Nepali New Revised Version, 2012 bible online

यर्मिया 51

¹परमप्रभु यसो भन्‍नुहुन्‍छ: “हेर, बेबिलोनको विरुद्धमा र लेब-कमाइका [1] मानिसहरूका विरुद्धमा एउटा सर्वनाश गर्ने आत्‍मालाई म सुर्‍याउनेछु।

²त्‍यसलाई निफन्‍न र त्‍यसको देश उजाड़ पार्नलाई बेबिलोनमा म विदेशीहरू पठाउनेछु। त्‍यसका सर्वनाशको दिनमा त्‍यसको विरोध गर्ने विदेशीहरू त्‍यसका चारैतिरबाट आउनेछन्‌।

³धनुर्धारीले आफ्‍नो धनुमा ताँदो नचढ़ाओस्, र त्‍यो आफ्‍नो कवच लगाएर खड़ा नहोओस्‌। त्‍यसका जवान मानिसहरूलाई नछोड़। त्‍यसको सबै सेनालाई बिलकुलै सर्वनाश गर।

⁴तिनीहरू बेबिलोनमा मारिनेछन्‌। त्‍यसका गल्‍लीहरूमा तिनीहरू मरणान्‍त घाइते हुनेछन्‌।

⁵किनभने इस्राएल र यहूदा आफ्‍ना परमेश्‍वर, सर्वशक्तिमान्‌ परमप्रभुद्वारा त्‍यागिएका छैनन्, यद्यपि इस्राएलका परमपवित्रको सामुन्‍ने तिनीहरूको देश दोषले भरिएको छ।

⁶“बेबिलोनबाट भाग! हरेक आ-आफ्‍नो ज्‍यान जोगाउनलाई भाग। त्‍यसका पापहरूको कारण तिमीहरू नाश नहोओ। यो परमप्रभुको बदला लिने समय हो, उहाँले त्‍यसलाई त्‍यसले पाउनुपर्ने दण्‍ड दिनुहुनेछ।

⁷बेबिलोन परमप्रभुको हातमा एउटा सुनको कचौरा थियो। त्‍यसले सारा संसारलाई मत्त्यायो। जाति-जातिहरूले त्‍यसको दाखमद्य पिए, र त्‍यसैकारण उनीहरू बौलाहा भए।

⁸अब बेबिलोन एक्‍कासि ढल्‍नेछ र टुक्रा-टुक्रा पारिनेछ। त्‍यसको निम्‍ति विलाप गर! त्‍यसको दुखाइको निम्‍ति लेप ल्‍याओ, शायद त्‍यो निको हुन्‍छ कि!

⁹“‘हामीहरूले बेबिलोनलाई निको पार्नेथियौं, तर त्‍यो निको हुन सक्‍दैन। त्‍यसलाई छोड़िदियौं, र हामी आ-आफ्‍नो देशमा गइहालौं। किनकि त्‍यसको इन्‍साफ आकाशसम्‍मै पुगेको छ, यो बादलसम्‍मै अग्‍लो उठेको छ’।

¹⁰“‘परमप्रभुले हामीलाई निर्दोष ठहराउनुभएको छ। आऔं, हामी परमप्रभु हाम्रा परमेश्‍वरले के गर्नुभएको छ, त्‍यो सियोनमा प्रचार गरौं’।

¹¹“काँड़ तिखार! ढालहरू लेओ। परमप्रभुले मादीहरूका राजाहरूलाई सुर्‍याउनुभएको छ, किनभने बेबिलोनलाई नाश गर्नु नै उहाँको अभिप्राय छ। परमप्रभुले बदला लिनुहुनेछ, आफ्‍नो मन्‍दिरको निम्‍ति बदला।

¹²बेबिलोनका पर्खालहरूका विरुद्धमा झन्‍डा उठाओ। गारदलाई बलियो पार। पहरा-चौकी खटाओ। लुकेर हमला गर्ने ठाउँ तयार पार। बेबिलोनका मानिसहरूका विरुद्धमा परमप्रभुले आफ्‍नो उर्दी दिनुभएको छ, उहाँले आफ्‍नो अभिप्राय पूरा गर्नुहुनेछ।

¹³तँ, जो धेरै पानी भएका ठाउँमा बस्‍छस्, र धन-सम्‍पत्तिका भण्‍डारले पूर्ण भएको छस्, तेरो खतम हुने समय आइपुग्‍यो, तेरो अन्‍त्‍य आइपुग्‍यो।

