Read Nepali New Revised Version, 2012 यर्मिया 49 Bible Online

यर्मिया 49 - Nepali New Revised Version, 2012 bible

यर्मिया 49

¹अम्‍मोनीहरूका विषयमा: परमप्रभु यसो भन्‍नुहुन्‍छ: “के इस्राएलका छोराहरू छैनन्‌? के त्‍यसको कुनै उत्तराधिकारी छैन? किन त मोलोखले गादलाई कब्‍जा गरेको छ? र उसका आफ्‍ना मानिसहरू किन त्‍यसका नगरहरूमा आएर बस्‍छन्‌?

²दिनहरू आउँदैछन्,” परमप्रभु भन्‍नुहुन्‍छ, “जब म अम्‍मोनीहरूका रब्‍बाको विरुद्ध युद्धको ध्‍वनि सुनाउनेछु। त्‍यो एउटा भग्‍नावशेषको ढिस्‍को हुनेछ, र त्‍यसका छेउछाउका गाउँहरू आगोले भस्‍म पारिनेछन्‌। तब आफूलाई खेदेर निकाल्‍नेहरूलाई इस्राएलले धपाउनेछ,” परमप्रभु भन्‍नुहुन्‍छ।

³“हे हेश्‍बोन, विलाप गर्‌। किनभने ऐ सहर सर्वनाश गरिएको छ। हे रब्‍बाका बासिन्‍दा हो, चर्को गरी रोओ, भाङ्‌ग्रा लगाओ, विलाप गर! पर्खालहरूभित्र यताउता दगुर, किनकि मोलोख आफ्‍ना पूजाहारीहरू र अधिकृतहरूसित निर्वासनमा जानेछ।

⁴तँ किन आफ्‍ना फलवान्‌ उपत्‍यकाका निम्‍ति अति घमण्‍ड गर्दछस्‌? हे विश्‍वासघाती छोरी, ‘मलाई कसले आक्रमण गर्छ,’ भन्‍दै आफ्‍नो धनमा तैंले भरोसा गरेर भन्‍छेस्‌।

⁵तेरा चारैतिर भएकाहरूबाट म नै तँमाथि त्रास ल्‍याउनेछु,” सर्वशक्तिमान्‌ परमप्रभु भन्‍नुहुन्‍छ। “तिमीहरू हरेक धपाइनेछौ, र शरणार्थीहरूलाई जम्‍मा गर्ने कोही हुनेछैन।

⁶“तरै पनि म पछि अम्‍मोनीहरूको सुख-शान्‍ति फर्काएर ल्‍याइदिनेछु,” परमप्रभु भन्‍नुहुन्‍छ।

⁷एदोमको विषयमा: सर्वशक्तिमान्‌ परमप्रभु यसो भन्‍नुहुन्‍छ: “के तेमानमा अब केही बुद्धि छैन? के विवेकीहरूको सल्‍लाह नष्‍ट भयो? के तिनीहरूको बुद्धि बिग्रियो?

⁸हे ददानमा बस्‍ने हो, फर्क र भाग। गहिरा गुफाहरूमा लुक, किनभने म एसावलाई दण्‍ड दिने बेलामा त्‍यसमाथि दु:ख ल्‍याउनेछु।

⁹यदि दाख टिप्‍नेहरू तँकहाँ आएका भए, के तिनीहरूले केही शिला-बाला छोड्‌नेथिएनन्‌ र? यदि चोरहरू राती आएका भए, के तिनीहरूले आफूले चाहेका कुरा मात्र लैजानेथिएनन्‌?

¹⁰तर म त एसावलाई नाङ्गो पार्नेछु। म त्‍यसका लुक्‍ने ठाउँहरू खुला गरिदिनेछु, र त्‍यो लुक्‍न नपाओस्‌। त्‍यसका छोराछोरीहरू, आफन्‍तहरू र छिमेकीहरू नष्‍ट पारिनेछन्, र अब त्‍यसको नाउँनिशानै रहनेछैन।

¹¹तेरा टुहुरा-टुहुरीहरूलाई छोड़िराख्, म तिनीहरूका ज्‍यानको रक्षा गर्नेछु। तेरा विधवाहरूले पनि ममाथि भरोसा राख्‍न सक्‍छन्‌।”

¹²परमप्रभु यसो भन्‍नुहुन्‍छ: “यदि कचौरा पिउनु नपर्नेले पनि त्‍यो पिउनैपर्छ भने, के दण्‍ड नपाईकन तँ उम्‍कन पाउँछस्‌ र? दण्‍डबाट तँ उम्‍कन पाउनेछैनस्, तर तैंले कचौरा पिउनैपर्छ।

