Read Nepali New Revised Version, 2012 यर्मिया 31 Bible Online

यर्मिया 31 - Nepali New Revised Version, 2012 bible

यर्मिया 31

¹परमप्रभु भन्‍नुहुन्‍छ: “त्‍यस बेला म इस्राएलका सबै वंशका परमेश्‍वर हुनेछु, र तिनीहरू मेरा प्रजा हुनेछन्‌।”

²परमप्रभु यसो भन्‍नुहुन्‍छ: “तरवारबाट बाँचेका मानिसहरूले उजाड़-भूमिमा निगाह प्राप्‍त गर्नेछन्‌। म इस्राएललाई विश्राम दिनका लागि आउनेछु।”

³परमप्रभु विगत समयमा हामीकहाँ यसो भन्‍दै देखा पर्नुभयो: “सधैँभरि रहने प्रेमले मैले तँलाई प्रेम गरेको छु। मैले तँलाई दया गरी खिँचेको छु।

⁴म फेरि तँलाई निर्माण गर्नेछु, र हे कुमारी इस्राएल, तँ फेरि बनाइनेछस्‌। तँ फेरि आफ्‍ना खैँजड़ी लिएर आनन्‍द मनाउनेहरूका साथ नाचमा तँ निस्‍कनेछस्‌।

⁵सामरियाका डाँड़ाहरूमा तैंले फेरि दाखका बोटहरू लगाउनेछस्‌। किसानहरूले ती रोप्‍नेछन्, र तिनका फल खानेछन्‌।

⁶यस्‍तो दिन आउनेछ, जब एफ्राइमको पहाड़ी देशमा पहरादारहरू यसरी कराउनेछन्, ‘आओ, हामी सियोनमा परमप्रभु हाम्रा परमेश्‍वरकहाँ जाऔं’।”

⁷परमप्रभु यसो भन्‍नुहुन्‍छ: “खुशीले याकूबको निम्‍ति गाओ। जातिमध्‍येका अग्रगण्‍यको निम्‍ति उच्‍च सोर निकाल। तिमीहरूको प्रशंसा सुनिओस्, र यसो भन, ‘हे परमप्रभु, आफ्‍नो प्रजा, इस्राएलका बाँचेकाहरूको उद्धार गर्नुहोस्‌।’

⁸हेर, म तिनीहरूलाई उत्तर देशदेखि ल्‍याउनेछु, र पृथ्‍वीका कुना-कुनाबाट म तिनीहरूलाई जम्‍मा गर्नेछु। तिनीहरूका बीचमा अन्‍धा र लङ्गड़ा, गर्भवती आमाहरू र सुत्‍केरी वेदनामा परेका स्‍त्रीहरू हुनेछन्‌। तिनीहरूको एउटा ठूलो भीड़ फर्केर आउनेछ।

⁹तिनीहरू रुँदै आउनेछन्‌। मैले तिनीहरूलाई फर्काएर ल्‍याउँदा तिनीहरूले प्रार्थना गर्नेछन्‌। म तिनीहरूलाई पानी भएका खोलाहरूका किनार-किनार डोर्‍याउनेछु, सीधा बाटोमा जहाँ तिनीहरूले ठेस खानेछैनन्‌। किनभने म इस्राएलको पिता हुँ, र एफ्राइमचाहिँ मेरो जेठो छोरो हो।

¹⁰“हे जाति-जाति हो, परमप्रभुको वचन सुन। टाढ़ा-टाढ़ा समुद्र-किनारका देशहरूमा घोषणा गर: ‘इस्राएललाई तितरबितर पार्नेले तिनीहरूलाई भेला गर्नुहुनेछ, र गोठालाले आफ्‍नो बगाललाई रक्षा गरेझैँ उहाँले तिनीहरूलाई रक्षा गर्नुहुनेछ’।

¹¹किनभने परमप्रभुले याकूबलाई मोल तिरेर छुटाउनुहुनेछ, र तिनीहरूभन्‍दा शक्तिशालीको हातदेखि तिनीहरूलाई उहाँले छुटकारा दिनुहुनेछ।

¹²तिनीहरू आएर सियोनको उच्‍च ठाउँहरूमा आनन्‍दसाथ गाउनेछन्‌। परमप्रभुको प्रशस्‍त वरदानको कारण तिनीहरू रमाहट गर्नेछन्‌— अन्‍न, नयाँ दाखमद्य र तेल, भेड़ाबाख्राका पाठाहरू र गाई-गोरुका बाछाहरूको कारण तिनीहरूले रमाहट गर्नेछन्‌। तिनीहरू प्रशस्‍त पानीले भिजेको बगैँचाजस्‍तै हुनेछ। तिनीहरू फेरि कहिल्‍यै अफसोसी हुनेछैनन्‌।