¹⁴सर्वशक्तिमान्‌ परमप्रभुले आफ्‍नै नाउँमा शपथ खानुभएको छ, सलहसरि तिमीहरूका बीचमा म निश्‍चय नै मानिसहरू भरिदिनेछु, र उनीहरूले तिमीहरूमाथि विजयको नारा लगाउनेछन्‌।

¹⁵“उहाँले पृथ्‍वीलाई आफ्‍नो सामर्थ्‍यले सृजनुभयो। उहाँले आफ्‍नो बुद्धिले संसारलाई स्‍थापित गर्नुभयो, आफ्‍नो समझशक्तिले उहाँले आकाशलाई फैलाउनुभयो।

¹⁶उहाँ गर्जनुहुँदा आकाशमा पानीहरू गड्याङगुडुङ गर्छन्, उहाँले पृथ्‍वीको पल्‍लो छेउदेखि बादलहरू उठाउनुहुन्‍छ। उहाँले वृष्‍टिको साथ बिजुली चम्‍काउनुहुन्‍छ, र आफ्‍ना भण्‍डारहरूदेखि बतास चलाउनुहुन्‍छ।

¹⁷“हरेक मानिस बुद्धिहीन र ज्ञानरहित छ। हरेक सुनार त्‍यसका मूर्तिहरूद्वारा नै लाजमा पर्छ। त्‍यसका प्रतिमाहरू झूटा छन्, तिनमा सास हुँदैन।

¹⁸ती व्‍यर्थका हुन्, ठट्टाका पात्र मात्र। तिनीहरूको न्‍याय हुँदा ती नष्‍ट हुनेछन्‌।

¹⁹उहाँ, जो याकूबका हिस्‍सा हुनुहुन्‍छ, यीजस्‍ता हुनुहुन्‍न, किनकि उहाँ नै आफ्‍नो निज उत्तराधिकारको कुलसमेत सारा थोकहरू बनाउने हुनुहुन्‍छ। सर्वशक्तिमान्‌ परमप्रभु उहाँको नाउँ हो।

²⁰“तँ मेरो युद्धको गदा, लड़ाइँको हतियार होस्‌। तँद्वारा म जातिहरूलाई टुक्रा-टुक्रा पार्छु, तँद्वारै म राज्‍यहरूलाई नाश गर्छु।

²¹तँद्वारा म घोड़ा र त्‍यसको सवारलाई टुक्रा-टुक्रा पार्छु।

²²तँद्वारा म रथ र सारथिलाई टुक्रा-टुक्रा पार्छु। तँद्वारा म पुरुष र स्‍त्रीलाई टुक्रा-टुक्रा पार्छु। तँद्वारा म बूढ़ा र जवान दुवैलाई टुक्रा-टुक्रा पार्छु। तँद्वारा म युवक र युवतीलाई टुक्रा-टुक्रा पार्छु।

²³तँद्वारा म गोठाला र त्‍यसको बगाललाई टुक्रा-टुक्रा पार्छु। तँद्वारा म किसान र त्‍यसको गोरुलाई टुक्रा-टुक्रा पार्छु। तँद्वारा म राज्‍यपाल र पदाधिकारीहरूलाई टुक्रा-टुक्रा पार्छु।

²⁴“तिनीहरूले सियोनमा गरेका सबै खराबीको कारण म बेबिलोन र बेबिलोनियामा बस्‍ने सबै मानिसहरूलाई तेरै आँखाको सामुन्‍ने प्रतिफल दिनेछु,” परमप्रभु भन्‍नुहुन्‍छ।

²⁵“हे नाश गर्ने पहाड़, जसले सारा पृथ्‍वीलाई नाश गर्दछ, म तेरो विरुद्धमा छु,” परमप्रभु भन्‍नुहुन्‍छ। “म मेरो हात तेरो विरुद्धमा पसार्नेछु, र तँलाई भीरबाट तल खसालिदिनेछु, र तँलाई डढ़ेलो लागेको पहाड़ तुल्‍याइदिनेछु।

²⁶तँबाट एउटै ढुङ्गा पनि घरको कुने-ढुङ्गाको लागि लिइनेछैन, न त जग बसाल्‍नका लागि एउटा ढुङ्गो लिइनेछ। किनकि तँ सदाको निम्‍ति उजाड़ भइरहनेछस्,” परमप्रभु भन्‍नुहुन्‍छ।

