Read Nepali New Revised Version, 2012 यर्मिया 48 Bible Online

यर्मिया 48 - Nepali New Revised Version, 2012 bible

यर्मिया 48

¹मोआबको विषयमा: ‘सर्वशक्तिमान्‌ परमप्रभु, इस्राएलका परमेश्‍वर यसो भन्‍नुहुन्‍छ: “नेबोलाई धिक्‍कार, किनभने त्‍यो भग्‍नावशेष हुनेछ। किर्यातैम अपमानित हुनेछ, र त्‍यो कब्‍जामा पर्नेछ। किल्‍ला लाजमा पारिनेछ, र त्‍यो भत्‍काइनेछ।

²मोआबको प्रशंसा अब गरिनेछैन। मानिसहरूले हेश्‍बोनमा त्‍यसका पतनको षड्‌यन्‍त्र रच्‍नेछन्‌: ‘आओ, हामी त्‍यस जातिलाई खतम गरिदिऔं’। हे मदमेन, तँलाई पनि चूप गराइनेछ, तरवारले तँलाई खेद्‌नेछ।

³होरोनैमबाट एउटा क्रन्‍दन सुन, उजाड़ र ठूलो सर्वनाशको रुवाइ।

⁴मोआब चूर पारिनेछ’। त्‍यसका बच्‍चाहरू चिच्‍च्‍याएर रुनेछन्‌।

⁵लूहीतको उकालोमा तिनीहरू रुँदै उक्‍लन्‍छन्‌। होरोनैमको ओह्रालोमा सर्वनाशको रुवाइ सुनिन्‍छन्‌।

⁶भाग, आफ्‍नो ज्‍यान जोगाउनलाई कुद, मरुभूमिमा पोथ्राजस्‍तै होओ!

⁷तिमीहरूले आफ्‍ना कामहरू र धनहरूमा भरोसा राखेका हुनाले तिमीहरू पनि कैदमा पर्नेछौ, र कमोश आफ्‍ना पूजाहारी र अधिकारीहरूसँग निर्वासनमा जानेछ।

⁸हरेक नगरको विरुद्धमा सर्वनाश गर्ने आउनेछ, र एउटै नगर उम्‍कनेछैन। बेँसी नष्‍ट पारिनेछ, र टार नाश गरिनेछ, किनभने परमप्रभुले भन्‍नुभएको छ।

⁹मोआबमा नून छरिदेओ, किनकि त्‍यो उजाड़ हुनेछ। त्‍यसका नगरहरू कोही पनि नबस्‍ने गरी उजाड़ भइजानेछन्‌।

¹⁰“परमप्रभुको काम ढिलोसित गर्नेलाई सराप! आफ्‍नो तरवारलाई रक्तपात गर्नदेखि रोक्‍नेलाई सराप!

¹¹“मोआब युवावस्‍थादेखि नै आराम गरी बसेको छ। त्‍यो थिग्रो रहेको दाखमद्यजस्‍तै छ, जो एउटा भाँड़ाबाट अर्को भाँड़ामा खन्‍याइएको छैन— त्‍यो निर्वासनमा गएको छैन। यसैले त्‍यसको स्‍वाद अघिजस्‍तै रहिरहेको छ। त्‍यसको बास्‍ना बद्‌लेको छैन।

¹²तर दिनहरू आउँदैछन्,” परमप्रभु भन्‍नुहुन्‍छ, “जब घैँटाबाट खन्‍याउनेहरूलाई म त्‍यसकहाँ पठाउनेछु, र उनीहरूले त्‍यो खन्‍याउनेछन्‌। त्‍यसका घैँटाहरू रित्त्याउनेछन्, र त्‍यसका गाग्राहरू चूरचूर पारेर फुटाइदिनेछन्‌।

¹³जसरी आफूले भरोसा गरेको बेथेलदेखि इस्राएल लाजमा पारियो, त्‍यसरी नै मोआब पनि कमोशदेखि लाजमा पारिनेछ।

¹⁴“‘हामीहरू वीर र शक्तिशाली युद्ध गर्नेहरू हौं’ भनेर तिमीहरू कसरी भन्‍छौ?