¹³म आफ्‍नै नाउँमा शपथ खान्‍छु, कि बोज्रा भग्‍नावशेष हुनेछ, र त्‍यो त्रास, निन्‍दा र सरापको पात्र बन्‍नेछ। त्‍यसका सबै नगरहरू सधैँको निम्‍ति भग्‍नावशेष हुनेछन्,” परमप्रभु भन्‍नुहुन्‍छ।

¹⁴मैले परमप्रभुबाट एउटा सन्‍देश सुनेको छु। जाति-जातिहरूकहाँ यसो भन्‍न एउटा दूत पठाइएको छ: “त्‍यसलाई आक्रमण गर्न भेला होओ, लड़ाइँको लागि उठ!”

¹⁵“अब म तँलाई जाति-जातिहरूका बीचमा सानो, र मानिसहरूका बीचमा घृणित तुल्‍याउनेछु।

¹⁶तैंले प्रेरणा दिएको त्रास र तेरो हृदयको घमण्‍डले तँलाई धोका दिएको छ। हे चट्टानका चिराहरूमा बस्‍ने, हे डाँड़ाका टाकुराहरू ओगटेर बस्‍ने, तैंले आफ्‍नो गुँड़ गरुडको झैँ अल्‍गोमा बनाए तापनि म तँलाई त्‍यहाँबाट तल झार्नेछु,” परमप्रभु भन्‍नुहुन्‍छ।

¹⁷“एदोम अति त्रासको पात्र हुनेछ। त्‍यसका सबै चोटहरू देखेर त्‍यहाँबाट जाने सबै तर्सनेछन्‌ र त्‍यसको गिल्‍ला गर्नेछन्‌।”

¹⁸परमप्रभु भन्‍नुहुन्‍छ, “जसरी सदोम र गमोरा, तिनका छेउछाउका नगरहरूसमेत नष्‍ट भए, त्‍यसरी नै कोही पनि त्‍यहाँ रहनेछैन, कोही मानिस पनि बस्‍नेछैन।

¹⁹“यर्दनका झाड़ीहरूबाट धेरै खर्क भएको ठाउँमा सिंह आएझैँ, म एदोमलाई एकै छिनमा त्‍यसको देशबाट खेद्‌नेछु। यसको निम्‍ति मैले नियुक्त गर्ने चुनिएको जनचाहिँ को हो? को मजस्‍तो छ र? मलाई कसले हाँक दिन सक्‍छ र? कुनचाहिँ गोठालो मेरो विरुद्धमा खड़ा हुन सक्‍छ?”

²⁰यसैकारण एदोमको विरुद्धमा परमप्रभुले रच्‍नुभएको योजना, र तेमानमा बस्‍नेहरूका विरुद्धमा उहाँको अभिप्राय कस्‍तो छ भनेर सुन: बगालका साना-साना पाठाहरू घिस्‍स्‍याएर लगिनेछन्‌। तिनीहरूको कारण त्‍यसले तिनीहरूको खर्क बिलकुलै सर्वनाश पारिदिनेछ।

²¹तिनीहरू लोटेको आवाजले पृथ्‍वी नै काम्‍नेछ। तिनीहरू कराएको सोर लाल समुद्रसम्‍मै प्रतिध्‍वनित हुनेछ।

²²हेर, एउटा गरुड वेग हानेर आउनेछ, र बोज्रामाथि त्‍यसले आफ्‍नो पखेटा फिँजाउनेछ। त्‍यस दिन एदोमका योद्धाहरूका हृदय प्रसववेदनामा परेकी स्‍त्रीको झैँ हुनेछन्‌।

²³दमस्‍कसको विषयमा: “हमात र अर्पाद अलमल्‍ल परेका छन्, किनकि तिनीहरूले खराब समाचार सुनेका छन्‌। तिनीहरू डरले चञ्‍चल भएका छन्, र शान्‍त हुन नसक्‍ने समुद्रझैँ तिनीहरूको हृदय घबराएको छ।

²⁴दमस्‍कस निर्बल भएको छ, त्‍यो भाग्‍नलाई पछि फर्केको छ। त्रासले त्‍यसलाई समातेको छ। प्रसववेदनामा परेकी स्‍त्रीलाई झैँ चिन्‍ता र पीडाले त्‍यसलाई पक्रेका छन्‌।

²⁵त्‍यो नाउँ चलेको सहर किन त्‍यागिएको छैन, त्‍यो नगर जससँग म खुशी छु?