²⁷“देशमा एउटा झन्‍डा खड़ा गर! जाति-जातिहरूका बीचमा तुरही बजाओ! त्‍यसको विरुद्धमा युद्ध गर्नलाई जातिहरूलाई तयार गर। यी राज्‍यहरूलाई बेबिलोनको विरुद्धमा बोलाओ— आरारात, मिन्‍नी र अशकनज। त्‍यसको विरुद्धमा एउटा सेनापति नियुक्त गर, सलहहरूका झुण्‍डझैँ घोड़ाहरू पठाओ।

²⁸त्‍यसको विरुद्धमा युद्ध गर्नलाई जातिहरूलाई तयार पार— मादीहरूका राजा, उनका राज्‍यपाल र उनका सबै पदाधिकारीहरूलाई, र उनीहरूले शासन गरेका सारा देशलाई।

²⁹देश थरथर काम्‍छ र मड़ारिन्‍छ, किनकि बेबिलोन देशलाई उजाड़ र कुनै मानिस नभएको बनाउनलाई परमप्रभुको अभिप्राय कायम रहन्‍छ।

³⁰बेबिलोनका योद्धाहरूले लड़ाइँ गर्न छोड़ेका छन्, तिनीहरू त आफ्‍ना किल्‍लाभित्रै बस्‍छन्‌। तिनीहरूको बल घटिहाल्‍यो। तिनीहरू स्‍त्रीझैँ भएका छन्‌। त्‍यसका बस्‍ने ठाउँहरू आगो लगाइसकिएका छन्‌। त्‍यसका ढोकामा गजबारहरू भत्‍काइएका छन्‌।

³¹उसको जम्‍मै सहर लिइहाल्‍यो भनी बेबिलोनको राजालाई सुनाउन एउटा हुलाकी अर्कोकहाँ र एउटा समाचारवाहक अर्कोकहाँ दौड़ेर जान्‍छ,

³²र साथै यो खबर पनि सुनाउँछन्, कि जँघारहरू लिइए, सिमसारहरूमा आगो लगाइए, सिपाहीहरू डरले आत्तिए।”

³³सर्वशक्तिमान्‌ परमप्रभु, इस्राएलका परमेश्‍वर यसो भन्‍नुहुन्‍छ: “बेबिलोनकी छोरी कुल्‍चने समयमा दाइँ गर्ने खलाजस्‍तै भएकी छ। त्‍यसको कटनीको समय चाँड़ै आइपुग्‍नेछ।”

³⁴“बेबिलोनको राजा नबूकदनेसरले हामीलाई खाइहाल्‍यो। त्‍यसले हामीलाई अलमल्‍ल पार्‍यो। हामीलाई त्‍यसले एउटा रित्तो भाँड़ाजस्‍तै तुल्‍याएको छ। त्‍यसले हामीलाई अजिङ्गरले झैँ निलिहाल्‍यो, र स्‍वादिलो थोकलाई झैँ हामीलाई निलेर आफ्‍नो पेट भर्‍यो, र त्‍यसपछि बान्‍ता गरेर हामीलाई फ्‍याँक्‍यो।

³⁵हामीमाथि र हाम्रा छोराछोरीहरूमाथि गरेको उपद्रव बेबिलोनमाथि नै परोस्,” सियोनका बासिन्‍दाहरूले भन्‍छन्‌। “हाम्रो रगतको बदला बेबिलोनीहरूमाथि नै परोस्,” यरूशलेमले यसो भन्‍छ।

³⁶यसकारण परमप्रभु यसो भन्‍नुहुन्‍छ, “हेर्, म तेरो पक्ष लिनेछु, तेरो निम्‍ति बदला म नै लिनेछु। म त्‍यसको समुद्र सुकाइदिनेछु, त्‍यसको पानीका मूलहरू सुकाइदिनेछु।

³⁷बेबिलोनचाहिँ भग्‍नावशेषको ढेर र स्‍यालहरूको अखड़ा, कोही मानिस नबस्‍ने ठाउँ, र त्रास र गिल्‍लाको पात्र हुनेछ।