¹³तब तरुणीहरू आनन्‍दले नाच्‍नेछन्, र जवान र बूढ़ाहरू हर्षित हुनेछन्‌। म तिनीहरूको शोकलाई हर्षमा परिवर्तन गरिदिनेछु। म तिनीहरूलाई सान्‍त्‍वना दिनेछु र तिनीहरूका अफसोसको सट्टामा रमाहट दिनेछु।

¹⁴पूजाहारीहरूलाई म प्रशस्‍तताले सन्‍तुष्‍ट गराउनेछु, र मेरो प्रजा मेरो उदारताले तृप्‍त हुनेछ,” परमप्रभु भन्‍नुहुन्‍छ।

¹⁵परमप्रभु यसो भन्‍नुहुन्‍छ: “रामामा एउटा शब्‍द सुनियो, विलाप र चर्को रोदन, राहेल आफ्‍ना बालकहरूका लागि रोइरहेकी, सान्‍त्‍वना त्‍यसले इन्‍कार गरी, किनकि त्‍यसका बालकहरू अब रहेनन्‌।”

¹⁶परमप्रभु यसो भन्‍नुहुन्‍छ, “रोदनको सोर रोक्, आँखाबाट आँसु नखसाल्, किनकि तिमीहरूको कामको इनाम पाइनेछ,” परमप्रभु भन्‍नुहुन्‍छ, “तिनीहरू शत्रुको देशदेखि फर्केर आउनेछन्‌।

¹⁷यसरी तेरो भविष्‍यको आशा छ। तेरा छोराछोरीहरू तिनीहरूको आफ्‍नै देशमा फर्किआउनेछन्‌।

¹⁸“एफ्राइमको विलाप मैले निश्‍चय नै सुनें: ‘एउटा नसुध्रिएको बाछालाई झैँ तपाईंले मलाई अनुशासन गर्नुभयो, र म अनुशासित भएँ। मलाई पुनर्स्‍थापित गर्नुहोस्, र म फर्कनेछु। किनभने तपाईं परमप्रभु मेरा परमेश्‍वर हुनुहुन्‍छ।

¹⁹म बरालिएर गएपछि मैले पश्‍चात्ताप गरें। मैले बुझेपछि मैले मेरो छाती पिटें। म लज्‍जित भएँ, र म होचिएँ, किनभने युवावस्‍थाको कलङ्क मैले बोकेको थिएँ’।

²⁰के एफ्राइम मेरो प्‍यारो छोरो होइन र, जसमाथि म खुशी हुन्‍छु? त्‍यसको विरुद्धमा मैले जति नै बोले तापनि मलाई त्‍यसैको याद अझैँ आउँछ। यसकारण मेरो हृदय त्‍यसको लागि लालसा गर्दछ। त्‍यसप्रति मेरो साह्रै माया छ,” परमप्रभु भन्‍नुहुन्‍छ।

²¹“बाटो देखाउने सङ्केत र खम्‍बाहरू खड़ा गर्, जुन बाटोबाट तँ जान्‍छस्, त्‍यो बाटो याद राख्‌। हे कन्‍या इस्राएल, फर्की। तेरा नगरहरूमा फर्केर आइज।

²²हे विश्‍वासघाती छोरी, तँ कहिलेसम्‍म यताउता गरिबस्‍छेस्‌? परमप्रभुले पृथ्‍वीमा एउटा नयाँ कुरो सृष्‍टि गर्नुहुनेछ— एउटी स्‍त्रीले पुरुषलाई सुरक्षा दिनेछ।”

²³सर्वशक्तिमान्‌ परमप्रभु, इस्राएलका परमेश्‍वर यसो भन्‍नुहुन्‍छ: “जब म तिनीहरूलाई कैदबाट फर्काएर ल्‍याउनेछु, तब मानिसहरूले यहूदाको देश र त्‍यसका नगरहरूमा यी वचन फेरि प्रयोग गर्नेछन्, ‘हे धर्मी वासस्‍थान, हे पवित्र पर्वत, तँलाई परमप्रभुले आशिष्‌ देऊन्’।

²⁴यहूदा र त्‍यसका सबै नगरहरूमा मानिसहरू एकैसाथ बस्‍नेछन्‌— किसानहरू, र आफ्‍ना बगालसँग घुम्‍ने गोठालाहरू।

²⁵थाकेकाहरूलाई म फेरि ताजा बनाउनेछु र मूर्च्‍छा खानेहरूलाई सन्‍तुष्‍ट तुल्‍याउनेछु।”

²⁶यतिमै म बिउँझें र चारैतिर हेरें। मेरो निद्रा मलाई मीठो लागेको थियो।

²⁷परमप्रभु भन्‍नुहुन्‍छ, “दिन आउँदैछन्, जब म मानिस र पशुका बच्‍चाहरूले इस्राएलका घराना र यहूदाका घरानालाई रोप्‍नेछु।