¹⁵मोआब नष्‍ट पारिनेछ, र त्‍यसका नगरहरू आक्रमण गरिनेछन्‌। त्‍यसका जवानहरूमा सबैभन्‍दा खाइलाग्‍दाहरू मारिनलाई जानेछन्,” महाराजा भन्‍नुहुन्‍छ, जसको नाउँ सर्वशक्तिमान्‌ परमप्रभु हो।

¹⁶“मोआबको पतन नजिकै आएको छ, त्‍यसको सङ्कष्‍ट एकदमै चाँड़ो आउनेछ।

¹⁷त्‍यसका चारैतिर बस्‍नेहरू र त्‍यसका ख्‍याति जान्‍ने सबै त्‍यसको निम्‍ति शोक गर, र भन, ‘त्‍यो शक्तिशाली राजदण्‍ड भाँचिएको हो! त्‍यो गौरवको लट्ठी भाँचिएको हो!’

¹⁸“हे दीबोनकी छोरीका बासिन्‍दा हो, आफ्‍नो गौरवपूर्ण स्‍थानबाट ओर्लेर खहरिएको सुक्‍खा जमिनमा बस्, किनकि मोआबलाई नाश गर्ने तेरो विरुद्धमा आउनेछ। त्‍यसले तेरा किल्‍ला भएका सहरहरूलाई सर्वनाश गर्नेछ।

¹⁹हे अरोएरमा बस्‍नेहरू, बाटोमा खड़ा भएर हेर। भाग्‍ने पुरुष र उम्‍कने स्‍त्रीलाई सोध, ‘के भयो?’ भनी तिनीहरूलाई सोध।

²⁰मोआब अपमानित भएको छ, किनकि त्‍यो चूरचूर पारिएको छ। विलाप गर, रोओ! मोआब नष्‍ट पारियो भनी अर्नोनको किनारमा गएर भन।

²¹टारमाथि न्‍याय आएको छ— अर्थात्‌ होलोन, यहसाह र मेपातमाथि,

²²दीबोन, नेबो र बेथ-दिब्‍लातैममाथि,

²³किर्यातैम, बेथ-गमूएल र बेथ-मोनमाथि,

²⁴किर्योत, बोज्रा र मोआबका नजिक र टाढ़ाका जम्‍मै सहरहरूमाथि त्‍यो आएको छ।

²⁵मोआबको सीङ काटियो, र त्‍यसको पाखुरा भाँचियो,” परमप्रभु भन्‍नुहुन्‍छ।

²⁶“त्‍यसलाई मत्त्याओ, किनकि त्‍यसले परमप्रभुको विरोध गरेको छ। मोआब आफ्‍नै बान्‍तामा लड़ीबड़ी खेलोस्, र त्‍यो ठट्टाको पात्र होस्‌।

²⁷के इस्राएल तेरो निम्‍ति ठट्टाको पात्र भएको थिएन? के त्‍यो चोरहरूका बीचमा पक्राउ परेको थियो र जब तैंले त्‍यसको कुरा गर्छस्‌ तब तैंले आफ्‍नो शिर हल्‍लाई-हल्‍लाईकन त्‍यसको ठट्टा गर्छस्‌?

²⁸हे मोआबमा बस्‍नेहरू हो, तिमीहरूका नगरहरू छोड़ र चट्टानहरूमा बस। गुफाका मुखको छेउमा गुँड़ लाउने ढुकुरजस्‍ता होओ।

²⁹“मोआबको घमण्‍डको बारेमा हामीले सुनेका छौं— त्‍यसको नचाहिँदो घमण्‍ड र चढ़ेको शेखी, र त्‍यसको घमण्‍डका कुरा अनि त्‍यसको हृदयको अहङ्कारको बारेमा हामीले सुनेका छौं!

³⁰त्‍यसको तुजुक म जान्‍दछु, तर त्‍यो व्‍यर्थको हो, र त्‍यसको अहङ्कारले केही गर्न सकेको छैन,” परमप्रभु भन्‍नुहुन्‍छ।

³¹यसैकारण म मोआबको निम्‍ति विलाप गर्दछु, सारा मोआबको निम्‍ति म रुन्‍छु। कीर-हरेशेतका मानिसहरूका निम्‍ति म शोक गर्दछु।

³²याजेर रोएको जस्‍तै म तेरो लागि रुन्‍छु। ए सिब्‍माका दाखका बोटहरू, तेरा हाँगाहरू समुद्रसम्‍म पुगे, ती याजेरको समुद्रसम्‍मै पुगेका छन्‌। तेरा पाकेका फलहरू र तेरा दाखमा नाश गर्ने आइलागेको छ।