³⁸त्‍यसका सबै मानिसहरू सिंहझैँ गर्जन्‍छन्‌। तिनीहरू जवान सिंहझैँ कराउँछन्‌।

³⁹तर जब तिनीहरू बिउँझन्‍छन्, तब म तिनीहरूका निम्‍ति भोज तयार पार्नेछु, र म तिनीहरूलाई मत्त्याउनेछु, र यसरी तिनीहरू हाँस्‍दै कराउनेछन्‌ र सधैँको निम्‍ति सुत्‍नेछन्‌ र जाग्‍नेछैनन्,” परमप्रभु भन्‍नुहुन्‍छ।

⁴⁰“म तिनीहरूलाई काटिनलाई लगिने थुमा, भेड़ा र बोकाहरूझैँ ल्‍याउनेछु।

⁴¹“सारा पृथ्‍वीको अहङ्कार, बेबिलोन कसरी लिइनेछ! जाति-जातिहरूका बीचमा बेबिलोन अति घृणित हुनेछ!

⁴²समुद्र नै बेबिलोनमाथि उक्‍लेर आउनेछ, समुद्रका गर्जने छालहरूले त्‍यसलाई छोप्‍नेछन्‌।

⁴³त्‍यसका नगरहरू सुक्‍खा ठाउँ, मरुभूमि, कोही पनि नबस्‍ने जग्‍गा हुनेछ। त्‍यताबाट भएर कोही मानिस जानेछैन।

⁴⁴म बेबिलोनमा बेललाई दण्‍ड दिनेछु, र त्‍यसले निलेका कुरा म त्‍यसलाई नै मुखबाट बान्‍ता गर्न लाउनेछु। जातिहरू फेरि कहिल्‍यै त्‍यसकहाँ ओइरिनेछैनन्, र बेबिलोनको पर्खाल ढल्‍नेछ।

⁴⁵“हे मेरा प्रजा, त्‍यसबाट निस्‍केर आओ। हरेक आ-आफ्‍नो ज्‍यान जोगाउनलाई भाग। परमप्रभुको भयानक रीसदेखि भाग।

⁴⁶देशमा केही हल्‍ला सुन्‍दा हतोत्‍साहित नहोओ अथवा नडराओ। यस वर्षमा एक किसिमको होहल्‍ला, अनि अर्को वर्षमा अर्को किसिमको होहल्‍ला, देशमा उपद्रव र शासकको विरुद्धमा शासक उठेको होहल्‍ला।

⁴⁷किनकि यस्‍तो बेला निश्‍चय नै आउँछ, जब म बेबिलोनका मूर्तिहरूलाई दण्‍ड दिनेछु। त्‍यसको सारा देश लाजमा पारिनेछ, र त्‍यसका मारिएका सबै त्‍यसकै बीचमा मारिनेछन्‌।

⁴⁸तब स्‍वर्ग र पृथ्‍वी र तिनमा भएका सबैले बेबिलोनको हारमा आनन्‍दले चिच्‍च्‍याउनेछन्, किनकि सर्वनाश गर्नेहरू उत्तर दिशाबाट त्‍यसको विरुद्धमा आउनेछन्,” परमप्रभु भन्‍नुहुन्‍छ।

⁴⁹“बेबिलोनको कारणले पृथ्‍वीमा मारिएकाहरू ढलेझैँ इस्राएलका मारिएकाहरूको कारण बेबिलोन ढल्‍नैपर्छ।

⁵⁰तिमीहरू, जो तरवारबाट उम्‍केका छौ, जाओ र नअड़िओ। टाढ़ाको देशमा परमप्रभुलाई सम्‍झना गर, यरूशलेमको बारेमा विचार गर।”

⁵¹“हामीहरू लाजमा पारिएका छौं, किनकि हामीले गाली पाएका छौं। लाजले हाम्रो मुख ढाकेको छ, किनभने परमप्रभुको घरका पवित्र ठाउँहरूमा विदेशीहरू प्रवेश गरेका छन्‌।”

⁵²“तर यस्‍ता दिनहरू आउँदैछन्,” परमप्रभु भन्‍नुहुन्‍छ, “जब म त्‍यसका मूर्तिहरूलाई दण्‍ड दिनेछु, र त्‍यसको देशभरि नै घाइतेहरूको क्रन्‍दन सुनिनेछ।

⁵³उँभो स्‍वर्गसम्‍म बेबिलोन उक्‍ले तापनि र आफ्‍नो अल्‍गा-अल्‍गा गढ़ीहरू बलिया पारे तापनि, त्‍यसको विरुद्धमा सर्वनाश गर्नेहरू म पठाउनेछु,” परमप्रभु भन्‍नुहुन्‍छ।

⁵⁴“बेबिलोनबाट विलापको आवाज निस्‍किन्‍छ! बेबिलोनीहरूको देशबाट रुवाइको सोर निस्‍कन्‍छ, ठूलो सर्वनाशको आवाज!