²⁸जसरी तिनीहरूलाई उखेल्‍न, लछार्न र फ्‍याँक्‍न, र तिनीहरूमाथि सर्वनाश ल्‍याउनलाई मैले मेरो दृष्‍टि तिनीहरूमाथि राखें, त्‍यसरी नै तिनीहरूलाई निर्माण गर्न र रोप्‍नलाई मेरो दृष्‍टि तिनीहरूमाथि राख्‍नेछु,” परमप्रभु भन्‍नुहुन्‍छ।

²⁹“ती दिनमा मानिसहरूले फेरि कहिल्‍यै यसो भन्‍नेछैनन्, ‘अमिलो अङ्‌गूर खाए बुबाले अनि दाँत कुँड़िनेचाहिँ छोराछोरीको’।

³⁰त्‍यसको सट्टामा हरेक आफ्‍नै पापको निम्‍ति मर्नेछ। जसले अमिलो अङ्‌गूर खान्‍छ त्‍यसैको दाँत कुँड़िन्‍छ।

³¹परमप्रभु भन्‍नुहुन्‍छ, “ती दिन आउनेछन्, जब इस्राएलको घरानासँग र यहूदाको घरानासँग म एउटा नयाँ करार स्‍थापना गर्नेछु।

³²तिनीहरूका पुर्खाहरूसँग मैले बाँधेको करारजस्‍तै यो हुनेछैन, जब मैले तिनीहरूलाई हातमा समातेर मिश्रदेशबाट डोर्‍याएर ल्‍याएको थिएँ।” परमप्रभु भन्‍नुहुन्‍छ, “तिनीहरूले मेरो करार भङ्ग गरे, यद्यपि म तिनीहरूका पिता थिएँ।”

³³परमप्रभु भन्‍नुहुन्‍छ, “ती दिनपछि म इस्राएलको घरानासँग यो करार बाँध्‍नेछु, तिनीहरूका मनमा मेरो व्‍यवस्‍था राखिदिनेछु, र तिनीहरूका हृदयमा त्‍यो लेखिदिनेछु, र म तिनीहरूका परमेश्‍वर हुनेछु, र तिनीहरू मेरा प्रजा हुनेछन्‌।

³⁴‘परमप्रभुलाई चिन’ भनेर अब उसो कुनै मानिसले आफ्‍नो छिमेकीलाई वा आफ्‍ना दाजुभाइलाई सिकाउनेछैन। किनकि सानादेखि लिएर ठूलासम्‍म तिनीहरू सबैले मलाई चिन्‍नेछन्,” परमप्रभु भन्‍नुहुन्‍छ। “किनकि तिनीहरूका अपराधहरू म क्षमा गर्नेछु, र म तिनीहरूका पाप फेरि कहिल्‍यै सम्‍झनेछैनँ।”

³⁵परमप्रभु यसो भन्‍नुहुन्‍छ: जसले दिन उज्‍यालो पार्नलाई सूर्य नियुक्त गर्नुहुन्‍छ, र राती प्रकाश दिनलाई चन्‍द्रमा र ताराहरूलाई आज्ञा गर्नुहुन्‍छ, जसले छालहरू गर्जाउनलाई समुद्र चलाउनुहुन्‍छ— उहाँको नाउँ सर्वशक्तिमान्‌ परमप्रभु हो।

³⁶“यी विधिहरू मेरो दृष्‍टिबाट लुप्‍त भए भने मात्र इस्राएलको वंश मेरो सामु एक जाति हुनदेखि खतम हुनेछ,” परमप्रभु भन्‍नुहुन्‍छ।

³⁷परमप्रभु यसो भन्‍नुहुन्‍छ: “आकाशलाई नाप्‍न सकियो भने, र पृथ्‍वीको जगलाई खोजेर निकाल्‍न सकियो भने मात्र तिनीहरूले गरेका सबै अधर्मको कारण म इस्राएलका सन्‍तानलाई फालिदिनेछु,” परमप्रभु भन्‍नुहुन्‍छ।

³⁸परमप्रभु भन्‍नुहुन्‍छ, “दिनहरू आउँदैछन्, जब हननेलको बुर्जादेखि कुने-ढोकासम्‍मै सहर फेरि मेरो निम्‍ति बनाइनेछ।

³⁹नाप्‍ने डोरी त्‍यहाँबाट सीधै गारेब डाँड़ासम्‍म पुग्‍नेछ, र त्‍यहाँबाट घुमेर गोआसम्‍म जानेछ।

⁴⁰लाशहरू र खरानी फालिने सारा उपत्‍यका, र पूर्वतिर किद्रोन खोल्‍सासम्‍मका सबै खेतहरू अश्‍व ढोकाको कुनासम्‍म परमप्रभुको निम्‍ति पवित्र हुनेछ। त्‍यो सहर फेरि कहिल्‍यै उखेलिनेछैन अथवा भत्‍काइनेछैन।”