहरूकै नजरको सामुन्‍ने तिनीहरूलाई मार्नेछ।

²²तिनीहरूकै कारणले यहूदाबाट बेबिलोनमा निर्वासन भएकाहरूले यो सराप प्रयोग गर्नेछन्‌: ‘परमप्रभुले तँलाई सिदकियाह र आहाबजस्‍तै बनाऊन्, जसलाई बेबिलोनको राजाले आगोमा डढ़ाएका थिए’।

²³किनकि तिनीहरूले इस्राएलमा अति घृणित काम गरेका छन्‌। तिनीहरूले आफ्‍नै छिमेकीकी पत्‍नीसित व्‍यभिचार गरेका छन्, र मैले तिनीहरूलाई बोल्‍नू भनी नभनेका झूटा कुरा तिनीहरूले बोलेका छन्‌। यो कुरा म जान्‍दछु, र म यो कुराको साक्षी छु,” परमप्रभु भन्‍नुहुन्‍छ।

²⁴नेहेलामवासी शमायाहलाई यसो भन,

²⁵“सर्वशक्तिमान्‌ परमप्रभु, इस्राएलका परमेश्‍वर यसो भन्‍नुहुन्‍छ: तैंले आफ्‍नै नाउँमा यरूशलेमका सबै मानिसहरूलाई र मासेयाह पूजाहारीको छोरो सपन्‍याहलाई र अरू सबै पूजाहारीहरूलाई चिट्ठी लेखिस्‌। तैंले सपन्‍याहलाई यसो भनिस्,

²⁶‘परमप्रभुले तिमीलाई यहोयादा पूजाहारीको सट्टामा परमप्रभुका घरको जिम्‍मा लिनलाई पूजाहारी नियुक्त गर्नुभएको हो। तिमीले त्‍यहाँ अगमवाणी गर्ने कुनै पनि बौलाहालाई ठिँगुरोमा हाल्‍नू र घिच्रोमा फलाम झुण्‍ड्याएर राख्‍नू।

²⁷यसर्थ तिमीहरूका बीचमा अगमवक्ता हुने अनातोतको यर्मियालाई तिमीले किन हप्‍काएनौ?

²⁸बेबिलोनमा हामीलाई त्‍यसले यस्‍तो समाचार पठाएको छ, ‘तिमीहरूको निर्वासन धेरै समय रहनेछ। यसकारण घरहरू बनाएर बस, बारीहरू लगाओ र तिनका उब्‍जनी खाओ’।”

²⁹तापनि सपन्‍याह पूजाहारीले यो पत्र पढ़ेर यर्मियालाई सुनाए।

³⁰तब परमप्रभुको यो वचन यर्मियाकहाँ आयो:

³¹“निर्वासन भएकाहरू सबैलाई यो समाचार पठा: ‘नेहेलामवासी शमायाहको विषयमा परमप्रभु यसो भन्‍नुहुन्‍छ: मैले त्‍यसलाई नपठाईकन पनि शमायाहले अगमवाणी कहेर तिमीहरूलाई झूटा कुरामाथि विश्‍वास गर्न लगाएको कारणले,

³²म नेहेलामवासी शमायाह र त्‍यसका वंशलाई दण्‍ड दिनेछु। त्‍यसको कुनै पनि वंश यस प्रजामा जीवित रहनेछैन, र मेरो प्रजालाई जो भलाइ म गर्नेछु त्‍यो त्‍यसले हेर्नेछैन, किनभने त्‍यसले मेरो विरुद्धमा विद्रोही कुरा गरेको छ, परमप्रभु भन्‍नुहुन्‍छ’।”