Read Nepali New Revised Version, 2012 यर्मिया 41 Bible Online

यर्मिया 41 - Nepali New Revised Version, 2012 bible

यर्मिया 41

¹सातौँ महिनामा एलीशामाको नाति, नतन्‍याहको छोरो इश्‍माएल, जो राजकीय रगत भएको र राजाका अधिकृतहरूमध्‍येको एक थियो, दश जना मानिसहरू लिएर मिस्‍पामा अहीकामका छोरा गदल्‍याहकहाँ आयो। जब तिनीहरू सबै एकैसाथ त्‍यहाँ खाइरहेका थिए,

²तब नतन्‍याहको छोरो इश्‍माएल र ती दश जना मानिसहरू उठेर बेबिलोनका राजाले देशको लागि राज्‍यपाल नियुक्त गरेका शापानका नाति, अहीकामका छोरा गदल्‍याहलाई तरवारले मारे।

³इश्‍माएलले मिस्‍पामा गदल्‍याहसँग भएका सबै यहूदीहरू र त्‍यहाँ भएका बेबिलोनी सिपाहीहरूलाई पनि मार्‍यो।

⁴गदल्‍याह मारिएको कुरा कसैले थाहा पाउनु अघि भोलिपल्‍ट

⁵शकेम, शीलो र सामरियाबाट दाह्री काटेका, लुगा च्‍यातेका र शरीर चिरै-चिरा काटेका असी जना मानिसहरू परमप्रभुको घरमा अन्‍नबलि र धूप चढ़ाउन आए।

⁶नतन्‍याहको छोरो इश्‍माएल मिस्‍पाबाट रुँदै-रुँदै तिनीहरूलाई भेट्‌न निस्‍क्‍यो। तिनीहरूलाई भेटेर त्‍यसले भन्‍यो, “अहीकामको छोरो गदल्‍याहकहाँ आओ।”

⁷जब तिनीहरू सहरभित्र आए तब नतन्‍याहको छोरो इश्‍माएल र त्‍यसको साथमा भएका मानिसहरूले तिनीहरूलाई मारे, र तिनीहरूका लाश एउटा इनारमा फालिदिए।

⁸तर तिनीहरूमध्‍येका दश जना मानिसले इश्‍माएललाई भने, “हामीलाई नमार्नुहोस्‌! हामीसित एउटा खेतमा लुकाइराखेका गहूँ, जौ, तेल र मह छन्‌।” यसैले त्‍यसले तिनीहरूलाई छोड़िदियो र अरूहरूसित तिनीहरूलाई मारेन।

⁹त्‍यो इनार, जहाँ इश्‍माएलले गदल्‍याह र अरू मानिसहरूलाई मारेर फालिदिएको थियो, त्‍यो त्‍यही इनार थियो, जो आसा राजाले इस्राएलका राजा बाशाको डरले गर्दा रक्षाको निम्‍ति खनाएका थिए। नतन्‍याहको छोरो इश्‍माएलले आफूले मारेका मानिसहरूले त्‍यो भरिदियो।

¹⁰त्‍यसपछि इश्‍माएलले मिस्‍पामा बाँकी रहेका जम्‍मै मानिसहरूलाई— राजाका छोरीहरू र अरू मानिसहरू, जुनलाई राजकीय अङ्गरक्षकका सेनापति नबूजरदानले अहीकामका छोरा गदल्‍याहको हातमा सुम्‍पेका थिए, ती सबैलाई त्‍यसले कैद गर्‍यो। यी कैदीहरूलाई लिएर सिमाना पारि अम्‍मोनीहरूकहाँ जानलाई त्‍यो हिँड़्यो।

¹¹जब कारेहका छोरा योहानान र तिनीसित भएका फौजका सबै अधिकृतहरूले नतन्‍याहको छोरो इश्‍माएलले गरेका सबै अपराधका विषयमा सुने,

¹²तब तिनीहरू आफ्‍ना सबै मानिसहरूलाई लिएर नतन्‍याहको छोरो इश्‍माएलसित लड़ाइँ गर्नलाई हिँड़े। तिनीहरूले त्‍यसलाई गिबोनको ठूलो दहनेर भेट्टाए।

¹³जब इश्‍माएलसित भएका ती मानिसहरूले कारेहका छोरा योहानान र तिनका साथमा भएका फौजका सबै अधिकृतहरूलाई देखे तब तिनीहरू रमाए।

¹⁴इश्‍माएलले मिस्‍पाबाट लगेका सबै कैदीहरू कारेहका छोरा योहानानकहाँ फर्केर गए।

¹⁵तर नतन्‍याहको छोरो इश्‍माएल आफ्‍ना आठ जना मानिसहरूसित योहानानको हातबाट उम्‍केर अम्‍मोनीहरूकहाँ भागेर गयो।

¹⁶तब अहीकामका छोरा गदल्‍याहलाई मारेपछि नतन्‍याहको छोरो इश्‍माएलले गिबोनबाट ल्‍याएका बाँचेकाहरूलाई— सिपाहीहरू, स्‍त्रीहरू, केटाकेटीहरू र महलका अधिकृतहरूलाई कारेहका छोरा योहानान र तिनीसित भएका फौजका सबै अधिकृतहरूले लगेर गए।

¹⁷तिनीहरू बेबिलोनीहरूदेखि उम्‍कन मिश्रमा जाने विचार गरेर बेथलेहेमनेरको गेरूथ-किम्‍हाममा वास बसे।

¹⁸तिनीहरू बेबिलोनीहरूसित डराएका थिए, किनभने बेबिलोनका राजाले देशको लागि नियुक्त गरेका राज्‍यपाल अहीकामका छोरा गदल्‍याहलाई नतन्‍याहको छोरो इश्‍माएलले मारेको थियो।