²⁶निश्‍चय नै त्‍यसका जवान मानिसहरू सड़कहरूमा ढल्‍नेछन्, र त्‍यस दिन त्‍यसका सबै सिपाहीहरू चूपचाप हुनेछन्,” सर्वशक्तिमान्‌ परमप्रभु भन्‍नुहुन्‍छ।

²⁷दमस्‍कसको पर्खालहरूमा म आगो लगाइदिनेछु। त्‍यसले बेन-हददका किल्‍लाहरू भस्‍म पार्नेछ।”

²⁸बेबिलोनका राजा नबूकदनेसरले आक्रमण गरेका केदार र हासोरका राज्‍यहरूका विषयमा: परमप्रभु यसो भन्‍नुहुन्‍छ: “उठ, र केदारलाई आक्रमण गर। पूर्वका मानिसहरूलाई सर्वनाश पार।

²⁹तिनीहरूका पालहरू र बगालहरू र तिनीहरूका ओत लाग्‍ने ठाउँहरू र सबै मालतालहरू लगिनेछन्‌। तिनीहरूका ऊँटहरू पनि तिनीहरूबाट खोसी लगिनेछन्‌। मानिसहरूले कराई-कराईकन तिनीहरूलाई भन्‍नेछन्, ‘चारैतिर त्रास, त्रास!’

³⁰“हे हासोरमा बस्‍ने हो, छिटो भाग! गहिरा गुफाहरूमा लुकेर बस,’ परमप्रभु भन्‍नुहुन्‍छ। “बेबिलोनको राजा नबूकदनेसरले तिमीहरूका विरुद्धमा षड्‌यन्‍त्र रचेको छ। तिमीहरूका विरुद्धमा त्‍यसले एउटा योजना बनाएको छ।

³¹“आराम र ढुक्‍कसित बस्‍ने जातिलाई आक्रमण गर,” परमप्रभु भन्‍नुहुन्‍छ, “त्‍यो जाति जसका न त मूल ढोकाहरू न गजबारहरू छन्‌। त्‍यसका मानिसहरू एकलै बस्‍तछन्‌।

³²तिनीहरूका ऊँटहरू लूटका माल हुनेछन्, तिनीहरूका गाई-गोरुका बथान लुटिनेछन्‌। टाढ़ा-टाढ़ा ठाउँमा बस्‍नेहरूलाई म हावामा तितरबितर पार्नेछु, र तिनीहरूका चारैतिरबाट तिनीहरूमाथि सर्वनाश ल्‍याउनेछु,” परमप्रभु भन्‍नुहुन्‍छ।

³³“हासोर स्‍यालहरूको अखड़ा हुनेछ, त्‍यो सदाको निम्‍ति उजाड़-स्‍थान बन्‍नेछ। त्‍यहाँ कोही पनि बस्‍नेछैन, त्‍यसमा कुनै मानिस रहनेछैन।”

³⁴यहूदाका राजा सिदकियाहका राजकालको सुरुमा एलामको विषयमा यर्मिया अगमवक्ताकहाँ आएको परमप्रभुको वचन यही हो:

³⁵सर्वशक्तिमान्‌ परमप्रभु यसो भन्‍नुहुन्‍छ: “हेर, म एलामको धनु भाँचिदिनेछु, जो तिनीहरूका शक्तिको आधार हो।

³⁶एलामको विरुद्धमा आकाशका चारै दिशाबाट बतास चलाएर तिनीहरूलाई चारै दिशामा तितरबितर पारिदिनेछु, एलामका निर्वासितहरू नगएको एउटै जाति हुनेछैन।

³⁷तिनीहरूका शत्रुहरू र तिनीहरूका प्राण लिन खोज्‍नेहरूका सामुन्‍ने म एलामलाई चूरचूर पार्नेछु। म तिनीहरूमाथि सर्वनाश, अर्थात्‌ मेरो भयानक क्रोध ल्‍याउनेछु,” परमप्रभु भन्‍नुहुन्‍छ। “मैले तिनीहरूलाई खतम नपारुञ्‍जेल तिनीहरूका पछिपछि तरवार लिएर खेद्‌नेछु।

³⁸म मेरो सिंहासन एलाममा बसाल्‍नेछु, र त्‍यसका राजाहरू र अधिकारीहरूलाई नष्‍ट पार्नेछु,” परमप्रभु भन्‍नुहुन्‍छ।

³⁹“तापनि आउने दिनहरूमा म एलामको सुख-शान्‍ति कायम राखिदिनेछु,” परमप्रभु भन्‍नुहुन्‍छ।