⁵⁵परमप्रभुले बेबिलोनलाई सर्वनाश गर्नुहुनेछ, र त्‍यसको ठूलो हल्‍लालाई उहाँले दमन गर्नुहुनेछ। त्‍यसका शत्रुहरूका छालहरू समुद्रका ठूला-ठूला पानीझैँ गर्जनेछन्‌। उनीहरूका गर्जनको प्रतिध्‍वनि हुनेछ।

⁵⁶सर्वनाश गर्ने बेबिलोनको विरुद्धमा आउनेछ, त्‍यसका योद्धाहरू पक्राउ पर्नेछन्, र तिनीहरूका धनु टुक्रा-टुक्रा पारिनेछन्, किनकि परमप्रभु बदला लिने परमेश्‍वर हुनुहुन्‍छ। उहाँले पूरै प्रतिफल दिनुहुनेछ।

⁵⁷म त्‍यसका पदाधिकारीहरू र बुद्धिमान्‌ मानिसहरूलाई, त्‍यसका राज्‍यपाल र अधिकृतहरूलाई र योद्धाहरूलाई पनि मतवाला बनाउनेछु। तिनीहरू सदाको निम्‍ति निदाउनेछन्, र बिउँझनेछैनन्,” महाराजा, जसको नाउँ सर्वशक्तिमान्‌ परमप्रभु हो, उहाँ भन्‍नुहुन्‍छ।

⁵⁸सर्वशक्तिमान्‌ परमप्रभु यसो भन्‍नुहुन्‍छ, “बेबिलोनको चौड़ा पर्खाल सम्‍म पारिनेछ, र त्‍यसका अल्‍गा मूल ढोकाहरू आगोले जलाइनेछन्‌। मानिसहरू व्‍यर्थमा आफूलाई थकित तुल्‍याउँछन्‌। जाति-जातिका परिश्रम ज्‍वालाको निम्‍ति इन्‍धन मात्र हुन्‍छन्‌।”

⁵⁹महसेयाहका नाति, नेरियाहका छोरा सरायाह जो राजभवनका मुख्‍य अधिकृत थिए, जो यहूदाका राजा सिदकियाहका राजकालको चौथो वर्षमा राजासँगै बेबिलोनमा गएका थिए, त्‍यस बेला तिनलाई यर्मियाले दिएको सन्‍देश यही हो।

⁶⁰बेबिलोनमा आइपर्ने सबै सर्वनाशको विषयका कुरा यर्मियाले एउटा पत्रको मुट्ठोमा लेखेका थिए— बेबिलोनको बारेमा लेखिएका सबै कुरा।

⁶¹तिनले सरायाहलाई भने, “जब तिमी बेबिलोनमा पुग्‍छौ तब यी सबै कुरा तिमीले चर्को गरी पढ्‌नू,

⁶²र भन्‍नू, ‘हे परमप्रभु, तपाईंले यस ठाउँलाई सर्वनाश गर्छु भनी भन्‍नुभएको छ, यतिसम्‍म कि मानिस वा पशु कोही पनि यसमा वास गर्नेछैन। यो सदाको निम्‍ति उजाड़ पारिनेछ’।

⁶³यो पत्रको मुट्ठो पढ़िसकेपछि यसलाई एउटा ढुङ्गामा बाँधेर यूफ्रेटिस नदीमा फालिदेऊ।

⁶⁴तब यसो भन, ‘मैले त्‍यसमाथि ल्‍याउने सर्वनाशको कारण बेबिलोन यसरी नै फेरि कहिल्‍यै नउठ्‌ने गरी डुब्‍नेछ। र त्‍यसका मानिसहरू लोट्‌नेछन्‌’।” यर्मियाका वचनहरू यहीं सकिन्‍छ।

Read Nepali New Revised Version, 2012 यर्मिया 51 Bible Online

यर्मिया 51 - Nepali New Revised Version, 2012 bible

यर्मिया 51