³³मोआबका बगैँचाहरू र खेतहरूबाट आनन्‍द र रमाहट उठाइलगिए। दाखको कोलबाट मैले दाखको रस बन्‍द गरिदिएको छु। आनन्‍दले कराउँदै कसैले त्‍यो कुल्‍चँदैन। तिनीहरूको कराइ आनन्‍दको कराइ होइन।

³⁴“हेश्‍बोनबाट तिनीहरू रोएको सोर एलाले र यहाँसम्‍मै पुगेको छ, सोअरदेखि होरोनैम र एग्‍लत-शलीशियाहसम्‍मै, किनकि निम्रीमको पानी पनि सुकिसकेको छ।

³⁵अल्‍गा-अल्‍गा ठाउँहरूमा बलि चढ़ाउने र देवताहरूलाई धूप बाल्‍नेलाई म मोआबदेखि बिलकुलै खतम पार्नेछु,” परमप्रभु भन्‍नुहुन्‍छ।

³⁶“यसैले बाँसुरीले झैँ मेरो हृदयले मोआबको निम्‍ति विलाप गर्छ! कीर-हरेशेतका मानिसहरूका निम्‍ति बाँसुरीले झैँ त्‍यसले विलाप गर्छ। तिनीहरूले कमाएका धन नष्‍ट भए।

³⁷तिनीहरू सबैले कपाल खौरेका छन्, र दाह्री काटेका छन्‌। हरेकको हात काटेर चिरिएको छ। हरेकले भाङ्‌ग्राले कम्‍मर छोपेको छ।

³⁸मोआबका घरका सबै कौसी-कौसीमा र चोकहरूमा रुवाइबाहेक अरू केही छैन, किनकि कसैले नचाहने भाँड़ाजस्‍तै मैले मोआबलाई फुटाइदिएको छु,” परमप्रभु भन्‍नुहुन्‍छ।

³⁹“त्‍यो कस्‍तो टुक्रा-टुक्रा भएको छ! तिनीहरू कस्‍तो विलाप गर्दछन्‌! मोआबले कसरी लाजले आफ्‍नो पीठ फर्काउँछ! मोआब आफ्‍ना चारैतिर हुनेहरूका निम्‍ति हाँसोको र घृणाको पात्र भएको छ।”

⁴⁰परमप्रभु यसो भन्‍नुहुन्‍छ: “हेर त, एउटा गरुड मोआबमाथि आफ्‍नो पखेटा फिँजाएर वेगसित आउँदैछ।

⁴¹किर्योत कब्‍जा गरिनेछ, र किल्‍लाहरू अधिकार गरिनेछन्‌। त्‍यस दिन मोआबका योद्धाहरूका मुटु प्रसववेदनामा परेकी स्‍त्रीको मुटुजस्‍तै हुनेछन्‌।

⁴²मोआब राज्‍य नहुने गरी सर्वनाश गरिनेछ, किनभने त्‍यसले परमप्रभुको विरोध गर्‍यो।

⁴³त्रास, खाड़ल र पासोले तँलाई पर्खंदैछन्, हे मोआबका मानिसहरू हो,” परमप्रभु भन्‍नुहुन्‍छ।

⁴⁴“त्रासदेखि भाग्‍ने खाड़लमा पर्नेछ। खाड़लदेखि माथि निस्‍कने पासोमा पर्नेछ। किनकि मोआबमाथि म त्‍यसको दण्‍डको वर्ष ल्‍याउनेछु,” परमप्रभु भन्‍नुहुन्‍छ।

⁴⁵“हेश्‍बोनको छायामा असहाय भएर शरणार्थीहरू अड़िन्‍छन्‌। किनकि हेश्‍बोनबाट एउटा आगो निस्‍किआएको छ— सीहोनको बीचबाट एउटा ज्‍वाला। त्‍यसले मोआबका निधारहरूलाई, र झगड़ा गर्ने अहङ्कारीहरूका थाप्‍लालाई जलाइदिन्‍छ।

⁴⁶हाय तँलाई, ए मोआब! कमोशका मानिसहरू नष्‍ट भए, तेरा छोराहरू निर्वासनमा लगिए तेरा छोरीहरू कैदमा।

⁴⁷“तापनि आउने दिनहरूमा म मोआबको सुख-शान्‍ति फेरि फर्काइल्‍याउनेछु,” परमप्रभु भन्‍नुहुन्‍छ। मोआबको न्‍याय यहाँ समाप्‍त हुन्‍छ।